1 kurinṯus 1

asa 1

ḏisalɩmia na ḏara sukran

1nyi gwan bulus gwun gworniḏɩnu niro ḏuwəjo ḏeḏi yecu kɩrisṯo ŋuɽun ŋe ŋun ŋɩbunyɩlo elo, na susṯanis gwun gwiro mage, 2ano nulijo kɩniso geḏi elo gun go kurinṯus, na liji lun lulpiḏi pɽul ḏi yecu kɩrisṯo, lun lorniḏɩnu alro lɩpiḏo pɽul, na luŋa wei kalo wei lun lorniḏo jiji je jeḏi yecu kɩrisṯo gwun gwiro gwele gwagin na gwage, 3ḏiŋiriḏa ḏaje lagalo na ḏouwɩɽiḏa ḏeḏi elo gwun gwiro baba gwage, na gwele gwun gwan yecu kɩrisṯo

4nyi gwaṯeico eloŋu gwinyi sukran bubruṯ gwan nyaŋa, na ḏiŋiriḏa ḏeḏi elo ḏun ḏiḏəḏəje ḏi yecu kɩrisṯo; 5gi gwune ŋuɽun wei nyalmuti ḏɩbona lugwun, gi ḏuməḏo ŋuɽuna wei, na ḏilɩŋeḏa wei; 6na ŋiro gi gwune ḏɩteijo ga ḏeḏi kɩrisṯo ḏɩmaṯaḏa ga lagalo, 7na dino nyate nyanbɩɽaṯe ḏiḏəḏo ḏədi ḏeḏi gwuɽɩwə no, na ḏa nyalmaḏuḏɩnɩjo ḏəŋinio ḏeḏi gwele gwun gwan yecu kɩrisṯo, 8gwun gwajimaṯaji ga kəbe gɩdo ganu, nya late ləṯɩn ŋuɽuna ŋədi ŋun ŋajɩnŋi elo akɩmi gi lamon leḏi gwele gwage gwun gwan yecu kɩrisṯo no. 9na elo gwiŋir gwuḏuḏɩnu ga, na ŋu gwe nyaŋa lorniḏɩnu ŋɩmaga ŋeḏi ŋaɽe ŋuŋun ŋun ŋan yecu kɩrisṯo gwun gwiro gwele gwage.

ḏɩkenyɩḏiḏi ganu kɩniso

10namɩni nyi gwuɽoṯeḏo lagalo gworki lɩmagəri, gi jiri jeḏi gwele gwage gwun gwan yecu kɩrisṯo, nyaŋa wei nyuməḏəṯe ŋuɽuna ŋetɩdo, ŋo ŋanje ŋajɩnkenyə ganu; nyamɩni aɽuwe nyakani muma ŋuɽun ŋe ŋetɩdo na dakɩmiḏo ḏetɩdo. 11gi gwune nyi gwudiŋɩnu gwan nyaŋa lɩmagəri, gi liji leḏi dunu gweḏi kuluwi ḏɩbereḏa ḏo lagaloŋu. 12na ŋuɽun ŋinyi ŋaro dino, na gwete gwete lagaloŋu naṯuarno, nyi gweḏi bulus gwiro, na nyi gweḏi abulus gwiro, na nyi gweḏi sapa gwiro, i nyi gweḏi kɩrisṯo gwiro. 13kɩrisṯo kenyɩḏiḏi ganu a? na bulus gwuɽinyinu gi luɽi lun lɩmalɩḏo ganu gwan nyaŋa a? i nyaŋa libabṯaijinu jiri je jeḏi bulus a? 14na nyi gweico eloŋu sukran, nyi gwate gwinbabṯaije gwetɩdo lagalo no, namɩni nyi gwibabṯaijo kɩrisibusaŋ na gaius kuwei, 15kani gwo gwete gwanarno nyi gwaṯɩbabṯaijiḏi jiri je jinyi. 16na nyi gwibabṯaijo liji leḏi dunu gweḏi isṯipanas dino, namɩni lutəno gi loro leno nyi gwate gwilɩŋiḏi ḏa nyi manbabṯaije gwete gwiro kaja no. 17gi gwune kɩrisṯo gwate gwuwəjɩŋi gi ḏibabṯaijiḏia no, namɩni gi ḏuməḏɩjo liji ŋuɽuna ŋiŋir ŋeḏi yecu kɩrisṯo, ŋədu ŋeḏi ḏilɩŋeḏena ŋeḏi ŋuɽun ŋe ŋɩni no, kani ate ŋuduji luɽi lun lɩmalɩḏo ganu leḏi kɩrisṯo ga jai no.

