Matthaiga 27
27
1Jaja haini hakirigi nabhoruxaj hirukana hungra egi wankshigra xete warninera harnaj Jesus haehirena, d’ehirekjege.
2Egi rusgij‐hiranaga nigeharni‐howarairena, egi mowagax hirukanara Pontio Pilato eja rushjarehirena.
3Egi Judas, e himanagra, jaja Jesus d’ehirekjanera hajagi, najgerakarategshana, egi shura‐sgara kerepanadanianka nabhoruxaj hirukana hungnanka egi xetenanka wagarnijina.
4Wena: Inke phini hagaja, wai‐phisha himantagra. Egi wairena: Jagu niauwishe? Hajash’unajegaja.
5Egi shura‐sgananka wohokhuho‐jhixeteja wot’unena, egi nigeowakaranaga egi rarnaga egi doxorushga kikuna.
6Egi nabhoruxaj hirukana hungnanka shura‐sgara warus‐hirena egi wairena: Shura de‐e Maura shura‐hogishuwieja hoshura woehieja roxirena, wai hiruwinege esge.
7Egi karagus‐hirena, egi rexoro‐rexunga max‐harnira shura she‐e higiruwinena, hijahi herera eja waxairekjege.
8Esge max she‐e wai‐maxra higairena hamb de‐e hipa.
9Egi Jeremias prophetra jagu arnihera exji herena, wena: Egi shurasga kerepana‐danianka rus‐hirena, hoikisgera E hikisgehirera, e Israel ninkjangeja ruwinera.
10Egi rexoro‐rexunga max harnira higiruwinena, Hirukanara shesge ningigina.
11Egi Jesus mowagax hirukana joweja nashina. Egi mowagax hirukanajega wigiwaxshana wena: Judra hung harninera nenineshe? Egi Jesus wagena: Hisharajane shesgajena.
12Egi jaja nabhoruxaj hirukana hungra egi xetera washinaraj hiregi inke wagixabnina.
13Egi Pilatus wagena: Inke nanaxguni‐rajeshe washara jarnaga hiranirajnagre?
14Egi inke hoit’eisha rareshge gixabnina, hirukanajega reshge khorera rokana hina.
15Woruj‐eja hirukanajega waushununa hornassairera hisha wankshignanka wagirushja rehinana, hajanjega giphinega.
16Egi shejananegi hijaira wowonk hornassaireisha hijarnakshana, Barabbas higairena.
17Esge jaja stoiregi, Pilatus wawagena: Hajanjega ningitushja‐rehawigi raiphiwinashe? Barabbas nigeshge Jesus, E Kristus higairera.
18Hiperesjena khiwassainege esge rushjarehirera.
19Egi jaja Pilatus (waehi) waminageja minagkhi, hijawina woraghisha hirajihina, wena: Wang phi she‐e inke washara hisha giunianje, washara rohaxji hirawajena hamb de‐e E hiahantera.
20Eshi nabhoruxaj hirukana hungra egi xetera worohanka waraxurughirena Barabbas e tairanaga egi Jesus d’ehirekjege.
21Mowagax hirukanara horniharna egi wawagena: Nup hajawine hajanjega e ningitushja rehawigi raiphiwinashe? Wairena: Barabbas.
22Pilatus wawagena: Jesus jasge hagigikjaneshe E Kristus higairera? Harnaj wagairena: Naramiheja haisaraj‐wagigire.
23Egi mowagax hirukanajega wena: Jagu‐u, jagu wowong hisha ushe? Eshi hiraijera uwainena, wairena: Naramiheja haisarajwagigire.
24Egi jaja Pilatus inke washa raxurugnira hajagi, eshi hiraijera mashja airege, ni russana egi nabra kurusharna worohanka jowehireja, wena: Wang phi de‐e wai harnieja inke ne hiaishananina, hajash’u‐harajawingaja.
25Egi wankshigra harnaj hornihairena egi wairena: Wai earnira wangashu‐hirawina egi ninkjang hiwarniwina.
26Egi shejanagi Barabbas wawagi‐rushjarehina. Egi jaja Jesus washa pahi higipsinsh rushjanegi, wagirushjarehina naramiheja haisaraj‐hirekjege.
27Egi mowagax hirukanara manape warnira Jesus rushiranaga jhihoxorojikeja harniokawairena, egi manape hornihera harnaj eja stoirena.
28Egi wainira wagirushoroj‐hirena egi waini shuj hisha hogiwaxug‐hirena.
29Egi jaja na‐pahi hirakhiweja hung wokanag hisha urushjainegi, nassu hihageja hagikanag‐hirena, egi raxgeisha nabhoishoroija harnigigirena. Egi jowehieja huporohiminaghirena, egi igixja wairena: Hinikaragina Judra hung harninera.
30Egi hashoirena egi raxgeaka rus‐hiranaga egi nassueja hojinena.
31Egi igixjara rashjainegi hageja wonashira girushorojhirena egi waini ewarnira wogiwaxug‐hiranaga egi nigeharnihowarairena naramiheja haisaraj‐hirekjege.
32Egi harahairau wang Kirene‐eja hereisha hakijairena Simon higairera, e hiniharninarnaga naramihera gik’ingigirena.
33Egi jaja ma‐nige eja hahiregi Golgotha higairera, wankshig‐pa‐hushereg hominagra e wairena.
