Hoixgara 27
27
1Egi jaja wajowe Italia‐eja wawatekjawi hirarawira, Paulus wogairena egi hornassaire hijanera hisge, hisha Julius higairera eja Augustus manape hornihe harnieja, manape hung hisha herena.
2Egi waj‐hisha eja homianagwina Adramitium‐eja howajisha, patire‐hawina, Asia hijejera hahi wawekjawi wagiuwina. Egi Aristarxus higairera, Makedonia wankshig hisha Thessalonika‐eja hereisha hinkishu rawina.
3Egi haininegi Sidon‐eja hahiwina. Egi Julius Paulus phingigina egi hijakorowahieja howaregigina, wagirairekjege.
4Egi jaja eja patire‐hawira Kiprus horajgera wawawina, mahaxjinge esge.
5Egi jaja wajowe Silikia egi Pamphilia tejara hahi wawawina Mira‐eja hahiwina, Likia jhinag eja hereisha.
6Egi eja manape hungjega wajisha hiena Aleksandriaeja hereisha, Italia‐eja howarahegi egi eja hushuwina.
7Egi jaja hambra roha xerenig hauwina Knidus hiwusunsh hajangere hahiwina maha‐hauwingejini Krete horajgera wawawina Salmone hikijara.
8Egi haixara wojexina, wauni phira higairera eja hahiwina, Lasea jhinagra hiwusunsh‐eja.
9Egi shegunegi hamb rohaxji uinena egi shegunegi wajowera nuwawangesgena, hantaginaj houna haixagihige, esge Paulus washa waraperessana.
10Egi wawagena: Wangra hajharna, wajowe hikiware de‐e washa wangaishgakjanihawina egi woxawarnira rokanakjanena, inke hokikshuagreshana hereni egi wajra, egi shige wankshig‐hoi harniwira.
11Eshi manape hungra hirussawira egi waj harninanka hiraijera warnaxguna, washa jagu Paulus e‐ga hak‐kererena.
12Egi wauni de‐e inke eja hamani khi houphinige, esge horohana shegu rera e giphinena, ruxurugphingi Phenikeeja hahina’inekjege egi eja hamani khinekjege. E Kreta waunisha herena, e wiorojonje wioire sanig eapahi minagshana egi wioweshguni wioire sanig eapahi minagshana.
13Egi jaja jowexjinig re‐kuhuhigi, jasge rogunera ruxurughirana hirairena eja watire‐hirena, egi Kreta hirawakarahera howairena.
14Eshi inke s’ini maintajehi xete hikipa jina Euroklidon higairera.
15Egi jaja wajra hawajera egi inke maintajehieja u‐ruxurugnina hoikara hagigiwina.
16Egi wij‐isha hiwusunsh hahiwina e Klauda higairena, warera rokana wajra wajeja howajihu wahira.
17E jaja hijowa‐jiahuirera, wagijire wiuinena, wajra rusgij hirena, egi pusake‐horussuwu hokit’une nakawairege, esge wiroixobra warushib‐hirena, egi shesge hoikarakhinena.
18Egi jashja hirawera roikanawina haininegi wajra haha‐hawina.
19Egi hamb hitanihanigi waj‐wirok’una nige‐wat’untawina.
20Egi jaja hambra roha wira egi shige wiragoshgera inke jantinanina egi inke jashja xunu wawawinina, woinashi horniabra harnaj shegijawina,
21Egi s’ixji inkaga waruj hiranina, Paulus horoghireja nashina egi wena: Wangwira, harnainaxguwigajeregi, inke Kreta eja hihuwininana egi washokishga de‐e inke hinuxurug‐wininana egi woxawarnira.
22Egi shegunegi khirukheg nishiwina inke wankshighoina hisha ningixawarninikjanihawina, wajrashana.
23Hahere Maura waxopiniwarajire harnira hikijaharegi nashina, hajinja winera, egi E harnaxgura.
24Wena: Paulus inke naxiranine, Kaiser jowehieja harnini hahirekjanena, egi horuxujre Maura harnaj wornik’una jarnaga wajowe harnikishu ura.
25Esge wangwira khirukhegwire, Maura harnaxguna, jasge hungirag hirare shesgekjanena.
26Eshi jasgegi wij‐isha hinahikjanihawina.
27Egi jaja hahera kerepanaishanaga‐jop‐hashanahara jina, egi Adria‐regi hokiwagsha hihiwina, hahe kissagregi waj‐hirukanara manige hiwusunsh hahireguni hirairena.
28Egi gijgairena, egi fathomra kerepananup hierena. Egi jaja jowexjinig hiraijera howa‐hiarairegi, shige gijgairena egi fathomra saja‐hashana hierena.
29Egi naxirairena ini hawajabhirege hirairege wirasawarehira jopiwi waj‐shinjeja niot’unairena, egi hambsheshi hirairena.
30Egi waj‐hirukanara jaja waj‐xununigra teja wot’umbhiranaga gias hikorohoirena, waj‐joweja wirassawarehi hot’une kik’unankshana.
31Paulus manape hung‐jega egi manapera wawagena: Wang de‐e inke wajregi uinanigi inke niamb shuruxurugwininana.
32Egi manapenanka wagina waj‐hiroishgera mawax egi shibre hirena.
33Egi hamb hakirigi Paulus harnaj waruj warnagi‐ina, wena: Hamb de‐e hamb kerepanaishanaga‐hijop‐hashanara herena harapewianaga egi hantaraginajwi inkaga warajwini.
34Esge naixjira warajwisheshi, de‐e himanishjawinana, jarnaga raniwira nassu washiniwieja najura hinkisha ningishib‐ranikjanihawina.
35Egi jaja deshesge e‐gi, waisgabduj russana egi Maura wainginapshana jowehireja, egi jaja rujhegi ruj‐jirena.
36Egi harnaj khirukheghirena egi hishge waruj‐hirena.
37Wankshigra hogihinup‐anaga‐kerepana‐shagowi‐anaga‐hakewehashana harniwina, waj‐eja herera harnaj winewira.
38Egi jaja wainaj hirera wajra haha‐hirena egi waisgab‐poroporora tejainja wot’unairena.
39Egi jaja hambra, mara inke hiperes‐hiranina. Eshi hoiksheg hisha hajairena moga hokushinig juankshana, eja wajra howairehi nainena ruxurugphingi.
40Egi jaja wirassawarehira nieja womawax‐hiregi egi hirussawi hiuna rushgairena egi wiroixob‐jowera waainena, maintajehira hakira, nijejera hapahina.
41Egi nige tejara agkhi heregi eja hagirena eja wajra harasi‐hirena egi jowera shja‐hinakshana egi inke hixga ruxurugnina, eshi waj‐shinshra jashja boshena.
42Egi manapenanka hornassairera d’ewahirekje hirairena, inke hisha nimp‐anjinaganaga khishib‐nikjege.
43Eshi manape hungra Paulus niambhi‐nainena, rushag wahirena jagu hirairega, egi u‐washirena jarnaga nimp ruxurugkhi jorni tejainja howahiarairekjege egi hak’ukhini hirekjege.
44Egi hirotara naparas hiuinekje egi hota waj‐hoishishish hiuinekje. Egi shesgehiranaga moroija harnaj hak’ukhini hirena.
Currently Selected:
Hoixgara 27: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
