Matthaiga 26
26
1Egi herena jaja Jesus harnaj horag rashjangi hironag warnira wawagena:
2Hirapereswina nupahangi Pasxa worujra herekjanera, egi Wankshig‐hinigra himarag‐hirekjanena naramiheja haisarajhirekjege.
3Egi nab‐horuxaj hirukana hungra egi wowagax‐hiperesra egi wankshigra xete warninera nab‐horuxaj hirukana hungra Kaiaphas higairera jhixete‐hojhieja stoirena.
4Egi karagus‐hirena kerej‐hiranaga Jesus rus‐hiranaga egi d’ehirekjege.
5Eshi wairena: Inke hamb‐warujeja herenikjena, inke wankshigra hiwarupurunikjawige.
6Egi jaja Jesus Bethania‐eja jigi, Simon leper‐unga hojhieja hokewena.
7Eja hinugisha hirajina alabaster kog‐hisha wikinipanaphi hoshu harnijina egi nassueja hawaxuna, warujnank’u.
8Egi jaja wironag warnira hajairegi inke giphini‐hirena, wairena: Jagua‐wau washa de‐e hoinige xawarnihishe?
9De‐e roha hiruwianaga egi wanajojaisgeja woga phingaja.
10Jaja Jesus hiperesgi, wawagena: Jagu‐u hinugnagre najgewojirawishe? Wore phi hingiu waunakaja.
11Wanajojaisgera hoishib warakishu sh’unkjanihawina, eshi ne inke hoishib hinakishu sh’unikjanihawina.
12Wikini de‐e ro‐harninegi hingiwaxune, hoxaire harnina wagiu wauna.
13Hisgexjina hinigawina higu‐hajinja managre eja woragphi de‐e wihokhuinegi, hinug de‐e jagu une hishge horag‐hirekjanena wewirarnihekjege.
14Egi nup‐hashanananka hisha Judas Iskariot higairera, nab‐horuxaj hirukana hungra wirahina,
15Egi wawagena: Jagu hunak’uwinashe, himanigitagwigi? Egi shurasgara kerapana‐dani hok’uinekje higairena.
16Egi epa himanag houphi hornirena.
17Egi waisgab winawohi rokani worujra hamb jornira heregaja wironagra Jesus hirajirena, wagairena: Hajinja Pasxa worujra hirushja ningigikjanihawishe?
18Egi wena: Jhinageja wang‐hishajera eowarawire egi wagawiaje, Hirukanara wena, howagix harnira hiwusunsh jina, horajhieja Pasxa worujra haunkjena wironag warnira wakarakishu.
19Egi wironagnanka uinena, jasge Jesus hiwashira egi Pasxa worujra hirushjahirena.
20Egi jaja hoxjarna hakirigi, nuphashanara wakishu minagshana.
21Egi warujnank’u wena: Hisgexjina hinigawina, hisha himaisharaikjanihawina.
22Egi najgerategra rokanainena, egi jarnaga harnagwiga wage‐hajiarairena: Hirukanara newineshe?
23Egi horniharna egi wena: Hisha wasgeja hiroshu hakishu haungi e‐himairaikjanena.
24Wankshig‐hinigra wowagaxeja jasge wagaxhirera eowakshana eshi hawekjanena wang‐jagura hisha Wankshig‐hinigra himanakhi, wang she‐e phi howarnana inkaga wankshig‐iningishi.
25Egi Judas, e himanaikjanera horniharna egi wena: Hirukanara inkeshi newinenishe? Wagena: Hishare shesgena.
26Egi warujnank’u Jesus waisgabduj russana egi wainabshana egi rujhena egi wironagnanka wawogarna egi wena: Ruswianaga egi rujwire, de‐e ro‐harnira herena.
27Egi niwirajgara russana egi winab‐anaga egi wawogarna, wena: Harnaj rajgawine.
28De‐e wai‐harnira herena Testament jeg hauna. E roha xu‐wagigirena, washa woishana wagit’une.
