rumiya 15

asa 15

1na dino liŋə lun libɩɽəno nanu iləṯi gəmɩju nanu ilape ḏɩmumɩḏa ḏagin lun lɩmumɩḏo na ilo liŋiri lula lage. 2naṯi gwete gwete ŋuŋiri gworo gwun gwijaḏiḏilgwe ga ŋuərrɩjo ŋuɽuna ŋun ŋiŋir kani ŋubɩɽi nanu ŋudɩrkaḏaice kɩɽelo dɩməṯo ḏe. 3gi gwune kɩrisṯo dino gwate gwiŋiri gwula gwuŋun no, namɩni gi gwune ŋulinu, ḏɩḏenɩḏia ḏeḏi luŋa lun liḏenaŋa ḏɩmobɩliḏate lugwi. 4gi gwune wei ŋun ŋimululi gwerre ŋulinu kani ŋijilaŋijo na kani ḏɩmaṯajia ḏe ga na ḏibɩɽeḏa ḏe nanu ḏun ḏijo kɩḏam geḏi elo iləṯi ḏɩḏuḏɩnɩjo. 5na elo gwe ḏɩmaṯajia ga na ḏibɩɽeḏa ḏe nanu gwajiḏəḏə ŋuɽuna ŋetɩdo kal gete lagaloŋu gi ŋun ŋandro ḏi yecu kɩrisṯo, 6kani nyabuḏi eloŋu gwun gwiro baba na gwele gwage gwun gwan yecu kɩrisṯo ḏugwor ḏe ḏetɩdo na ŋwal ŋwe ŋwetɩdo.

ḏuməḏɩjo liji ŋuɽuna ŋiŋir ŋeḏi yecu lun liro ga dino

7na ŋiro dino əmɩnyil gworo gi gwune kɩrisṯo dino mijəmɩnyi gi ḏoɽeḏa ḏeḏi elo. 8na nyi gwarno, kɩrisṯo maro gaḏarn geḏi liji lun luɽəno kani nuaŋiḏi ŋuɽuna ŋun ŋiro gwerkwe ŋeḏi elo, kani ŋwulmaṯaji ŋuɽuna ŋalo ŋun ŋiḏəḏilo elo lɩgwurninyo, 9na kani a liji lun liro ga dino nalbuḏi eloŋu gwan ŋino ŋuŋun, gi gwune ŋulinu,

na dino nyi gwar gwaŋorṯeḏa gi liji lun liro ga dino

na nyi gwelɩŋi gwan jiri juŋa.

10nuar dino,

diliḏil ganu nyaŋa lun liro ga dino liji le luŋun.

11nuaɽu nuarno,

orṯeḏɩl gwelɩnya nyaŋa wei gwun gwiro elo lun liro ga dino,

aṯi liji wei elɩŋa delɩŋa de dorṯeḏa ŋuŋu.

12na isaia gwar dino no,

ḏɩɽibu ḏaje ḏeḏi yisa,

na ŋu gwun gwəḏiɽi gwaro gwele gweḏi liji lun liro ga dino,

na liji lun liro ga dino lagele ḏiḏuḏɩnɩjo ḏagin lugwun.

13na elo gwe ḏiḏuḏɩnɩjo gwajenyeje ḏidila ganu wei, na ḏouwɩɽiḏa gi gwune aṯanyəmɩnyi, kani nyenyeḏe ḏiḏuḏɩnɩjo ḏe ŋɩma ŋe ŋeḏi gwuɽɩwə gwun gwɩpiḏo pɽul.

