rumiya 6

asa 6

ḏɩməṯɩno galo yecu gwe na ŋuɽun ŋun ŋɩki ŋate ŋɩgakinu berene no

1na dino ilarau? ilajaḏaṯa ŋuɽun ganu ŋun ŋɩki kani a ḏiŋiriḏa utəne a? 2awe, ŋate ŋiro dino ḏuṯ no. liŋə lun lɩmai ŋuɽun ŋun ŋɩki galakwe ilinjaḏaṯa ganu? 3ŋate ŋilɩŋiḏayalo nanyarno, liŋə wei lun limababṯaijini ḏi yecu kɩrisṯo ilbabṯaijinu gi ḏaiya ḏuŋun na? 4nilikwurɩnu dino ḏibabṯaijɩno ḏe ḏage gi ḏaiya, kani gi gwune kɩrisṯo madiɽi gi ḏaiya ḏoɽeḏə ḏe ḏeḏi baba, na dino ilwewele liŋə dino ḏɩmiḏa ḏe ḏun ḏiya. 5gi gwune ḏa milmaṯaḏe nanu kal gete gi ḏaiya ḏuŋun, nilmaṯaḏe nanu kal gete gi ḏidiɽo ḏuŋun dinə; 6ililɩŋiḏi ilarno liŋə ŋuɽun ŋe ŋage ŋeḏi gwerre ilmalɽinye ŋuŋale gi luɽi lun lɩmalɩḏo ganu, kani ŋwuki aŋɩna yeḏi ŋuɽun ŋun ŋɩki, kani ilate ilro lɩwainy leḏi ŋuɽun ŋun ŋɩki minu no. 7gi gwune gwiji gwun gwɩmai gwumədu ŋuɽun ganu ŋun ŋɩki. 8na ḏa ilmai kɩrisṯoŋale, ilməmɩnyi ilmarno iləmɩḏe ŋuŋale, 9ililɩŋiḏi ilarno kɩrisṯo gi gwune diɽil gi liji lun laiyo gwate gwai minu no, na ḏaiya ḏate ḏəṯi ŋelɩnya lugwun minu no. 10gi gwune ḏaiya ḏun ḏaiyu, ḏaiyu ḏan ŋuɽun ŋɩki lamtɩdo, namɩni ḏɩmiḏa ḏun ḏɩmiḏu, ḏɩmiḏu ḏi elo. 11na dino nyaŋa ḏuɽəḏɩl lula lalo laiyo dino ŋuɽun ŋun ŋɩki, nyamɩni miḏe ḏi elo yecu kɩrisṯo gwe gwun gwino gwele gwage.

12na dino aṯanyouwɩrico ŋuuuna gun ŋɩki ŋəməṯo ŋelɩnya gi jiŋɩno jalo jun jaṯai, kani nyagwujane ŋuɽuna gagin gun ŋɩbunyɩlo gworki no. 13na dino nya lo lagele jiŋɩno jalo ŋuɽun ŋun ŋɩki gi laŋ le ḏapa ŋɩru ŋun ŋɩki no, nyamɩni gele lula lalo ḏi elo gi liji lun lɩmiḏo gi ḏaiya, na jiŋɩno jalo ḏi elo gi laŋ le ḏapa ŋɩru ŋiŋir. 14gi gwune ŋuɽun ŋun ŋɩki ŋate ŋəṯi ŋelɩnya lagalo no, gi gwune nya late lo ŋuɽun ganu ŋun ŋigelijɩlo elo musaŋ no nyamɩni ro gi ḏiŋiriḏa.

ḏəŋinio ḏan ŋɩwainy

15na ŋɩrṯa ŋiro? ŋilape ŋuɽuna ŋun ŋɩki gi gwune ilate lo ŋuɽun ganu ŋun ŋigelijɩlo elo musaŋ no, nilmɩni ro gi ḏiŋiriḏa a? awe, ŋate ŋiro dino ḏuṯ no. 16nya late lilɩŋiḏi nanyarno, gwun gwuloḏeicenya lula lalo gwanyəṯeijo nəni nyaro lɩwainy leḏi ŋu gwun gwəṯeijanya nəni, ḏa nyalmaro lɩwainy leḏi ŋuɽun ŋun ŋɩki ŋun ŋajəpijo ḏaiya, i ḏəṯeijo eloŋu nəni ḏun ḏajiduji liŋir gi jei ganu lugwun na? 17namɩni nyi gweico eloŋu sukran gi gwune nyaŋa lun liro lɩwainy leḏi ŋuɽun ŋun ŋɩki gwerre ganu, namɩm gwunnɩno ŋɩmanyaləṯeijo nəni dugwor de ḏalɩmia ḏun ḏiḏəḏanya, 18na gwunnɩno nanyədu ŋuɽun ganu ŋun ŋɩki, nyalmaro lɩwainy leḏi ŋuɽun ŋun ŋiŋir 19nyi gwuməḏi ŋuɽuna ŋan gwiji gi gwune ḏɩmumɩḏa ḏeḏi jiŋɩno jalo. na ŋiro gi gwune gwerre ganu nyalgelijo jiŋɩno jalo nalro lɩwainy leḏi ŋɩrleḏ na ŋuɽun ŋun ŋɩki gi ḏapa ŋɩru ŋun ŋɩki, na ŋiro dino gwunnɩno gelɩl jiŋɩno jalo alro lɩwainy leḏi ŋuɽun ŋun ŋiŋir gi ḏɩpiḏa pɽul.

20gi gwune duḏanya gwerre lɩwainy leḏi ŋuɽun ŋun ŋɩki nyalmədu ŋuɽun ŋun ŋiŋir. 21na nya ləṯi nyaɽe nyira kaja kono ŋɩdi ŋun ŋaṯajapi ḏare gwunnɩno? gi gwune ḏeteḏəṯa ga ḏeḏi ŋɩdi ŋeno ḏiro ḏaiya. 22namɩni gwunnɩno nyalmətuḏə ŋuɽun ganu ŋun ŋɩki na nyalmaro lɩwainy leḏi elo; na nyaɽe nyalo nyun nyəṯanyalo nyajagwuloḏa gi ḏɩpiḏa pɽul, na ḏeteḏəṯa ḏagin ḏiro ḏɩmiḏa gi gɩḏilio. 23gi gwune ḏɩbona ḏeḏi ŋuɽun ŋun ŋɩki ḏiro ḏaiya, namɩni ḏiḏəḏə ḏeḏi elo ḏiro ḏɩmiḏa gi gɩḏilio yecu kɩrisṯo gwe gwun gwiro gwele gwage.

Currently Selected:

rumiya 6: OTR1966

Highlight

Copy