29Eshi hinigawina, epa inke habsinsh‐hueja hasni dajganikjanena, hambeja epa jeg harnikishu dajgankjanihawina Jajiga hungma harnieja.
30Egi jaja nawa rashjainegi, Oliw‐xeja howarairena.
31Egi Jesus wawagena: Hahe de‐e harnaj watoiragixikjanihawina deshesge wagaxankshana: Jhasga hirakarara wajinkjanena egi jhasga hornihera mokhiekjanena.
32Eshi hakikawa‐anaga hageja Galilea mowagaxeja jornigini hagikjanihawina.
33Peter horniharna egi wagena: Harnaj watornigixi hireshge inkaga watoaxinikjanena.
34Jesus wagena: Hisgexjina hinigena, hahe de‐e kheni bagawaxge wangra xagni daniha khiba‐hinakhinkjanena.
35Peter wagena: Harnikishu jekjanegishge inke khibanikinikjanena. Hishge wironag hijanenanka harnaj shesge airena.
36Egi max‐hisha Gethsemane higairegi eja Jesus wironagra wakishu hina egi wawagena: Eegi minagwire, gojaira hagikaraj tekjanaregi.
37Egi Peter egi Sebedai hinigwahira nupiwi wakishurena, egi najgerategra rokanajirena egi warnaira mashja hirawasunsh‐shana.
38Egi wawagena: Naxirag harnira najgetegra rokanana jowe d’ewinana, eegi hiwushawire, egi hikhi hinkishu uwine.
39Egi jowexjinig hiraijera howarena, egi hishjara mainja herehi himpshana egi gikarajra wena: Jaji, ruxurugphingi, niwirajga de‐e hinxagjena egi inke woshga harnira herenina eshi hashinira herena.
40Egi wironagra wirakirigaja egi nanank’u wiena, egi Peter wagena: Jasgegaja inke howagix‐hisha hikhi hinakishu sh’uwinishe?
41Hikhiwine egi gikarajwire inke washa woishana uwahieja horakit’u‐sharanikjawina. Naxiragra hisgexji giphinangnunige eshi rora inke mashjanina.
42Egi shige hinupahana rena egi gikarajgi wena: Jaji, niwirajga de‐e inke hinxa‐ruxurugnigi, jasgegi dajgangishana herenagi, woshga hashinira haunana.
43Egi kirigaja shige nanank’u wiena, hishjasu warninera shjuwara hoixjinanke.
44Egi wat’unarena egi shige nigiowarena egi hitanihara gikarajshana, shige hoit’era e waena.
45Egi wironag warnira wirakirina egi wawagena: Nawinane, egi xgasigiwire. Horuxujwire howagixra hiwusunsh jiginina egi Wankshig‐hinigra washa woishana ura nab warnineja horushjarehirekjanena.
46Nashiwine, hinekjawina, horuxujwire hiwusunshjiginina himainaikjanera.
47Egi hit’at’ajau, horuxujre, Judas jina nup‐hashanara hisha herera egi hornihexetexji hakishu jina, wigijgux egi wiwapox harni, nabhoruxaj hirukana hungra egi wankshigra xete warninera e huwagigire.
48Egi hisha himanaikjanera wijanti wagiungi wena: Hisha i‐wakhiwankjanera erena, shja harukoswiaje.
49Egi higuana Jesus hirajina egi wena: Hirukanara hinikaragina, egi i‐okhiwankshana.
50Egi Jesus wagena: Hijakoronira, jagu‐u wash’unajishe? Egi hajirena egi Jesus harukos‐hiranaga egi rushirena.
51Egi horuxujre, Jesus wakishu unjega hisha, ara wajigrehianaga egi wigijguxra kurusanaga egi nabhoruxaj hirukanara warnihi warnira hisha hojina egi najawara hisha gixguna.
52Egi Jesus wagena: Wigijgux hashinira hotumbeja shige hotumbre, jarnaga wigijgux rusgi wigijgux hit’airekjanege.
