rumiya 13

asa 13

ŋuɽun ŋe ḏiḏeŋɩneḏa liji lun ləṯi ŋelɩnya

1arram liji wei gwete gwete altiene gi lulo lagin ŋele ŋeḏi amɩrɩgen, gi gwune ŋele ŋate ŋiro kaja no namɩni ŋun ŋiḏəḏilo elo, na ŋele ŋun ŋigelɩnu ḏigelɩno ḏe ḏeḏi elo. 2na dino ŋu gwun gwupiga ŋele gwupiga ŋuɽun ŋun ŋigelɩlo elo, na lun lupiga lape ḏakɩmino gi lulo lagin. 3gi gwune lele late ləṯi ŋɩḏe gi ḏidujia ŋɩru ŋun ŋiŋir no, nalmɩni gi ḏidujia ḏun ḏɩki. ŋa gwate gwar gwaḏonye lelɩnya na? dujɩlo ŋun ŋiŋir na ŋa gwəṯi ḏɩbuḏia lagin, 4gi gwune jaḏam jeḏi elo jiro lugwuŋa jeḏi ŋuɽun ŋun ŋiŋir. namɩni ḏa ŋɩmalduji ŋɩki ḏonyo, gi gwune luŋa late lapo kɩwiḏio jai no, gi gwune liro jaḏam jeḏi elo ɽɩwəɽijo gwiji ḏɩɽejiḏia ganu gwun gwərrɩjo ŋuɽuna ŋɩki. 5na ŋiro dino arram ŋa gwɩtiene kwulo gwuŋa, ŋate ŋan ŋuɽun ŋe ḏɩɽeḏa ganu kuwei no, namɩm ŋan ŋuɽun ŋe dugwor dalo. 6gi gwune gwan ŋuɽun ŋeno nyalagele ṯulba dino; gi gwune luŋa liro jaḏam jeḏi elo ŋalɩnjaḏaṯa ŋeno bubruṯ. 7ḏəḏɩlo wei ŋɩdio ŋun ŋideleḏo lagin, nanyalgelɩjo ṯulba lun laṯape ṯulba, na ḏa ḏɩmaro ḏeḏi ŋele ŋeḏi amɩrɩgen yuŋa i ŋeḏi amɩrɩgen yiro kaja, na nilḏe gwun gwɩdeleḏo gwilḏe, nilnəji gwun gwɩdeleḏo gwilnəji.

ḏaminyɩḏa ŋɩmaga ŋe

8aṯanyəṯaḏa gəmɩju kwiji gwetɩdo no, nyamɩni əṯi gəmɩju kuwei gi ḏaminyɩḏa ŋɩmaga lagaloŋu, gi gwune ḏa gwete məmɩnyi gwiji gwiro kaja ŋu gwuməṯɩmi ŋuɽuna ŋun ŋigelijɩlo elo musaŋ. 9gi gwune ŋun ŋarno, atura no, aṯaɽinyɩḏa no, aṯapa ŋuɽuna no, aṯougiḏio no, aṯaŋa ŋɩdi ŋeḏi gwiji deleḏa ganu no, na ḏa ŋuɽun ŋɩmaje ŋiro kaja ŋun ŋigelɩlo elo na ŋeno wəɽəṯɩnu ldu ŋuɽun ganu ŋeno ŋun ŋarno, aṯəmɩnyi gwun gwijaḏanyagwe ga gi gwulo gwuŋa. 10gi gwune ḏəmɩnyo ḏate ḏaṯapa ŋuɽuna ŋun ŋɩki kwiji gwun gwijaḏilgwe ga no, na dino ḏəmɩnyo ḏiro ḏaṯɩṯɩmi ŋuɽuna ŋun ŋigelijɩlo elo musaŋ.

lamon leḏi kɩrisṯo lo gɩṯo

11na nyi gwuməḏi ŋuɽuna ŋeno dino na nyaŋa lilɩŋiḏi gaja na sa jɩmila jiljidiɽi ŋwar, gi gwune ḏɩkədəḏɩnə ga ḏage gwunnɩno ḏijano gɩṯo kaja gun gəmɩnyilge. 12gi gwune gili go gɩṯo gete, namɩni anyin yo gɩṯo yabuḏa; na dino ouwɩricil ilkəduni ŋɩru nanu ŋeḏi girɩm nilmɩni kani lula lage ŋɩdio nanu ŋeḏi ḏɩrra ŋeḏi bure. 13na ouwɩricije ilwewele ŋuɽun ŋe ŋun ŋideleḏo gi gwune aṯɩlwewele anyine, ŋate ŋəṯi gwobɩɽa gwun gwɩki na ḏɩrləlo no, na ŋeḏor na ḏidonyɩḏa ḏɩməṯo jiŋɩno, na ḏɩbereḏa i ḏɩɽeḏa ganu kwiji no. 14nyamɩni kani lula lalo gwele gwe gwun gwan yecu kɩrisṯo, na nya lo lanḏəḏə jiŋɩno lamon leḏi ṯɩmio ŋuɽuna ŋagin ŋun ŋɩki.

Currently Selected:

rumiya 13: OTR1966

Highlight

Copy