rumiya 14

asa 14

ḏɩməṯo ḏugwor gi liji lun ləṯi ŋuɽuna ŋiro kaja

1na ŋu gwun gwirebɩna gi ḏɩməṯo əmɩnyil, namɩni ŋate ŋan ḏuməḏəṯo ŋuɽuna elo ŋuŋun ŋun ŋuməḏɩnuŋe ganu no. 2gi gwune gwete gwaṯəmɩnyi nuarno gwaʼe ŋɩdio wei, namɩni gwiji gwun gwirebɩna gi ḏɩməṯo na gwaʼe ŋɩdio ŋun ŋɩkwuḏulo kuwei 3aṯaŋouwɩrico gwun gwaṯeʼe gwabɩlaṯe gworo gwun gwaṯe gwaṯeʼe no, naṯaŋouwɩrico gwun gwaṯe gwaṯeʼe no nuakɩmi gworo gwun gwaṯeʼe no, gi gwune gwəmɩnyu elo. 4ŋa gwan əḏi ŋa gwun gwaṯakɩmi gaḏama geḏi gwiji gwiro kaja? ŋu gweḏi gwele gwuŋun gwiro ḏa ŋɩmulməṯəḏe i gwimobɩliḏe. na ŋulməṯəḏe gi gwune gwele gwun gwiro elo gwəṯi ŋɩma gwumaṯaji ga. 5gwiji gwete gwaṯarno lamon lete liŋirano kworo gwiro kaja, namɩni gwiro kaja gwaṯunəji ŋwamon wei. ouwɩricil gwete gwete ŋwulɩŋe muma ŋadɩgɩɽe ŋuŋun. 6ŋu gwun gwatɩni lamon laṯunɩjo gwelɩnya gwun gwiro elo namɩni gwun gwate gwatɩni lamon no na late laṯunɩjo gwelɩnya no. na gwun gwateʼe, gwaṯeʼe kwele gi gwune gwaṯeico eloŋu sukran, na gwun gwate gwaṯeʼe no, gwate gwaṯeʼe kwele no, numɩni eico eloŋu sukran dino.

7gi gwune gwatɩn gwetɩdo lage gwəmɩḏe gwan gwulo gwuŋun no, i gwatɩn gwetɩdo gwai gwan gwulo gwuŋun no. 8gi gwune ḏa ilməmɩḏe ilmiḏo kwele, na ḏa ilmai ilai kwele; na ḏa ilməmɩde dino i ilmai na ileḏi gwele liro.

9gi gwune kɩrisṯo mai na məmɩḏe mɩna kani nuro gwele gweḏi liji lun laiyo na lun lɩmiḏo. 10namɩni ŋa, gwudaro gəko aṯakɩmi magalo? i na ŋa dino gwudaro gəko aṯaŋabɩlaṯe magalo? gi gwune liŋə wei ilar laḏuḏɩni gi jei ganu kɩḏoɽ ge ḏakɩmiḏa geḏi elo. 11gi gwune ŋulinu,

gi gwune nyi miḏo, gwele gwar gwun gwiro elo no,

ŋwurko wei ŋwiculɩjo ga, na diŋɩla wei ḏorṯeḏa eloŋu.

12na ŋiro dino liŋə wei gwete gwete lar ləḏuɽə lan lulo lage ḏi elo.

13na ŋiro dino aṯɩlakɩmiḏa ŋɩmaga lageŋu minu no, namɩni akɩmiḏɩl dino ŋarno gwo gwete gwangelijo ŋɩdio ga ŋe ḏobɩlkeja i ŋe ḏobɩliḏio megin no. 14nyi gwilɩŋiḏi muma gei ge kwele gwun gwan yecu, niarno gwaŋ gwatɩn gwetɩdo gwiro ŋɩrleḏ kwulo gwuŋun no; namɩni ḏa gwete maṯarno gwaŋ gwiro ŋɩrleḏ, na lugwun gwiro ŋɩrleḏ. 15na ḏa magalo marone gwan ŋɩdi ŋuŋa ŋe ḏiṯa namɩni ŋa gwate wiḏi ḏəmɩnyo ḏe no. aṯadujia gwiji gwun ma kɩrisṯo eiijo ŋɩdi ŋe ŋuŋa ŋe ḏiṯa no. 16na ŋiro dino aṯanyalouwɩrico ŋun ŋiŋir lagalo ŋani liji uməḏəṯo elo no, 17gi gwune ŋele ŋeḏi elo ŋate ŋiro ḏiṯa na ḏiyo no, nalmɩni ro ŋuɽun ŋun ŋiŋir na ḏouwɩɽiḏa na ḏidila ganu kwuɽɩwə gwun gwɩpiḏo pɽul. 18na ŋu gwun gwaṯəpijo kɩrisṯoŋ ŋɩru dino gwaṯiŋini eloŋu ḏugwore, na gwaṯi liji əmɩnyi. 19na ŋiro dino ouwɩricil ilgwujane ŋuɽuna ŋun ŋaṯapa ḏouwɩɽiḏa na ŋun ŋijibɩɽi nanu liŋə ŋɩmaga. 20aṯakia ŋɩru ŋeḏi elo gwan ḏiṯa no. gi gwune ŋɩdi wei ŋiŋir ganu, namɩni ŋɩki kwiji gwun gwaṯeʼe ŋɩdio ŋun ŋubɩliḏi megin gwiro kaja. 21ŋiŋir ḏa ŋa gwate maʼe jɩḏḏi, i ŋameyu ŋɩmidiə, i ŋɩmalarre ŋədi ŋun ŋobɩlkeja magalo, i ŋaḏuji, i ŋwurebɩni ḏɩməṯo ḏuŋun no. 22na ḏɩməṯo ḏun dəṯanya ouwɩrico nuro kwulo gwuŋa gi jei ganu jeḏi elo. ḏiŋiriḏa ḏaje kwiji gwun gwate gwakɩmi gwula gwuŋun ŋuɽun ŋun ŋaṯuliŋiriane no. 23namɩni gwun gwaṯubəga na ḏa maʼe gwakɩmini, gi gwune ŋɩru ŋun ŋərrulo ŋədu ŋe ḏɩməṯo no; na wei ŋun ŋədu ŋe ḏɩməṯo ŋiro no na ŋiro ŋuɽun ŋun ŋɩki.

Currently Selected:

rumiya 14: OTR1966

Highlight

Copy