53Inke shegunegi Jajiga khijire hashi duxurugniguni hirareshe? Egi higuana waxopiniwarajirera Legionra nup‐hashana hiraijera jingiginana.
54Eshi wowagaxra jasgehianaga exji herekjaneshe, jasgegi herekjanena.
55Howagixeja Jesus worohanka wawagena: Wamanuke hiraji hinagish’uwishe, wigijgux egi wiwapox hashini rajiwi hishgurajiwigi? Hambga harnikishu mianag hajena wohokhuhojhixeteja washa ningiguswi egi inkaga hinshurukoswinina.
56Eshi washa de‐e harnaj uinare, prophetra wowagax warninera exji herekjege. Egi shejananegi wironagra harnaj t’unairena egi gias‐hirena.
57Egi Jesus harukos‐hirera nabhoruxaj hirukana hungra Kaiaphas eja harniahirena, hajinja wowagax‐hiperesra egi xetera hostonankhi eja.
58Eshi Peter hari hironagshana, nabhoruxaj hirukana hungra jhixete harnineja hina, egi hijokewena, egi warera wakishu minagshana, jasge hinankhi hajakjege.
59Egi nabhoruxaj hirukana hungra egi xetera egi waehira harnaj Jesus wihohi woishjanke hirakira horninankshana d’ehirekjege.
60Eshi inke washa hieranina. Egi wihohi woishjankera roha jinunige inke washa hieranina. Hirowageja wihohi woishjankera nupiwi jina,
61Egi wairena: De‐e wena, Maura wohokhuhojhi‐xete harnira maisinsh hatuxurugshana egi hambra danihangi shige hautushjanana.
62Egi nabhoruxaj hirukana hungra nashina egi Jesus wagena: Inke waragi‐xabnishe, de‐e jagu hinigarnagre?
63Eshi Jesus inke xabnina. Egi nabhoruxaj hirukana hungjega horniharna egi wagena: Wihohire Mau niambra jowehieja, hungiragwire Kristus ninegi Maura Hinigra.
64Jesus wagena: Hishare shesgena. Egi wanigena, epa Wankshig‐hinigra hashjakjanihawina homashjara hoishorohieja minagnainkjanena, egi wangregi maxiwieja jikjanena hashjakjanihawina.
65Esge nabhoruxaj hirukana hungjega wainira kurugas‐shana, wena: Maura raxjashgunina, jagu‐u hijaira wihohi hiunkjawishe? Horuxujwire, Maura raxjashgunira hinaxguwingaja.
66Jagu hirarawishe? Hornihairena egi wairena: D’ehire phingaja.
67Egi hishjara hoshoirena, egi nab‐ruporog hirojinena egi hijanenanka nab‐ruparas hirojinena.
68Wairena: Prophet‐wiwine Kristus neninegi peshe waushe hornijinga?
69Egi Peter jhixete hakohieja minaganankshana, egi hinugisha hirahina wena: Hishge ne‐hisha ninena Jesus Galilea‐eja herera hakishu uinera.
70Eshi jowehireja khibakhina, wena: Inke hiaperesnina jagu hishegi.
71Egi jaja jang‐jhioxoro‐jhikeja higi, hinug hijaneisha hajagi egi hijarnankhi wawagena: Wang de‐e hishge Jesus Nasareth‐eja herera hakishu una.
72Egi shige khibakhina wihohi, inke hiaperesnina wang she‐e.
73Egi hagregi hijanashinankhi hirajirena egi Peter wagairena: Hisgexjingaja hishge ne hisha ninena hoit’e hashinira wijantina.
74Egi washoshishig howe rokigujirena egi wihohina wena: Wang she‐e inke hiaperesnina, egi higuana bagawaxge wangra xagshana.
75Egi Peter Jesus hoit’e harnira wewina, E wagena: Kheni bagawaxge wangra xagni, daniha khibaina‐khinkjanena. Egi hihinabanaga egi xagra rokanawena.
Currently Selected:
Matthaiga 26: WIN
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1907.
