Markga 8
8
1Hambeja worohana rokanaxjina, egi inke waruj junina, Jesus wironag warnira wakaragigorna, egi wawagena:
2Worohangre naj‐wawagijana, hambra daniha hinkishu uinege egi inke waruj juinarnige.
3Egi inke waruj‐hirani eojhireja howakere‐wagigigi naguregi hagi hokikurushag‐hirekjanegaja, egi woroha hari howaji wa’uanke.
4Egi wironag warnira hornigi‐hairena: Hajinja hisha waisgab horus‐wianaga wang‐nagre wainaj‐hiwahikjawishe mojainanegi?
5Egi wawigiwaxshana, horok’ina jarnaga hashiniwishe, egi wairena: Shagowi.
6Egi wankshigra mainja minag wa’shina, egi horok’in shagowianka warussana, egi wainabshana, egi warujhena, egi wironag warnieja wawogarna jowehireja wawagishuirekjege, egi wankshignanka jowehireja wawagishuirena.
7Egi ho‐xununigra jarnagi harninena egi wainabshana, egi shige jowehireja wawagishu wa’shina.
8Egi waruj‐hirena egi wainaj‐hirena egi waruj horujhera stowahiregi napara shagowi hota‐hirena.
9Egi warujanka harnajra hogihixete‐jopshana, egi kerewagigina.
10Egi higuana waj‐hisha eja hominagshana, wironag warnira wakarakishu egi Dalmanutha hijejeja hina.
11Egi Pharisera hajirena, egi wigiwax‐hajiarairena, washa woijanti wangregi howajihi rogigu‐hirena, gishja.
12Egi nihasigina naxirag harnira egi wena: Jagu‐u wankshighoi de‐e washa woijanti horninankshe? Hisgexjina hinigawina, wankshighoi de‐e inke washa woijanti hok’uiranikjanena.
13Egi wat’unarena egi shige waj‐eja hominag‐anaga teagra howarena.
14Egi wironagra waisgabduj harnirera wakikununinena egi waj‐eja inke hiraijerani horok’ina hishankira harninena.
15Egi wawagena, wena: Hirakara‐uwine, Pharisera winawohi harninera hinakewe khiwianje, egi Herodes winawohi harnira hinakewe khiwianje.
16Egi hokikit’airena, wairena: Inke waisgabduj harniwinina esge wegaja.
17Egi jaja Jesus wawiperesgi, wawagena: Jagu‐u horakikit’awishe, inke waisgabduj hashiniwinigi? Jasge kheni hinapereswinishe? Shige inke hashjawinishe? Najge washiniwira higu shjanankshe?
18Hishjasu nijuwianaga egi inke wirashjawinishe? Egi nux‐hopox nijuwianaga egi inke winanaxguwinishe? Egi inke wawewi shuruxurugwinishe?
19Jaja waisgab‐horok’ina saja dujhera hogihixete‐saja hikiweninera, hoxjugra napara jarnaga hoixji storawishe? wagairena: Nup‐hashana.
20Egi jaja shagowina hogihixete‐jop hikiweninera hoxjugra napara jarnaga hoixji storawishe? Egi wairena: Shagowi.
21Egi wawagena: Jasgerawigaja inke hashjawinishe?
22Egi Bethsaida eja hina, egi wang hishjarning hisha hagarni‐hahirena, egi hikiokje gitairena.
23Egi wang‐hishjaninkjega airutianaga egi jhinag jangeja howaninena. Egi jaja hishjasueja hashogi egi nabra (nassueja) hatumbshana, higiwaxshana, washara hisha hajaguni higena.
24Egi woruxujshana, egi wena: Wankshig hajarna na hikisgaire maninankshana.
25Hageja shige hishjasura higikiorna egi woruxuj gigina egi rushjana, egi washara harnaj warushaxji wajarna.
26Egi eojhieja howakere‐gigina, wagena: Inke jhinageja howaranine, shige inke jhinageja hisha hogiragnianje.
27Egi Jesus rena egi wironag warnira, Kesarea Philippi jhinag harnieja hokawairena, egi harahairau wironag warnira wawigiwaxshana, wawagena: Peshe wineshe wankshigra arnankshe?
28Egi hornihairena, John Niwawaxunga, eshi hota wairena Elias, egi hijanera wairena Prophetra hisha nineshe airena.
29Egi wawagena: Eshi peshe wineshe hishawishe? Egi Peter horniharna egi wagena: Kristus neninegaja.
30Egi warogixina inke hisha hogirag‐hiranikjege.
31Egi washa wagigus‐jirena, Wankshig‐hinigra jasgegi washara roha hawekjanena, egi xetera egi nabhoruxaj hirukana hungra egi wowagax‐hiperesra wajis‐hirekjanegi, egi d’ehirekjanegi egi hamb hitanihainja niaimbkjanena.
32Egi hoit’e she‐e ega harusharani wena. Egi Peter rusanaga, egi rogixijirena.
33Eshi jaja hijopahi nashingi, egi wironag warnira woruxujgi Peter najisgina, wena: Satanra hageja howeune, Maura washa warnira inke wowewina eja niniharnina, eshi wankshignagre washa warnineja.
34Egi jaja wankshigra wagigogi egi wironag warnira hishge, wawagena: Higu peshe hiroinaikjegi, jasgegi kikurushjarehikjena, egi naramihera kurus‐anaga egi hiroinaikjena.
35Higu peshe wankshig‐hoira niamb‐khingi wankshig‐hoira xawarni‐karagikjanena, egi higu peshe wankshig‐hoira xawarni‐karagigi rash harnira hawau egi woragphira hawau e wankshig‐hoi harnira niamb‐karagikjanena.
36Egi wangrisha managre harnaj ruxurugkhi jagu‐ophi howekjaneshe, egi naxirag earnira xawarnihigi?
37Egi wangjega naxirag earnira jaguisha hakja hikuruwinashe?
38Higu peshe hiroigishikhi egi hoit’e warnira, de‐e wankshig‐hoi khikanagrushe raniwina egi wowong raniwina, Wankshig‐hinigra hishge wawirogishig‐gikjanena, jaja waxopiniwarajire wakanjangra wakishu Hianjra gloria harnieja gigi.
Currently Selected:
Markga 8: WIN
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1907.
