1 Korinto 2
2
O Sowal to Pakayniay i Nika Pacek ni Kristo i Ciwcika
1Salikakaaw, yo tayra kako i tamowanan i 'ayaw i, caay ko tadamaanay, caay ko talolongay ko sowal ako a patnak i tamowanan to pakayniay i pakakmoday a dmak no Kawas. 2Nawhani yo mikapot kako i tamowanan i, deng ci Yis Kristo ato nika pacek Ningra i ciwcika ko sasowalen ako saan ko nihapinangan no faloco' ako. 3Saka, yo itira kako i tamowanan i, tadanca kako. Matalaw kako. Tata'ang ko nika mirmir ako. 4O sowal ako a mipatnak to Nga'ayay Ratoh i, caay ko tadamaanay a citanengay a sowal. O nano 'icel no Fangcalay 'Adingo ko nika somowal ako a pahapinang to nika o so'linay ko sowal ako. 5Orasaka, caay ko nano taneng no tamdaw ko sakapiti'er namo, o nano 'icel no Kawas.
O Taneng no Kawas
6Nikawrira, i tini i mato'asay ko faloco' a mitoor ci Kristoan a tamdaw i, o no taneng a sowal ko sapasowal ako. Nikawrira, caay ko nonini a hkal a taneng ato taneng no mamalahdaw a mikowanay tonini a hkal ko sasowalen ako. 7O masimeday a pakakmoday a taneng no Kawas ko sasowalen ako. O nisahalakaanto no Kawas konini i 'ayaw no satapangan no hkal to sakatadamaan ita. 8Awaay ko ccaccay aca a mikowanay tonini a hkal to mafana'ay tonini a taneng. Ano mafana'ay cangra i, kona caay pipacek cangra i ciwcika to tadamaanay a Tapang. 9Nikawrira, mato sowal a matilid i Fangcalay Cudad,
<<O caayho ka 'araw, o caayho ka tngil,
o caayho ka harateng no tamdaw a dmak i,
mapatalato no Kawas to saki maolahay Cingraan,>> saan.
10Nikawrira, pakaynien no Kawas i 'Adingo Ningra ko pipahapinang i titaanan to pakakmoday a dmak. Pakakadkad ko Fangcalay 'Adingo to polong no dmak. Halotalolongay a masimeday a dmak no Kawas a makadkad Ningra. 11Tinako sa, kita o tamdaw i, deng o faloco' noya tamdaw ko mafana'ay to salo'afang ningra. Malcad tonini, deng o 'Adingo no Kawas ko mafana'ay to harateng no Kawas. 12Nikawrira, caay ka o nonini a hkal a 'adingo ko nilayapan ita. O niocoran no Kawas a Fangcalay 'Adingo ko nilayapan ita. Onini ko sakafana' ita to nipaflian no Kawas i titaanan a maamaan a sapalmed.
13Saka, ano pakimad kami i, caay ko no tamdawan a taneng ko sapasowal niyam. O nano Fangcalay 'Adingo a nipakafana'an a sowal, a pasayra i no 'Adingoan a tamdaw a misahci to no 'Adingoan a so'linay a dmak. 14Nikawrira, o awaay ko 'Adingo no Kawas a tamdaw i, caay ka fana' cingra a milayap to sapafli no todong no tireng no Kawas a 'Adingo. Nawhani caay ka fana' cingra. Pakomaapaay cingra tonini. Deng o maaro'ay no Fangcalay 'Adingo a tamdaw ko mafana'ay to nika ci^poc nonini a dmak. 15O maaro'ay no Fangcalay 'Adingo a tamdaw i, pakahapinang to nika masamaan ko nika ci^poc no polong no dmak. Nikawrira, awaay ko pakahapinangay to faloco' ningra. 16Mato sowal a matilid i Fangcalay Cudad,
<<Cima ko mafana'ay to faloco' no Tapang saw?
Cima ko patadoay to faloco' Ningra saw?>> saan.
Nikawrira, kita o maaro'ay no Fangcalay 'Adingo a tamdaw i, iraay i titaanan ko faloco' ni Kristo.
Currently Selected:
1 Korinto 2: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
