Hoixgara 26
26
1Egi Agrippa Paulus wagena: Ne‐kikarashig ningigirena. Egi Paulus ara wajigshana egi kikarashigshana.
2Wogishawa harniguni hiarena, hung Agrippara, hamb de‐e joweraregi ne hakikarashigkjanege esge, washa jagushana Judra hirairajnagra hihekjanena.
3Hiraijeraxjina Judra woshgara egi woiwax harninera harnaj horaijgusra hiaperesge esge. Esge ningitarna warnaiserej hiu harnaigixgune.
4Hixununegi woshgara jasge hara Judra harnaj hiperes‐hirena, jegeja wankshig warnira horogeja hauna Jerusalem‐eja.
5E jeghojikereja hinperes‐hirena, egi horag hiranana religion harniwira woinjabra rojaxji hiaura Pharisee wankshig‐haina.
6Egi shegunegi woehi joweregi nashi hajegaja woinashira hawau Maura hianj‐hiwahiwira wamangirajra.
7Wamangiraj de‐e wankshig howajehi kerepanaishanaga‐nuphashana harniwira jikjane hirairege, Maura harnaxgura hashakji hirena hambra egi hahera hirassa hiuinena. Woinashi de‐e hawau hung Agrippara Judra washinairaj‐hirena.
8Jasgegaja washa de‐e inke harnaxgu phini hiranash’iwishe Maura d’era kikawa‐a wahi ruxurugra.
9Nishge shesge hiarena, washara roha Jesus Nasaretheja herera rash harnira hagikira phiani hiarena.
10Deshesge Jerusalem‐eja harna, egi wakanjangra roha jhi‐hornassena, homashja nabhoruxaj hirukana hungeja dusanaga egi jaja d’ewahirega wakhira hiat’eshununa.
11Egi dejanki hawewaharna, wohokhu‐hojhira harnaj, egi hiniwarnianaga raxjashguni waharna, egi wajexira rokana wagikhina, jhinag hijahirashge hipa waiaishanana.
12Hauanjanegi Damaskus‐eja wawatahau homashja harnianaga egi ushira nabhoruxaj hirukana hungeja hotusanaga.
13Wirarojanjegaja, hungra nagueja hohamb hajharna wangregi howaji, hambwi hohambra hiraijera wauna, wauanjera hogigix hohambshana egi jarnaga hikiware hinkishu unagra.
14Egi jaja harnaj mainja hukhana‐wigaja, hisha hunkit’e naxguna, egi Hebraia hit’e wena: Saulus, Saulus jagu‐u hinai‐shanarajeshe? Mas‐pahi naxjagra wojexi warakik’urajena.
15Egi wahena: Hirukanara peshe nineshe? Egi wena: Jesus newinena E hiraishanarajena.
16Eshi kikawa‐ange egi si hashinira hiranashine, deshesge hawau jantinigikhina, ware niunkjege egi wosharaikjege washa jagu hashjare hereanaga egi washa jagu jantiningigikjanera.
17Egi wankshigeja egi hirarujeja herera eja shegunegi howare‐ningigina, hiranikarakjanena,
18Hishjasu warninera waragi‐shuruhaisjege, egi hokawasrogeja unankhi hohambeja howa‐kireaguirekjege, egi Satan homashjainja unankhi Maura eja howa‐kireaguirekjege, washa woishana warninera wagit’unairekjege egi hoishjanera wakishu rus‐hirekjanena jarnaga harnaixgunangra e wakanjang‐wahirera.
19Esge hung Agrippara, washa woijanti wangregi howajira inke khiba‐harnina.
20Eshi jorni Damaskus‐eja unangra wawagitagshana egi Jerusalem‐eja, egi Judra mowagaxra harnaj egi hirarujeja herera wawagitagshana, najgerakarateg hirarnaga egi Maura hawakshainekjege egi najge‐karateg woshga uinekjege.
21Washa de‐e hawau wohokhu‐hojhixeteja Judra hinukos‐hirena egi d’ewinainena.
22Eshi Maura eja wogijire hotussana hamb de‐e higu nia‐ambhajena, xununigra egi xetera hinuinke wawagitag‐hajena egi inke washinjahi waiaganina de‐eshana washa jagu prophetra egi Mosesga hajirekjane airera hihajena.
23Kristus jasgegi hawekjanena, egi E jornixji d’arnagra eja niamb‐howakirikjanera, egi wankshigra egi hirarujeja herera hohamb wagigikjanera.
24Egi kikarashigra deshesge egaja Festus mashja ena: Paulus warnaira nixawarnina, washinperesra hawinshrage wanaxiowongnina.
25Eshi wena: Inke warnaxihuwongnina Festus phixjira, eshi hoit’e wogisogra wagajena egi hasohixji.
26Egi hungra washa de‐e hiperesnakshana, wogishawaxji e wakit’ajena. Egi hiaperes‐hajena washa de‐e inke hisha nuxawa gimingnira. Washa de‐e inke hoikshegeja wauni hajege esge.
27Hung Agrippara, jasge prophetra warnanaxgushe? Hiaperessana warnanaxgura.
28Egi Agrippa Paulus wagena: Jowe hinsharaxuruganaga Kristian harninana.
29Egi Paulus wena: Maura roagiguna inke neshana nineninana, eshi hishge jarnaga hamb de‐e naixgune, washa jowexjinig nigeshge washa rokana hiuanaga jaisgajane shenisgawisheshi, wirusgij de‐eshana inke hiraniwajowinisheshi.
30Egi jaja deshesge e‐gi, hungra nashina egi mowagax hirukanara egi Bernike egi jarnaga wakishu minagra.
31Egi jaja hijahi hagiregi hokikit’airena wairena: Wang de‐e inke washanisha hat’ehi phinigaja egi shige rusgijphiwaunigaja.
32Egi Agrippa Festus wagena: Wang de‐e girushjarehi phingaja, inke Kaiser woehira hawaxuruj‐nigajeregi.
Currently Selected:
Hoixgara 26: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
