2 Korinto 13
13
O Papina'on ato Salicay
1Ano tayra kako i tamowanan i, o sakinatolo ako konini. Mato sowal a matilid i Fangcalay Cudad, <<Pakayni i nipipawacay no tatosa, tatolo a tamdaw ko sakahapinang no so'linay a sowal,>> saan. 2Ira ko sasowalen ako tamowanan o ciraraway i 'ayaw ato romaroma a tamdaw. Onini a sasowalen ako i, mapasowalto ako yo sakinatosa ako a tayra i tamowanan a miliso'. Maliyas ako kamo i matini saka, liyawen ako a somowal kamo. Ano miliyaw kako a tayra i tamowanan i, caay ko sasamadahen ako kamo a mitfoc. 3O nilongocan namo to wacay to nipicaliw ni Kristo i takowanan a pasowal i tamowanan i, o mamahapinang namo itiya. Nawhani caay ko tadancaay ko dmak ni Kristo. O ci'icelay ko dmak Ningra i tamowanan. 4Talacowa tadancaay ci Kristo a mapacek i ciwcika, nikawrira, pakayni i 'icel no Kawas a mapalowad Cingra a ma'orip nai patay. Malcad tonini, pakayni i nika laccay niyam aci Kristo a malatadancaay kami. Nikawrira, o 'icel no Kawas to nano nika laccay niyam aci Kristo ko sakanga'ay niyam a matayal i tamowanan.
5Lifeten a mihapinang ko tireng namo to nika o so'linay hakiya ko piti'er namo i ci Kristoan? Caay ka hapinang namo saw ko nika ira ci Yis Kristo i faloco' namo? Ano caay ka hatira i, o matfaday kamo. 6O faloco' ako i, nanay caay ko matfaday ca Pawlo saan kamo. 7Mitolon kami to Kawas to saka^caaw pidmak namo to maan aca a tatiihay a dmak. Onini i, caay ko sapahapinangaw to nika o pakalifetay kami. Ano matfatfaday kami a nengnengen namo i, nanay o mo^celay ko dmak namo. 8Nawhani caay ko mamidmak kami to masamaamaanay a miliyang tono so'lin a dmak, deng o pipa'ading to so'lin. 9Talacowa tadancanca kami, ki^mel kamo, nika o kakalipahakan niyam koni. O milongocan niyam i, malasakasongila'aw namo. 10Orasaka, i nipiliyas ako i tamowanan a mitilid tonini a tikami. Ta ano tayra kako i tamowanan, nanay caay ka ca^des ko sowal ako i tamowanan a patalahkal to nano nipaflian no Tapang i takowanan a sakowan. Onini a sakowan ako i, o sapatirengaw i tamowanan a palatamdamdaw. Caay ko sapipalasawadaw i tamowanan.
11Saikoray a sowal ako konini. Salikakaaw, sa'icelen ko namo a malamasongila'ay a tamdaw. Layapen ko pipa'icel ako. Kalaccay ko faloco' namo, kararihaday kamo. Nanay mikapot i tamowanan ko ciolahay ato parihadayay a Kawas!
12Ka o fangcalay a kacacocop ko sakalalitmoh namo a malalicalicay.
Nga'ayho saan ko polong no mitooray i tamowanan.
13Nanay, mararid a ira i tamowanan ko mikomi no Tapang a Yis Kristo ato olah no Kawas ato nipikapot no Fangcalay 'Adingo i tamowanan a ma^min.
Currently Selected:
2 Korinto 13: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
