2 Korinto 12

O Pipa'araw ato Mapolosi ci Pawloan

1Talacowa awaay ko ^poc no nipipasneng ako, nikawrira, ma^deng a samaanen. O papasnesneng aca kako. Pasowal kako to pakayniay i nipipa'araw no Tapang i takowanan i mapolosi. 2Mafana' kako to ccay a mitooray ci Kristoan a tamdaw. I 'ayaw no spat ko safaw a mihcaan a makakoy cingra a mapatayra i safafaeday a kakarayan. (Halotireng ningra a makakoy hakiya? Maliyas ningra ko tireng ningra hakiya? Caay ka fana' kako. O Kawas ko mafana'ay.) 3Miliyaw kako a pasowal. Mafana' kako to nika kakoy noya tamdaw a mapatayra i kalipahakan. (Halotireng ningra a makakoy hakiya? Maliyas ningra ko tireng ningra hakiya? Caay ka fana' kako. O Kawas ko mafana'ay.) 4Matngil ningra itira ko caay ko sasowalen no tamdaw ato caay ko papatalahkalen a patngil i tamdaw a sowal. 5O papasnengen ako ko pakayniay toya tamdaw. Nikawrira, o pakayniay i tireng ako i, deng o nika tadanca no tireng ako a ccay ko papasnengen ako. 6Ano sapasnesnengan kako i, caay ko maapaay kako. Nawhani o so'linay ko sasowalen ako. Nikawrira, o saka^caaw pakinali no nima a pacakat to tireng ako pakayni i manengnengay ningra a dmak ako ato matngilay ningra a sowal ako saka, caayto pasneng kako.

7Tona tadamaan ko nipipa'araw no Kawas i takowanan saka, mapafli Ningra kako to ccay a cka i tireng ako to saka^caaw pisatakaraw ako. O ccay no niocoran ni Satan a coyoh konini a micocok i takowanan to saka^caaw pisatakaraw ako. 8Kinatoloto kako a milongoc i Tapang to sapialaaw Ningra tonini a cka nai tireng ako. 9Nikawrira, paca'of sa ko Tapang, <<Ma^dengto ko mikomi Ako i tisowanan. Nawhani itiya i nika tadanca iso a masongila' ko 'icel Ako,>> saan. Orasaka, salipahak sa kako a pasneng to nika tadanca ako. Ta pakayni tonini a mahapinang ako ko 'icel ni Kristo a midipot i takowanan. 10Orasaka, lipahak kako to nika tadanca ako, to nipipakangodo no tao takowanan, to nika roray, to nipikari'ang no tao i takowanan ato nika pades ako pakayni i pitoor ako ci Kristoan. Nawhani yo tadanca kako i, ci 'icel kako.

O Sida'it ni Pawlo to Korinto a Kiwkay

11Matiya o maapaay kako. Nikawrira, kamo ko paci^ciay to nika matini ako. Kona kahmeken namo kako. Nawhani ano caacaay ka tatodong kako i, awaay ko kaisafaan ako to maan aca toya <<Tadamaanay a tarokos,>> hananay namo. 12O mihadidiay kako to masamaamaanay a tayal i tamowanan. O kafahka'an a dmak ato nipipahapinang no Kawas to kafahka'an a 'icel ko sakafana' namo to nika o tarokos kako. 13O pidipot ako tamowanan ato romaroma a kiwkay i, o maan ko caay ka mo^cel ako i tamowanan saw? Deng o nika ^ca pipakaroray ako i tamowanan a papipadang i takowanan, nanay hpolen namo ko hatiniay a pisakakinih ako!

14O sakinatolo ako i matini a mipatala to sakatayraaw i tamowanan. Nikawrira, caay ko mamipakaroray kako i tamowanan. Caay ko payso namo ko nilongocan ako. Ora tireng namo ko nilongocan ako. Nawhani caay ko ka^mangay ko mamipatado to saka'orip no mato'asay. O mato'asay ko mamipatado to saka'orip no ka^mangay. 15Tadalipahak kako a palasawad to payso ako to saki tamowanan. O romasato, caay ka limla kako to tireng ako a kinafalah to saki tamowanan. Maolah a maolah kako i tamowanan i, malasakacaay ka olah namo i takowanan hakiya?

16Mafana' kamo to nika ^ca pipakaroray ako i tamowanan. Nikawrira, o mamilikaf ko cima namo takowanan a somowal, <<O tatiihay o misafana'ay, o milihiway ci Pawlo,>> o sasaan cangra. 17Cima noya niocoran ako a tamdaw a patayra i tamowanan ko misa'fitay a milihiw i tamowanan saw? 18Pa'icelen ako ci Titus a patayra i tamowanan. Papihaklongen ako ko ccay a salikaka i cingraan. Namisa'fit ci Titus i tamowanan saw? Caay ka lcad saw ko faloco' ato dmak niyam a tatosa?

19Latek harateng sa kamo, o pa'adingay cangra to tireng nai tiya aca a saan kamo tamiyanan. Caay! Matapal no Kawas ko nipitoor niyam to faloco' ni Kristo a pasowal i tamowanan. Kaolahan ako a salikaka, o sapatirengaw i tamowanan a palatamdamdaw ko dmak niyam a ma^min. 20O katalawan ako a tayra i tamowanan i, ano malalitmoh kita itiya, latek caay ka lcad to niharatengan namo kako. Latek caay ka lcad to niharatengan ako kamo. Latek ira ko macacoliay, ma'inapay, makteray, misatkeday, milokesay, milikafay, misatakaraway ato miparawraway a dmak namo. 21O katalawan ako a miliyaw a tayra i tamowanan i, latek mapakangodo no Kawas kako i ka'ayaw namo. Ano iraho ko kaackan, ma'odangay, ma'otitay a dmak namo, ano caay ka falic ko faloco' noya ciraraway i 'ayaw a 'alomanay a tamdaw i, o sakararom ako a tomangic konini.

Currently Selected:

2 Korinto 12: AMIS2019

Highlight

Copy