rumiya 16

asa 16

ḏisalɩmia ḏe gwulo gwuŋun

1nyi gwajuməḏɩjo dino gwan pibi gwun gwiro mage gwun gwiro gwa gwun gwiro gaḏam geḏi kɩniso gun gijo kenikiria, 2kani nyəmɩnyi kwele gwun gwiro elo, gi ŋideleḏo gi liji lun lɩpiḏo pɽul, nanyagelejo uwə ŋuɽun ŋədi ŋun ŋulbunyi lagalo; gi gwune gwaṯɩgelejo liji uwə lutu na nyi dino. 3salɩmil birisɩkilaŋ na akila lun lapanale ŋɩru ḏi yecu kɩrisṯo, 4lun ligelo lula lagin gwan gwulo gwinyi, nileico sukran namɩni nyi gwədu gwetɩdo no, namɩni kɩniso wei dino geḏi liji lun liro ga dino. 5na dino salɩmi kɩniso gun gaṯaɽuwaḏe ldu kwu dunu gwagin. salɩmil maḏəri gwun gwan ebinɩtus gwun gwəmɩnyi, gwun gwəmɩnyu kɩrisṯoŋ gwerre kamɩrɩgen yun yan asia. 6salɩmil mariamŋ gwun gwapo ŋɩru ŋutu gworki gwan anaŋa. 7salɩmil andɩranikusuŋ na yuniasa lun liro əriḏ yinyi, na lun lijanalle kɩrkon lun lo ləmɩnyɩnu gworki gi duwəjo, na luŋa liro lɩkɩrisṯin gwerre ganu lugwi. 8salɩmil əmɩbilas gwun gwəmɩnyi kwele gwun gwiro elo. 9salɩmil urubanusŋ gwun gwapanalle ŋɩru ḏi kɩrisṯo na istakia gwun gwəmɩnyi. 10salɩmil abilisŋ gwun gwəmɩnyɩnu ḏi kɩrisṯo. salɩmil liji leḏi dunu gweḏi aristubulus. 11salɩmil ərudiyunŋ gwun gwiro əriḏ yinyi. salɩmil liji leḏi dunu gweḏi nikrisusa kwele gwun gwiro elo. 12salɩmil tɩripiniaŋ na tɩribusa lun laṯape ŋɩru gworki kwele gwun gwiro elo. salɩmil parsisŋ gwun gwəmɩnyɩnu gwun gwapo ŋɩru ŋɩbuḏu gworki kwele gwun gwiro elo. 13salɩmil rupusŋ gwun gwuməṯɩnu kwele gwun gwiro elo, na nana gwuŋun gwun gwiro nana lugwi dino. 14salɩmil asinkɩriṯusŋ, na piliguna, na eramasa, na batrubasa, na ərimisa, na lɩmage lun lijille. 15salɩmil bilulugusuŋ, na julia, na neriusa, na megin gwun gwiro gwa, na ulumbasa, na liji wei lun lɩpiḏo pɽul lun lijille. 16salɩmiḏɩl ŋɩmaga lagaloŋu ḏɩmɩɽəḏo ḏe ḏeḏi liji lun lɩpiḏo pɽul. kɩniso wei geḏi kɩrisṯo gisalɩmiaje.

17na nyi gwuɽoṯeḏo lagalo lɩmagəri, niarno, jil muma gi liji lun laṯapa ŋuɽuna ŋun ŋɩkiḏiḏɩl ḏalɩmia ḏe ḏun ḏalɩminanyaḏe nalgele ḏɩkenyɩḏiḏia ganu na ḏobɩlkejo, kani nyədu lagin. 18gi gwune liji lun liro dino liro lɩwainy lədu leḏi gwele gwun gwan kɩrisṯo no namɩni leḏi nare nagin, na ŋuɽun ŋe ŋun ŋiŋir na ḏuməḏo ḏe ḏun ḏiŋir laṯirdeijo dugwore ganu deḏi liji lun liro jɩɽilo. 19na ḏəteijo nəni ḏalo ḏimaŋini gi liji wei. na dino nyi gwadile ganu lagalo, namɩni nyi bunyu nyalaro liji lun lilɩŋiḏi gwan ŋuɽun ŋun ŋiŋir, nyamɩni dile nanu gwan ŋuɽun ŋun ŋɩki. 20na elo gwe ḏouwɩɽiḏa gwar gwəduṯa seiṯanŋ galo ŋwara ganu ŋwalo cou. ḏiŋiriḏa ḏeḏi gwele gwage gwun gwan yecu kɩrisṯo ḏanyalije. gwerkwe.

21ṯimuṯawus gwusalɩmiaje gwun gwapanagwe ŋɩru, na dino lukius, na yasuna, na susibatrus lun liro əriḏ yinyi. 22na nyi gwan tiritius gwiro gwun gwuli ŋuɽuna ŋeno gwusalɩmiaje kwele gwun gwiro elo. 23gaius gwusalɩmiaje gwun gwiro gwiḏo gwinyi na gwaṯɩməṯo liḏa leḏi kɩniso wei. ərasṯus gwusalɩmiaje gwun gwiro gwiji gwun gwaṯɩdɩme əlgɩrucə yeḏi amɩrɩgen, na kouwɩraṯus gwun gwiro mage. 24ḏiŋiriḏa ḏeḏi gwele gwage gwun gwan yecu kɩrisṯo ḏanyalije wei. gwerkwe.

ḏorṯeḏa

25na gwunnɩno lugwun gwun gwəṯi ŋɩma gwajimaṯaje ga gwan ŋuɽun ŋinyi ŋun ŋiŋir ŋeḏi yecu kɩrisṯo, na ḏuməḏɩjo liji ḏan yecu kɩrisṯo gwan ḏəŋinio ḏeḏi ŋuɽun ŋun ŋɩlɩbo ŋun ŋɩlɩbinu jɩḏilio jola ganu. 26namɩni gwunnɩno ḏimaŋino ŋuɽun ŋun ŋɩmal nebɩŋa uli kɩḏam geḏi elo, na ŋuɽun ŋun ŋigelɩlo elo gwun gwajaḏaṯa gi gɩḏilio ŋun ŋɩmalɩŋini gi liji leḏi jɩmɩrɩgen wei kani naləṯeijo ḏɩməṯo nəni, 27i ḏoɽeḏa ḏaje ḏi elo gwetɩdo gwun gwilɩŋeḏeno ŋuɽuna wei yecu kɩrisṯo gwe gi gɩḏilio. gwerkwe.

Currently Selected:

rumiya 16: OTR1966

Highlight

Copy