Hoixgara 25
25
1Egi jaja Festus mowagax rogeja jigi, hambra danihangi Kesarea‐eja rena Jerusalemra howarena.
2Egi nabhoruxaj hirukana hungra egi Judra xetera hit’at’airena Paulus hakhira, egi gitairena,
3Najwojankje roguinena Paulus hakirananka, Jerusalem‐eja howahu‐gigikjege, nagueja hiraperanaga d’ehirekjege.
4Egi Festus horniharna, Paulus Kesarea‐eja jasgegi harninankhi phinana, eshi e xapgenig wawakerekjanena.
5Esge jarnaga horograwiregi shuruxurugwigi harnikishu hakerekjawina ena, egi wang de‐e washina‐sharaijawina, washa wowongra hisha unjegi.
6Egi horoghireja hamb kerepana‐haishanaga hashanaha hiwusharna, Kesarea‐eja howakerena, egi haininegi waehi waminageja minagshana, egi Paulus harniji wa’shina.
7Egi jaja jigi, Judra Jerusalem‐eja howajinanka hogigix nashinena egi washa hiraraj sgingerera roha Paulus hirakirairena, e inke wogisoghi ruxurug hiranina,
8Paulus hikarat’et’ege, inke Judra woehi harninera, egi inke shige wohokhu‐hojhixetera egi inke shige Kaiser hakitarnina inke de‐e hisha hiaishananina.
9Eshi Festus Judra giphi‐wahinaina, Paulus hornigiharna egi wena: Jasge Jerusalem‐eja horawasherekjeshe egi eja jowehaija niwessiwi hirekjeshe?
10Egi Paulus wena: Kaiser waehi waminag harninegi nashi hajena, eja haehi phianina. Judra inke washa wowongra hisha wagiunina, hiraperesji‐rajena.
11Washa wowonk haungi egi washara hisha hauanaga d’ehire phi‐waungi, d’ehirera inke roaxininana. Eshi washa de‐e hirairajnagre inke hisha shesgarnige, inkisha eja hinushjare‐hininana. Woehira Kaiserga hapaxurujshana.
12Egi jaja Festus waehinanka wirokit’egi, horniharna: Woehira Kaiserga hashawa‐xuruijaneshe, Kaiser eorawasherekjaneshe.
13Egi hamb jarnahagiregi hung Agrippa egi Bernike Kesarea‐eja hajirena, Festus hikaragi.
14Egi jaja hambra roha eja uinegi Festus Paulus horagshana hawaura hungnaka hogiragshana: Wena, wang hisha eegi Feliks rusgij d’unarena,
15E wagairena, Jerusalem‐eja hahigaja, nabhoruxaj hirukana hungra egi Jud xetera horaghirena, haehi hakira roigigu hirena.
16Wawagena, Romannagre inke houna shegu hininankshana, wangra hisha d’ehi wagigininankshana, kheni washinaraj hirani washa wirarajnanka wakijaxji airanana egi jagu hiraraj hirakiranankhi kikarashig hikarat’et’e gigiranana.
17Esge jaja hajirera, inke hipusharni, haininegi waehi waminageja mianagshana egi wangra joweharegi harniji wa’shina.
18Egi jaja washa wirarajra nashinera, washa jagu hiraraj hirekjane hiarera inke shesge higairanina.
19Eshi woiwax hirakirairena washa hoinige harnaxgu harninera hawau wagairena egi hisha Jesus higairegi, e d’egi, Paulus E niambshe e‐ga.
20Egi washa woiwax de‐e inke waiagiperesnige, esge hiagipaxshana, Jerusalem‐eja howaregi giphinaguni hihena, egi eja washa de‐e haehinana.
21Egi Paulus hirakaraire nainge Augustus haehikjege ejipa, egi hirakara wa’shina Kaiser‐eja howare‐hakjanera ejipa.
22Egi Agrippa Festus wagena: Hishge wangjega naxgungi haiphinana. Hainigi ena, nanaxgunkjena.
23Egi haininegi jaja Agrippa egi Bernike jiwina, rokana hakikarani, egi wornaxgu houeja hokawairena, manape hung xetera wakishu, egi jhinageja wang rokanara, Festus Paulus harniji washina.
24Egi Festus wena: Hung Agrippara egi wankshigra jarnaga hinakishu rajiwira, wang de‐e hashjawina, e wagairena Judra worohaxjina harnaj hingexji hirena, Jerusalem‐eja herera egi shige eegi herera uwainena, inke niamb rahe phinishe airena.
25Eshi jaja hiaperesra inke d’ehire phini waura, egi e Augustus eja woehira hawaxurujshana, eja howare‐hakjanena.
26E wagena, inke washa wogisog hirukana harnira giwagax duxurugnina. Esge jowerawiregi harnigarni hajiwina, egi hung Agrippara nexji joweraregi ningikerena, egi wessiwira ragishurushjangi, washa hagipagax duxurugnana.
27Inke phinina hiarege jhihornassairera hisha nigeoware‐hianaga egi inke horagnigi jaguisha hiraraj hire wagiuinegi.
Currently Selected:
Hoixgara 25: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
