1 Korinto 11

1Pitodong kamo i takowanan a matiya o nipitodong ako i ci Kristoan.

O Losid a Mita'ong

2O kakahmekan ako kamo, nawhani, mararid ko nipiharateng namo takowanan ato nika 'imer namo a mitoor to nipatorodan ako i tamowanan a limo'ot saka, mahmek kako i tamowanan. 3Nikawrira, mangalay kako to sakafana'aw namo to nika o tangal no kalotamdamdaw ci Kristo. O tangal no fafahi ko fa'inay. O tangal ni Kristo ko Kawas. 4Saka, ano cikafong ko fa'inayan yo mitolon, ano ^ca i, yo pakimad to sowal no Kawas i, o mipakangodoay cingra ci Kristoan. 5Nikawrira, ano caay ka citapodo ko fafahiyan yo mitolon, ano ^ca i, yo pakimad to sowal no Kawas i, o mipakangodoay cingra to fa'inay ningra. Malcad to ma'is'isay ko fongoh ningra. 6Ano caay ka citapodo ko fafahiyan i, o pilceng to fokes ko nga'ay. O kakangodoan no fafahiyan ko pilceng ato pi'is'is to fokes saka, o nika citapodo ningra ko nga'ay. 7O pahapinangay to faco ato nika tadamaan no Kawas ko fa'inayan. Saka, yo mitolon, yo mipakimad cingra i, caay ka nga'ay a cikafong cingra. Nikawrira, o pahapinangay to nika tadamaan no fa'inayan ko fafahiyan. 8Nawhani caay ko nai fafahiyan a miala to sapisanga' to fa'inayan. O nai fa'inayan a miala to sapisanga' to fafahiyan. 9O romasato, caay ko saki fafahiyan ko pisanga' no Kawas to fa'inayan. O saki fa'inayan ko nipisanga' no Kawas to fafahiyan. 10O pa'ayaw no fafahiyan to coyoh saka, o cacitapodo cingra a pahapinang to nipihaklong ningra to fa'inay ningra. 11Nikawrira i tini i mitooray to Tapang i, o mamasasidama ko fa'inayan ato fafahiyan. 12Nawhani nai fa'inayan a miala to sapisanga' to fafahiyan. Malcad tonini, o nihofocan no fafahiyan ko fa'inayan. O nano Kawas ko sakaira no maamaan.

13O matatodongay ko nika ^ca ka citapodo no fafahiyan a mitolon to Kawas i sa'opo no mitooray hakiya? Haratengen namo konini. 14O nika kakaya' no fokes no fa'inayan i, o sakangodo ningra. Caay ko pinangan no dmak ko sakafana' namo tonini hakiya? 15Nikawrira, o nika kakaya' no fokes no fafahiyan i, o sakasalongan ningra a tadamaan. Nawhani o malotapodo no fafahiyan ko nika kakaya' no fokes ningra. 16Ano iraira ko pacoliay a tamdaw tonini a dmak i, awaay i tamiyanan ko matiniay a dmak, awaay i kalokiwkay no Kawas ko matiniay a dmak, haen han ako a paca'of.

O Saki Tapang a Lafi

(Matay 26.26-29; Maroko 14.22-25; Luka 22.14-20)

17Nikawrira, ira ko caay ko kahmekan ako a dmak namo. Saka, ira ko sasowalen ako i tamowanan. Caay ko sakaci^poc ko nika sa'opo namo, malasakasipon namo. 18O saka ccay i, yo masa'opo kamo i, ira ko malacidecidekay a dmak namo saan a matngil ako. Paso'lin kako to pinapina nonini. 19(O sakahapinangaw no so'linay a mitooray saka, o airaira aca i tamowanan ko matiniay a malacidecidekay a dmak). 20Yo malaccay kamo a masa'opo i, caay ko sakakomaenaw namo to saki Tapang a lafi ko nika komaen namo. 21Nawhani yo komaen kamo i, paytmek sa kamo a makaki'ayaw a komaen to nihawikidan namo a kakaenen. Saka, ira ko macahiway, ira ko malasangay namo. 22O nika awa no loma' namo to kakomaenan saw? Ano ^ca i, o padteng namo a mi^pec to kiwkay no Kawas ato nipipakangodo namo to pakoyoc a tamdaw haw? Maanen ako ko nika somowal i tamowanan? Hmeken ako haw? Caay. Caay ko kakahmeken ako konini a dmak namo.

23O nipakafana'an no Tapang i takowanan ko sasowalen ako i tamowanan. Yo mamapacakay ko Tapang ci Yis toya dadaya i, tatoy sa Cingra to ^pang. 24Ahowid saan i Kawas ta mipcih toya ^pang. Ta sowal sa, <<O todong no makinafalahay to saki tamowanan a tireng Ako konini, haenen ko piharateng namo i Takowanan,>> saan. 25Mahrek cangra a komaen i, haenen Ningra ko dmak a mitatoy to takid. Sowal sa ci Yis, <<O todong no rmes Ako konini. O lalowadan no fa^lohay a katatlekan konini. Ano minanom kamo tonini i, haenen ko pidmak a miharateng i Takowanan,>> saan.

26Orasaka, ano komaen kamo tonini a ^pang atonini a takid i, o patalahkalay kamo a paratoh to patay no Tapang tahira i piliyawan Ningra a tayni. 27Orasaka, ano patdo saan ko cima a komaen to ^pang ato takid no Tapang i, malcad to paacekay, mi^pecay cingra to tireng ato rmes no Tapang. 28O hahapinangen no kahaccaccay ko faloco' ato dmak no tireng, ta komaen to ^pang ato takid no Tapang. 29Nawhani ano caay pihapinang ko tamdaw to tatodong no tireng no Tapang i 'ayaw no nika komaen ningra i, malasakatfoc ningra ko nika komaen ningra. 30Tona mahaen ko dmak namo saka, 'aloman sato ko tadancaay ko tireng ato adadaay namo. Ira ko papinapina a mapatayay namo. 31Nikawrira, ano hapinangen ita ko nika caan ka tatodong ita i, kona caay ka tfoc no Kawas kita. 32O saka^caaw ka rapot ita a mapakapot i mafokilay to Kawas a tamdaw a mapastek i raraw saka, masti' no Tapang kita.

33Orasaka, salikakaaw ako, ano masa'opo kamo to sakakomaenaw to saki Tapang a lafi i, katatala kamo. 34Ano macahiw ko cima namo i, ka i loma' a komaen. Ta caay ka pastek kamo i raraw yo masa'opo kamo. O romaroma a dmak i, ano tayra kako i tamowanan i, itiya sato kako a mihapinang.

Currently Selected:

1 Korinto 11: AMIS2019

Highlight

Copy