34Egi ninash hok’uinena pisda hirokishuire rajgankjege, egi jaja rajgagi inke rajganina.
35Egi naramiheja haisarajhiregi waini warnira khiruje wakhinena, hushereg gishox uinena rewahire: Prophetra jagu airanihera exji herekjege: Waini warnira khiruje wakhinena egi wonashi harnira hushereg gishox‐u rehirena.
36Egi minag‐hiranaga hirakaranakshana.
37Egi nassuhi wangeja hiraraj‐hirera wagaxankshana: De‐e Jesus herena Judra hung harninera.
38Egi wamanukera nupiwi hakishu naramiheja haisaraj‐hirena, hisha hoishorohieja nankshana egi hijanera hoirajgehieja nankshana.
39Egi jarnaga ehahiowega washingagarnankshana, para hirunanahirena.
40Egi wairena: Wohokhu‐hojhixetera maisinsh‐ranaga egi hambra danihangi shige sh’u‐shurushjanashe hishera, niamb‐khine, Maura Hinigra neninegi, naramiheja d’ambre.
41Egi hishge nabhoruxaj hirukana hungra igixjarnankshana, wowagaxhiperesra wakishu egi xetera, wairena:
42Hijanera niamb wahijegaja, exji inke niambkhiruxurugnina. Israelra E hung harninegi, naramiheja d’ambgigiwire, egi harnaxgunkjawina.
43Maura hinashina, shegunegi girushjane‐higigiwire, gijire rogunankhi. Wena: Maura Hinigra newinena.
44Wamanukenanka hishge, e naramiheja wakishu haisarajhirera washingagar‐nankshana.
45Egi howagix hirakewe‐hainja hokawas‐shana managre harnaj, howagix hishanki‐jushgunieja hipa.
46Egi howagix hishanki‐jushguni‐hainja Jesus mashja uwana, wena: Eloi, Eloi, Lamma Sabaxthani! Deshesge ewairena: Mau‐harnixji, Mau‐harnixji, jagu‐u hinat’ushereshe?
47Hota hijarnashinankhi, jaja she‐e naxguinegi wairena: Wang de‐e Elias gigornankshana.
48Egi higuana hisha nuwang‐anaga egi sponsh hisha rusanaga egi ninashra hoixji hoshurna, egi raxgeja hakanag‐anaga egi rajgangigina.
49Hijanenanka wairena: Shegunag‐hiwire, horuxuijhawina Elias jianaga niamb‐hikjanegi.
50Jesus, jaja shige mashja uwanaga rashjangi, d’ena.
51Egi horuxujre, wohokhu‐hojhixeteja hagijara nupihi hogasrerana, wangeja hugi mainja hipa. Egi mara hixgana egi inixetera gshabrairena.
52Egi wanaxi homigra gihas‐hirena, egi wakanjangra rowarninera rohaxji nanankhi kikawa‐ahirena.
53Egi wanaxi homingeja hihinab‐hirena hakiha‐wankshigianaga hageja egi jhinag wakanjankeja hoikewena, egi roha jantingikhina.
54Egi jaja manape hungjega egi wakishu‐unjegi Jesus hirakara, mara hixgangi hajairena egi washa jagushana uinegi, naxirera rokana hirena, wairena: Hisgexji de‐e Maura Hinigra heregaja.
55Egi hinugra roha hija‐uankshana hari woruxuj‐nankshana, e Galilea‐eja Jesus hakishu hironag howajiregi, wagirananke.
56Hisha Maria Magdalena herena, egi Jakob egi Joses hiunihirera Maria, egi Sebedai ninkjang warnira hiunihirera.
57Egi jaja hoxjarna hakirigi, wang hitajeisha jina Arimathea eja hereisha Joseph higairera, e hishge Jesus hironag warnira hisha herena.
58E Pilatus eja hina egi Jesus ro harnira tarna. Egi Pilatus rora hok’u wash’ina.
59Egi jaja Joseph rora rusgi, linen waipere sgexji hirowejana.
60Egi warnaxi‐homig jeg earnieja hot’umbshana, e k’era inieja egi warnaxi‐hoshuaka jhirobra ini xeteisha eja hawanana, egi nigeowakerena.
61Egi Maria Magdalena eja jena egi Maria hijanera warnaxihoshuaka joweja minagnankshana.
62Egi hoikoroho‐hambra hereanaga haininegi nab‐horuxaj hirukana hungra egi Pharisera Pilatus stoirena,
63Wairena: Hirukanara, hiapereswina waishjanke she‐e niambjanegi wena: Hambra danihangi shige hakikawa‐ankjanena.
64Esge warnaxihoshura hamb‐hidanihainja hipa hirakara washire, nigete wironag warnira haheregi hahiranaga manu hirege, egi wankshigra wawagairekjanena: D’arnagra eja niamb howakirina, egi woishjanke hirowagnira hiraijera shishiggikjanena jegeja herera hiroheg‐hirena.
65Pilatus wawagena: Wirakara shuruis‐jawina, rawianaga egi jasge hishuruxurugwigi hirakarawire.
66Egi harairena, egi warnaxihoshura hirakarawagigirena, egi inira haixiri hirena, egi wirakarara hijawakererena.
Currently Selected:
Matthaiga 27: WIN
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1907.
