rumiya 5

asa 5

ŋuɽun ŋun ŋɩmaje gi ḏɩməṯo

1na dino gi gwune ilmadujini liŋir gi jei ganu jeḏi elo ḏɩməṯo ḏe, iləṯi ḏouwɩɽiḏa eloŋale gwele gwage gwe gwun gwan yecu kɩrisṯo; 2na dino ŋu gwe ilməṯi ḏəḏio ḏɩməṯo ḏe gi ḏiŋiriḏa ḏun ḏijɩne, niladile ganu gi ḏiḏuḏɩnɩjo ḏe ḏoɽeḏa ḏeḏi elo. 3na ŋate ŋiro dino kuwei no, namɩni iladile ganu ḏɩḏia ḏe ḏage dino, ililɩŋiḏi ilarno ḏɩḏia ḏaṯapa ḏɩməṯo ḏugwore, 4na ḏɩməṯo ḏugwore ḏaṯapa ḏɩməṯɩno ga, na ḏɩməṯɩno ga ḏaṯapa ḏiḏuḏɩnɩjo, 5na ḏiḏuḏɩnɩjo ḏate ḏaṯape ḏare no, gi gwune ḏəmɩnyo ḏeḏi elo ḏimadoḏa gi dugwor ganu dage gwuɽɩwə gwe gwun gwɩpiḏo pɽul gwun gwiḏəḏije.

ḏəmɩnyo ḏeḏi elo ḏaŋinu gi ḏaiya ḏeḏi kɩrisṯo

6gi gwune jilo gwerre ilmumɩḏo namɩni kaja gun gɩdeleḏo kɩrisṯo mai gwan liji lun lɩki, 7gi gwune gwiji gwate gwete gwar gwai gwan gwiji gwun gwuḏuḏɩnu ga no, namɩni gwəṯi gwan gwiji gwun gwiŋir gworki gwete gwəṯi ḏibɩɽeḏa nanu gwai gwan ŋu. 8namɩni elo maŋiḏi ḏəmɩnyo ḏuŋun lage gi gwune iljɩre lɩki kɩrisṯo mai gwan liŋə. 9na dino gi gwune ilmadujini liŋir gi jei ganu jeḏi elo gwunnɩno ŋuwən ŋe ŋuŋun, ŋiliŋikədəḏɩni ga gi ḏɩɽeḏa ganu ŋu gwe. 10gi gwune ilikiḏiḏi namɩni ilmouwɩɽiḏe eloŋale ḏaiya ḏe ḏeḏi ŋaɽe ŋuŋun, na ŋutəno kworo kweno na liŋə ilouwɩɽiḏe na iləkədəḏɩni ga ḏɩmiḏa ḏe ḏuŋun, 11na ŋate ŋiro dino kuwei no, nilmɩni dile ganu ḏi elo yecu kɩrisṯo gwe gwun gwiro gwele gwage, gwun gwimilgwape gwunnɩno ḏouwɩɽiḏa ḏage.

ḏaiya ḏi adam, na ḏɩmiḏa ḏi kɩrisṯo

12na ŋiro gi gwune gwiji gwe gwetɩdo ŋuɽun ŋəḏi kɩḏilio ŋun ŋɩki na ŋuɽun ŋun ŋɩki ŋapa ḏaiya, na dino ḏaiya ḏɩmouwɩriga gi liji wei gi gwune wei lɩmape ŋuɽuna ŋɩki. 13na gwerkwe uro gwerre na elo gelijo musaŋ ŋuɽuna, ŋuɽun ŋun ŋɩki ŋijo kɩḏilio, namɩni ŋuɽun ŋun ŋɩki ŋate ŋiḏuɽəḏɩnu ḏa ŋate ŋɩmaje ŋuɽun ŋun ŋigelijɩlo elo musaŋ no. 14namɩni ḏaiya ḏɩmape ŋelɩnya uro kaja geḏi adam kəbe na kaja geḏi musa, na gi liji lun late lɩmanape ŋuɽuna ŋun ŋɩki gi gworo gweḏi adam gwun gwiro sura jeḏi ŋu gwun gwar gwila no.

15namɩni ḏiḏəḏo ga dino ḏe ḏiŋiriḏa ḏate ḏiro gi ŋuɽun ŋun ŋɩki ŋun ŋapɩlo gwiji gwetɩdo no, gi gwune ḏa ŋuɽun ŋe ŋun ŋɩki ŋeḏi gwetɩdo lutu lɩmai, na ŋutəno ḏiŋiriḏa ḏe ḏeḏi elo, na ḏiḏəḏə ḏe ḏiŋiriḏa ḏeḏi gwiji gwetɩdo gwun gwan yecu kɩrisṯo ḏiməbəḏəṯɩnijo liji lutu. 16na ḏiḏəḏo ḏun ḏima elo ḏəḏə ga dino ḏate diro gi ḏapa ŋuɽuna ŋɩki ŋeḏi gwetɩdo no, gi gwune gwiji gwe gwetɩdo ŋuɽun ŋun ŋɩki ŋɩməḏi, na dino ḏakɩmiḏa ḏeḏi elo ḏɩmila gi liji lutu na dino wei lɩmalakɩmi, namɩni ḏiḏəḏo ga dino ḏeḏi ḏiŋiriḏa ḏun ḏɩmila ḏan ŋuɽun ŋutu ŋun ŋɩki ḏaṯɩḏuji liji lutu liŋir gi jei ganu jeḏi elo. 17na ḏa ŋuɽun ŋe ŋun ŋɩki ŋeḏi gwiji gwetɩdo ḏaiya ḏɩmapa ŋelɩnya; na ŋutəno liji lun lɩməṯi ḏiŋiriḏa ḏun ḏutu na ḏiḏəḏo ga dino ḏeḏi ŋuɽun ŋun ŋiŋir aləṯi ŋelɩnya gi ḏɩmiḏa gwetɩdo gwe, na ŋu gwan yecu kɩrisṯo.

18na gi gwune ŋuɽun ŋe ŋɩki ŋeḏi gwiji gwetɩdo ḏakɩmiḏa ḏɩmila gi liji wei nalakɩmini; na dino ŋɩru ŋe ŋun ŋiŋir ŋeḏi gwetɩdo liji wei ladujini liŋir gi jei ganu jeḏi elo nalmiḏe. 19na gi gwune gwiji gwetɩdo gwate məṯeijo eloŋu gəni no liji lutu lɩmadujini lɩki, na ŋiro dino ḏideŋɩneja ḏe ḏeḏi gwetɩdo lutu ladujini liŋir gi jei ganu jeḏi elo. 20na dino ŋuɽun ŋun ŋigelijɩlo elo musaŋ ŋɩməḏio kani a ŋuɽun utəne ŋun ŋɩki, namɩni gi gwune na ŋuɽun utəne ŋun ŋɩki ḏiŋiriḏa ḏimutəne gworki, 21kani ŋiro gi gwune ŋuɽun ŋun ŋɩki ŋəṯi ŋelɩnya gi ḏaiya, na dino ḏiŋiriḏa ḏəṯi ŋelɩnya ŋuɽun ŋe ŋun ŋiŋir gi ḏɩmiḏa gi gɩḏilio yecu kɩrisṯo gwe gwun gwiro gwele gwage.

Currently Selected:

rumiya 5: OTR1966

Highlight

Copy