rumiya 4

asa 4

ibraim maŋini gwiŋir gi jei ganu jeḏi elo ḏɩməṯo ḏe

1na dino ilarau gwan gwuminyo gwage gwan ibraim ŋuɽun ŋeḏi aŋɩnu? 2gi gwune ḏa ibraim madujini gwiŋir ŋɩru ŋe ŋun ŋapulo, gwəṯi ŋuɽuna ŋe ḏabupaḏa ganu, namɩni ŋate ŋandro gi jei ganu jeḏi elo no. 3gi gwune gɩḏam garau geḏi elo? na ibraim əmɩnyi eloŋu nuḏuɽəḏɩjo ŋuɽun ŋun ŋiŋir. 4namɩni gwiji gwun gwaṯape ŋɩru, na əlgɩrucu yate yəḏuɽəḏinijo ŋuŋu gi ḏiŋiriḏa no, namɩni gi gəmɩju; 5namɩni gwun gwate gwaṯape ŋɩru no, numɩni əmɩnyu eloŋu gwun gwaṯɩduji gwiji gwiŋir gi jei ganu lugwun gwun gwimape ŋuɽuna ŋɩki, na ḏɩməṯo ḏuŋun ḏiḏuɽəḏɩjo ŋuɽun ŋun ŋiŋir. 6gi gwune aro ḏauuḏ dino no ḏɩmoreḏa ḏaje kwiji gwun gwa elo ḏuɽəḏɩjo ŋuɽun ŋun ŋiŋir ga dino ḏədu ḏeḏi ŋɩru ŋun ŋapulo no. 7nuarno,

ḏɩmoreḏa ḏaje gi liji lun lɩmaliḏuḏɩjo ganu ŋuɽun ŋagin

ŋun ŋɩki,

na lɩmakɩɽɩbəḏɩnijo ŋuɽuna ŋagin ŋun ŋɩki;

8ḏɩmoreḏa ḏaje kwiji gwun gwate gwa gwele gwun gwiro elo ḏuɽəḏɩjo ŋuɽuna ŋun ŋɩki no.

9na dino ḏɩmoreḏa ṯeno ḏaje gi liji lun luɽəno kuwei, i gi lun late luɽəno dino na? gi gwune ilarno ḏɩməṯo ḏuŋun ḏimalḏuɽəḏɩjo ibraimŋ ŋuɽun ŋun ŋiŋir. 10na galakwe ḏiḏuɽəḏijɩnu dino? gwune nuje gwuɽəno i gwate gwuɽəno na? ŋədu gi ḏuɽəno no, nalmɩni ro gwune gwate gwuɽəno no. 11na ŋwulape ḏuɽəno ḏe gi ŋuɽun ŋun ŋaŋiḏi ŋuɽun ŋuŋun ŋun ŋiŋir ŋun ŋəṯulo ḏɩməṯo ḏe gwune gwijɩre gwate gwuɽəno no, kani nuro baba gweḏi liji wei lun ləmɩnyu eloŋu gwune late luɽəno no, na dino nulḏuɽəḏɩjo ŋuɽun ŋun ŋiŋir, 12na baba gweḏi liji lun late luɽəno kuwei no, nalmɩni wele dino gi ḏigwujana ḏe ḏɩməṯo ḏeḏi ibraim gwun gwiro baba gwage ḏun ḏəṯu uro gwerre gwate gwuɽəno no.

13gi gwune ŋuɽun ŋun ŋuməḏɩjɩlo ibraimŋ na nyaɽe nyuŋun ŋalinɽenyeḏe kɩḏilio, ŋəḏu ŋeḏi ŋuɽun ŋun ŋigelijɩlo elo musaŋ no, nalmɩni ro ŋeḏi ŋuɽun ŋun ŋiŋir ŋun ŋɩməṯi ḏɩməṯo ḏe. 14gi gwune ḏa limaro liji lun laṯɩdɩme ŋuɽuna ŋun ŋigelijɩlo elo musaŋ lun ŋalinɽenyeḏe kɩḏilio, na ḏɩməṯo ḏɩmaro ga jai, na ŋuɽun ŋuməḏijɩŋe elo ŋulɩḏəḏə ŋate ŋəṯi jei ganu no. 15gi gwune ŋuɽun ŋun ŋigelijɩlo elo musaŋ ŋaṯapa ḏɩɽeḏa ganu, namɩni ḏa ŋuɽun ŋun ŋigelijɩlo elo musaŋ ŋate ŋɩmaje no na ŋuɽun ŋun ŋɩki ŋete no.

16na ŋuɽun ŋun ŋuməḏɩjɩŋe elo ŋulɩḏəḏə ŋeḏi ḏɩməṯo ŋiro kani alro ŋe ḏiŋiriḏa, na ŋaro gwerkwe gi nyaɽe nyuŋun wei, ləḏu liji lun lijo ŋuɽun ganu ŋun ŋigelijɩlo elo musaŋ kuwei no, namɩni luŋa dino lun ləṯi ḏɩməṯo ḏeḏi ibraim gwun gwiro baba gwage wei, 17gi gwune ŋulinu,

nyi maŋəduji baba gweḏi liji leḏi jɩmɩrɩgen jutu—na ŋuɽu ŋeno ŋəṯi jei ganu gi jei ganu jeḏi elo, gwun gwiro elo gwun gwəmɩnyu, gwun gwəmɩḏi lun laiyo na gwumə gwan ŋɩdi ŋun ŋate ŋijo no gi ŋo. 18na ŋu gwun gwate gwəṯi ḏiḏuḏɩnɩjo no numɩni əmɩnyi ḏiḏuḏɩno ga, na ḏɩməṯo ḏe ḏuŋun nuro baba gweḏi liji leḏi jɩmɩrɩgen jutu gi gwune ŋərɩninu,

na dino nyaɽe nyuŋa nyandro.

19na gwate gwirebɩna gi ḏɩməṯo gwune gwuməḏɩnu gwan aŋɩnu yuŋun yun yɩmaro yuɽun gi yaiyo no, gi gwune jɩḏilio ḏuɽi di ca, na gwune numəḏɩni gwan gwa gwuŋun gwun gwan sara gi gwune maro gwuɽun gwate ŋilɩŋe nanu minu no, 20na gwate məṯi ḏubəga gi ḏɩməṯo ḏuŋun ŋuɽun ŋe ŋun ŋuməḏɩjɩlo elo no, gi gwune gwate gwəṯi ḏɩməṯo no, numɩni bɩɽe nanu gi ḏɩməṯo nubuḏi eloŋu, 21gwilɩŋiḏi muma elo gwəṯi ŋɩma ŋularre ŋiro gi gwune ərune. 22na dino ḏɩməṯo ḏuŋun ḏiḏuɽəḏɩjo ŋuɽun ŋun ŋiŋir.

23na ŋuɽun ŋeno ŋate ŋulinu ŋan ibraim kuwei no, 24namɩni gwan liŋə dino, na ḏɩməṯo ḏage ḏiḏuɽəḏɩjije dino lun ləmɩnyu eloŋu gwun gwidiɽi yecuŋ gi liji lun laiyo, gwun gwiro gwele gwage gwan yecu, 25gwun gwiḏəḏinijo ḏaiya gwan ŋuɽun ŋage ŋun ŋɩki, nudiɽi nuŋwijiduji liŋir gi jei ganu jeḏi elo.

Currently Selected:

rumiya 4: OTR1966

Highlight

Copy