1 Korinto 3

O Matayalay no Kawas

1Salikakaaw, so'linen ako a somowal kamo, o maaro'ay no Fangcalay 'Adingo cangra, caay ka saan kako a somowal i tamowanan. Nawhani o no tirenganho a pinangan ko pitooran namo. Saka, haen han ako o ka^mangayho i ci Kristoan ko faloco' a mitoor ko nika somowal i tamowanan. 2O hacolho ko sapakaen ako i tamowanan, caay ko 'atkakay a kakaenen. Nawhani caho ka fana' kamo a komaen to 'atkakay. Tahanini a caho ka fana' kamo a komaen to 'atkakay. 3Nawhani ma'inap, macacoli kamo. Caay hakiya ko pahapinangay konini to nika o no tirenganho ko pinangan namo a mitoor a matiya o 'orip no kalotamdaw? 4O sowal no roma namo i, <<I ci Pawloan kako,>> saan. O sowal no roma namo i, <<I ci Apolosan kako,>> saan. Tona mahaen ko dmak namo saka, caay ko malcaday kamo ato kalotamdaw saw?

5O maan ci Apolos? O maan ci Pawlo? O matayalay no Kawas kami. O mamikrid aca i tamowanan a papiti'er to Kawas. O pilahci aca niyam to niparocekan no Tapang i tamiyanan a tayal. 6O palomaay kako. O micfosay ci Apolos. Nikawrira, o Kawas ko palahaday tonini. 7Orasaka, o kakalimlaan i, caay koya palomaay ato micfosay a tamdaw. Deng oya palahaday a Kawas ko kakalimlaan. 8O malcaday ko mipalomaay ato micfosay a tamdaw. O nitayalan no kahaccaccay ko pi'arawan no Kawas a palifon. 9O kapot no Kawas kami a matayal. O omah no Kawas kamo.

O romasato, o nipatirengan no Kawas a loma' kamo. 10Matiya o matanengay a misaloma'ay kako a pakatayal to nipaflian no Kawas i takowanan a rocek. Kako ko patirengay to paranaan. Ta o tao ko patirengay to loma' i fafaed nonini. Nikawrira, o nana'onen no kahaccaccay ko dmak a patireng i fafaed nonini a paranaan. 11Nawhani, dengan ci Yis Kristo ko mipatirenganto no Kawas a malaparanaan. Saka, caayto ko papatirengen ko roma a paranaan. 12I fafaed nonini a paranaan i, ira ko patirengay to tada^kim ato ^kim ato tadamaanay a fokloh. Ira ko patirengay to kilang ato eli' ato 'asisiw. 13Ano maraod ko pisawkitan a romi'ad i, o mamahapinang ko nika masamaan ko nitayalan no kahaccaccay a tamdaw. Nawhani itiya toya romi'ad i, o namal ko sapilifet no Kawas a mihapinang to nika masamaan ko nitayalan no kahaccaccay. 14Ano nima a nipatirengan ko ma'osaway i, o mamilayap koya tamdaw to sapakaolah. 15Ano matodoh ko nipatirengan no nima i, o mamasipon koya tamdaw. Nikawrira, o mamatiya o masadakay nai namal cingra a mapa'orip.

16Kafana'anto namo, o Fangcalay Pita'ongan to Kawas ko tireng namo. O kamaro'an no Kawas a 'Adingo ko faloco' namo. 17Saka, ano cima ko miri'angay to Fangcalay Pita'ongan to Kawas i, o tatkopen no Kawas koya tamdaw. Nawhani o fangcalay ko Pita'ongan to Kawas a loma', o tireng namo ko nisowalan tonini a Fangcalay Pita'ongan to Kawas.

18Aka pisafana' to tireng. Ano ira i tamowanan ko citanengay kako sanay ko harateng to no aniniay a hkal a taneng i, o nika apa noya tamdaw ko nga'ay ta malaso'linay a citanengay cingra. 19Nawhani o taneng hananay no aniniay a tamdaw i, o maapaay a nengnengen no Kawas. Mahaen ko sowal a matilid i Fangcalay Cudad, <<Pakaynien no Kawas i pisa'fit no citangalay a tamdaw ko sakatefad nangra,>> saan. 20O roma a sowal a matilid i, <<Mafana'to ko Tapang to nika awa ko ^poc no harateng no citangalay a tamdaw,>> saan. 21Orasaka, aka ka lata'ang kamo to nidmakan no tamdaw. O nano Kawas a nipa'ayawan ko dmak namo a ma^min. 22Ano ci Pawloto, ano ci Apolosto, ano ci Pitiroto i, o niocoran no Kawas to mamipadang i tamowanan. Ano o hkalto, ano o 'oripto, ano o patayto i, o nipaflianto no Kawas. Ano i matiniayto, ano a irato a dmak i, o nano nipa'ayawanto no Kawas a ma^min konini. 23O ni Kristo kamo. O no Kawas ci Kristo.

Currently Selected:

1 Korinto 3: AMIS2019

Highlight

Copy