rumiya 12

asa 12

ḏɩmiḏa ḏun ḏiya

1na dino lɩmagəri, nyi gwuɽoṯeḏo lagalo gworki ŋino ŋe ŋeḏi elo, nyalaḏəḏə eloŋu jiŋɩno jalo gi ḏiḏugɩno ḏun ḏɩmiḏo na ḏɩpiḏo pɽul ḏun ḏaminyɩnu ḏi elo, na ŋeno ŋiro ḏorṯeḏa ḏalo ḏeḏi gwuɽɩwə. 2aṯanyagwujana ŋuɽuna ŋeḏi gɩḏilio keno no, nyamɩni ro liji lun lɩmɩdɩnu liro kaja ḏigelɩno ḏe ḏun ḏiya ḏeḏi ŋadɩgɩɽe ŋalo, kani nyəṯi ŋɩma nyagwulo ga ŋɩrṯa ŋiro ŋun ŋɩbunyɩlo elo ŋun ŋiŋir na ŋəmɩnyɩnu na ŋɩṯɩminu muma.

dapa ḏiŋiriḏa ḏe ḏiḏəḏo ḏeḏi gwuɽɩwə

3na ḏiŋiriḏa ḏe ḏun ḏiḏəḏɩnyilo nyi gwajuməḏɩjo gwete gwete lagaloŋu gwo gwənuməḏɩni gwan gwulo gwuŋun gwanarno gwanbuṯane kworo gwun gwɩdeleḏo; numɩni uməḏɩni ŋadɩgɩɽe ŋe, ŋiro gi elo gwaṯɩḏəḏə gwete gwete ḏigəgɩnyəḏɩjo ganu ḏe ḏɩməṯo. 4na ŋiro gi kaŋɩnu yetɩḏo iləṯi ŋɩdio ganu ŋutu namɩni ŋɩdi ŋeno wei ŋate ŋəṯi ŋɩru ŋetɩdo no, 5na ŋiro dino liŋə ile lutu ŋiro aŋɩnu yetɩdo ḏi kɩrisṯo, na ilro ŋɩmaga gworo gwe gwun gwiro kajakaja. 6na gi gwune iləṯi ḏiḏəḏo ḏeḏi gwuɽɩwə ḏun ḏiro kajakaja gi ḏiŋiriḏa ḏun ḏiḏəḏijɩlo, ḏa ilməṯi ḏaŋiḏio ŋuɽuna ŋun ŋijil elo aŋijo ouwɩricil ilaŋinijo gi ḏɩməṯo ḏun ḏiḏəḏije, 7i ḏa ilməṯi ḏəpijo ŋɩru, ouwɩricil aṯɩgele ŋwuɽa gi ḏəpijo ŋɩru, na gwun gwaṯalɩmiḏe aṯugele lɽa luŋun aṯuaalɩmiḏe, 8na gwun gwaṯuməḏɩjo liji ŋuɽuna ŋe ḏibɩɽeḏa nanu, aṯugele lɽa luŋun gi ḏibɩɽia liji nanu, na gwun gwaṯɩḏəḏə liji ŋɩdio ga dino ouwɩricɩlo ŋwulḏəḏə ŋino ŋe, na gwun gwəṯi ŋelɩnya ouwɩrico nuduji ŋelɩnya ḏibɩɽeḏa ḏe nanu, na gwun gwaṯino ŋwulduji ḏidila ḏe ganu.

ŋuɽun ŋeḏi liji lun liro lɩkɩrisṯin

9ouwɩricil ḏəmɩnyo ḏalo ŋunja ŋɩwɩɽɩgala ganu no. donyil ŋuɽuna ŋun ŋɩki. məṯəḏɩl ŋuɽuna ŋun ŋiŋir. 10əmɩnyɩḏil lagaloŋu ḏaminyɩḏa ŋɩmaga, nyabuḏi gworo lagaloŋu ḏinəjio ḏe. 11aṯaji ŋɩḏuna iṯa gi ḏɩpiḏa ḏugwor ḏe ŋɩru no; nanyaro lɩbuḏu kwuɽɩwə naṯanyəpijo gwelɩnya ŋɩru gwun gwiro elo; 12nyadile ganu gi ḏiḏuḏɩnɩjo; nanyaməṯini ga gi ḏɩḏia, nyajaḏaṯa gi ḏuməḏɩjo eloŋu bubruṯ, 13aṯanyalunɩjo liji ŋun ŋəṯanyalo lun lɩbɩɽaṯo lun lɩpiḏo pɽul, nanyalbɩɽi nanu gi ḏɩwəɽeno liḏa bubruṯ. 14morəḏɩlo lun laṯajɩnḏagɩɽini, morəḏɩlo na lo lanyaniḏene. 15diliḏɩle ganu lun lidilo ganu, nyaləri gwula luŋale lun ləri gwula. 16nyəṯi ŋadɩgɩɽenya ŋetɩdo ŋɩmaga lagaloŋu; nya lo labuḏi lula lalo, nyəmɩni itiene lula lalo ŋi liji lun ltti. nyaduḏa liji lun larno lilɩŋiḏi gi lulo lagin no. 17aṯanyalwəɽəpṯɩjo ŋuɽuna kworo ŋun ŋɩki no. nanyiri jei ga kani nyagele ŋuɽuna ŋun ŋideleḏo ŋiŋir gi jei ganu jeḏi liji wei. 18na ḏa ŋɩmandro, ŋiro gi gwune nyaləṯi ŋɩma jil ḏouwɩɽiḏa ḏe lijiŋale wei. 19aṯanyalərrɩjo ŋuɽuna ŋɩki gi gwune ərrɩjejilɩne no, nyaŋa lun ləmɩnyɩnu no, nanyalmɩni ouwɩrico gi ḏɩɽeḏa ganu ḏeḏi elo, gi gwune ŋulinu, ḏɩwəɽəṯɩjo ḏakɩmiḏa ḏinyi ḏiro, nyilwəɽəṯɩjo gi gwune ərrune, gwarno gwele gwun gwiro elo. 20namɩni ḏa ma jaŋu eʼe gwun gwɩkiḏiḏianyagwe ḏəḏɩlo nuʼe, na ḏa ma ouḏo e ici, gi gwune ḏa ŋɩmanyalduji ŋeno na gwumabaḏaicane ḏare nanu. 21aŋa ŋuɽun ḏamana ŋanu ŋun ŋɩki no, ŋalmɩni ḏamani ganu ŋun ŋɩki gworo gwe gwun gwiŋir.

Currently Selected:

rumiya 12: OTR1966

Highlight

Copy