bulus gwarno gwiṯi ḏugwor gi gwune gwuli jawab ḏugwor ḏe ḏiḏɩnu

14na gwan nyaŋa lɩmagəri na nyi kwulo gwi ŋilɩŋiḏɩlo muma, nyalenyeḏo ḏiŋiriḏa ganu, nanyalenyeḏo ḏilɩŋeḏa ganu wei, nyaləṯi ŋɩma nyalouwɩɽio gworo lagaloŋu ḏalɩmia ḏe. 15namɩni nyi ŋulijajilo ḏibɩɽeḏena ḏe nanu gworki ŋan ŋuɽun kworo kani ŋajaḏɩŋəni gi gwune ḏiŋiriḏa ḏun ḏiminyi elo ḏəḏə, 16niro gaḏam geḏi yecu kɩrisṯo gi liji lun liro ga dino, na ŋɩru ŋun ŋɩpiḏo pɽul ŋun ŋaṯɩlapa ŋiro ḏuməḏɩjo liji ŋuɽuna ŋiŋir ŋeḏi elo, kani a liji lun liro ga dino alro ḏiḏuga ḏun ḏaminyɩnu ḏupiḏi pɽul gwuɽɩwə gwe gwun gwɩpiḏo pɽul. 17na dino nyi gwəṯ iḏɩbuṯana ḏinyi ḏi yecu kɩrisṯo gwan ŋɩru ŋun ŋaṯɩləpijo eloŋu. 18gi gwune nyi gwate gwəṯi ḏibɩɽeḏa nanu gwiumə gwan ŋuɽun ŋədi no, namɩni ŋiro ŋun ŋɩmal kɩrisṯo duji nyi gwe, kani a liji lun liro ga dino ləṯeijo nəni, na ŋun ŋulduji ŋuɽun ŋe na ŋɩru, 19ŋɩma ŋe ŋun ŋəŋinu ŋɩru ŋe ŋɩbuḏo na ŋɩdi ŋun ŋɩmobeje liji ga ṯuṯ, ŋɩma ŋe ŋeḏi gwuɽɩwə gwun gwɩpiḏo pɽul, na dino ŋɩne urucəlim na kalo gun guwəɽeico ilirikuna galo, nyi məṯɩmi ḏuməḏɩjo liji ŋuɽuna ŋiŋir ŋeḏi kɩrisṯo. 20na dino nyi gwəṯi ḏugwor gworki ḏe ḏuməḏɩjo liji ŋuɽuna ŋun ŋiŋir ŋeḏi yecu kɩrisṯo, kalo gun gate gaŋɩne kɩrisṯo no, kani ate niuṯe kama elo geḏi gwun gwiro kaja no. 21namɩni gi gwune ŋulinu,

liji lun late lɩdiŋɩnu ŋu gwe no lar laŋu,

na luŋa lun late lɩdiŋɩnu no na ŋara ŋalilɩŋe.

ḏuməḏɩno ḏeḏi bulus ḏeḏi ŋɩru ŋuŋun

22na ŋuɽun ŋeno ŋimiḏuḏɩni ŋwamon ganu ŋutu nyi gwawila lagalo. 23namɩni gwunnɩno nyi gwate gwəṯi gala minu gi jɩmɩrɩgen ganu ceno no, na gi gwune nyi gwəṯi ḏugwor gworki nyi gwaṯar jɩḏilio jutu no, nyi gwaŋila lagalo, 24na ḏa nyi mele ŋɩne isbania nyi gwila lagalo gwe, gi gwune nyi gwuḏuḏɩnɩjo nyi gwajaŋu kwilo gwinyi nanyalinyigele gi ṯaṯ wɽi, ḏa nyi majiga gwɩti na nyi menyeḏe ḏidila ganu ḏalo gwerre. 25namɩni gwunnɩno nyi gwele urucəlim kani niəpijo liji ŋɩru lun lɩpiḏo pɽul. 26gi gwune liji leḏi makɩḏunia na akaia ləmɩnyu gworki ləḏəḏə liji ḏiḏəḏo ḏəḏi lun late ləṯi ŋɩdio no, luŋa lun lɩpiḏo pɽul lun lijo urucəlim. 27naliŋir dugwore gworki nalɩduji, na gwerkwe luŋa ləṯi gəmɩju lagin. gi gwune ḏa liji lun liro ga dino lɩmaməṯo ŋɩmaga ŋuɽun ganu ŋagin ŋeḏi gwuɽɩwə, na dino ləṯi gəmɩju naləpijo ŋɩru dino ŋɩdi ŋagin. 28na ŋiro dino na ḏa ŋɩmɩlṯɩmi ŋeno na ŋɩmɩlḏəḏə ŋɩdio ŋeno, nyi gwila lagalo gwe isbania. 29na nyi gwilɩŋiḏi ŋuɽuna muma ḏa nyi mila lagalo gwe nyi gwila nyi gwenyeḏo ḏɩmoreḏa ḏeḏi ŋuɽun ŋun ŋiŋir ŋeḏi kɩrisṯo.

30na nyi gwaɽoṯeḏo lagalo lɩmagəri, gwele gwe gwage gwun gwan yecu kɩrisṯo na ḏəmɩnyo ḏe ḏeḏi gwuɽɩwə gwun gwɩpiḏo pɽul, nyi gwarno ilabɩɽe nanu nyiŋale gi ḏuməḏɩjo eloŋu ḏalo gwan nyi, 31kani nyi kədəḏɩnə ga gi liji lun laṯe ləmɩnyu eloŋu ŋɩne yauḏia no, kani a ŋɩru ŋinyi ŋɩne urucəlim əmɩnyini gi liji lun lɩpiḏo pɽul, 32na dino nyi gwila lagalo ḏidila ḏe ganu ŋuɽun ŋe ŋun ŋɩbunyɩlo elo na ilajiga kal gete kani nyiawiḏiga ḏitɩwar. 33na elo gwe ḏouwɩɽiḏa gwanyalije wei. gwerkwe.

Currently Selected:

rumiya 15: OTR1966

Highlight

Copy