ŋɩma ŋeḏi luɽi lun lɩmalɩḏo ganu

18gi gwune ḏuməḏɩjo ŋuɽuna ŋeḏi luɽi lun lɩmalɩḏo ganu ŋiro ŋɩɽilo gi liji lun lɩweweləḏi gi ḏaiya, namɩni lage lun laṯɩkədəḏɩni ga na ŋuɽun ŋeno ŋiro ŋɩma ŋeḏi elo. 19gi gwune ŋulinu,

nyi gwaki ḏilɩŋeḏena ḏeḏi liji lun lilɩŋiḏi ŋuɽuna ŋutu,

na ḏidiŋɩna ḏeḏi luŋa lun ləṯi ŋadɩgɩɽenya ḏidonye.

20na gwiji gwaḏa gwun gwəṯi ḏilɩŋeḏena ḏutu? na gwaḏa gwun gwiro gaṯɩm? na gwaḏa gwun gwaṯɩliwəwəɽɩṯijiḏi ŋuɽuna gweḏi gaja keno? elo gwate maduji ḏilɩŋeḏena ḏeḏi gɩḏilio keno ŋɩɽilo na? 21na gwune ḏilɩŋeḏena ḏe ḏeḏi elo liji leḏi gɩḏilio late lilɩŋiḏi eloŋu ḏilɩŋeḏena ḏe no, na elo məmɩnyi lulkədə ga lun ləmɩnyu ŋɩɽilo ŋe ŋeḏi ŋuɽun ŋun ŋuməḏəŋe. 22na liju liɽoṯeḏo ḏəŋinio na ligrigi libunyu ḏilɩŋeḏena, 23namɩni anaŋa laṯumə kɩrisṯo gwe gwun gwuɽinyinu gi luɽi lun lɩmalɩḏo ganu, ŋɩmaro gi liju gɩdol ge ḏobɩlkeja, na gi ligrigi giro ŋɩɽilo: 24namɩni gi liji lun lorniḏɩnu, lun liro liju na ligrigi dino, ŋɩmaro kɩrisṯo gwun gwiro ŋɩma ŋeḏi elo, na ḏilɩŋeḏena ḏeḏi elo. 25gi gwune ŋuɽun ŋeḏi elo ŋun ŋiro gi ŋɩɽilo gi jei ganu jeḏi liji ŋilɩŋeḏenano gi liji; na ŋun ŋaṯɩl liji are ḏɩmumɩḏa ḏeḏi elo ḏibɩɽeno nanu gi liji.

26iril jei galo ḏorniḏa ḏe ḏalo, lɩmagəri, late lagalo lutu lun ləṯi ŋadɩgɩɽenya ŋutu gi jei ganu jeḏi liji no, na late lutu lun ləṯi ŋɩma ŋutu no, na late lutu lun lilɩŋinu kəriḏ yeḏi ŋele no; 27namɩni elo gwubi ŋɩdio ganu ŋun ŋiro ŋɩɽilo ŋeḏi gɩḏilio kani alduji liji ḏare lun lilɩŋiḏi ŋuɽuna ŋutu; na elo gwubi ŋɩdio ganu ŋun ŋɩmumɩḏo ŋeḏi gɩḏilio kani alɩduji ḏare ŋun ŋɩbɩɽeno nanu, 28na elo gwubi ŋɩdio ganu ŋun ŋɩtiŋɩti ŋeḏi gɩḏilio, na ŋun ŋɩmal liji abɩlaṯe, na ŋun ŋate ŋijo no, kani aleti ŋɩma ŋeḏi gworo gwun gwijo gwunnɩno, 29kani ate an gwiji abupaḏe ganu gi jei ganu jeḏi elo no. 30na lugwun nyaŋa lo ḏi yecu kɩrisṯo gwun gwidujɩnu lage ḏilɩŋeḏena ḏeḏi elo, na ŋuɽun ŋiŋir, na ḏɩpiḏa pɽul, na ḏɩkəḏəḏɩna ga jili je, 31na dino gi gwune ŋulinu,

gwun gwabupaḏe ganu, gwabupaḏe ganu gwele gwe gwun

gwiro elo.

Currently Selected:

1 kurinṯus 1: OTR1966

Highlight

Copy

Compare