rumiya 11

asa 11

ḏidonyɩḏa ḏeḏi liji leḏi isreiyil ḏate ḏəṯɩminu no

1na dino nyi gwarno, elo madonye liji luŋun a? awe, ŋate ŋiro dino ḏuṯ no. gi gwune nyi dino nyi gwiro gwiji gweḏi isreiyil, kəriḏ yeḏi lɩgwurnən leḏi ibraim, laginŋu gi ldu leḏi benyəmɩn. 2elo gwate madonye liji luŋun lun lilɩŋiḏulo gwerre na. namɩni ŋate ŋilɩŋiḏanyalo ŋun ŋarɩŋe gɩḏam geḏi elo ŋan iliya gwune gwuɽoṯeḏo eloŋu gwan liji leḏi isreiyil, 3nuarno, gwele, luŋa lɩmaɽinye nebɩŋaije luŋa, nalmaki ŋwobo ŋwuŋa, na nyi gwɩṯanu gwetɩdo, na luŋa lo lɩbunyiŋi lar liɽinye na? 4namɩni ma elo wəɽəṯɩjo ŋuɽuna ŋɩrṯa? limilwəɽi leḏi gwulo gwinyi alɩb kwoɽoṯəɽɩl lun liro ləmɩnyo lun late lɩmanculɩjo bayil galo ŋwurko ŋwe ŋwagin no. 5namɩni ŋiro dino kaja keno dino lɩmaje lun lɩṯanu lɩməṯɩnu ḏiŋiriḏa ḏe. 6na ḏa ŋɩmaro ŋe ḏiŋiniḏa namɩni ŋate ŋaro ŋɩru ŋe no, gi gwune ḏa ŋɩmaro dino ḏiŋiriḏa ḏate ḏiro ḏiŋiriḏa no. 7na gwudaro? ŋun ŋaṯɩl liji leḏi isreiyil bunyi ŋate ŋalbuje no, namɩni lun lɩməṯɩnu lɩmalbuje, namɩni lun lɩṯanu lɩbɩɽe dugwor nanu. 8gi gwune ŋulinu,

lɩmal elo ḏəḏə gwuɽɩwə gwun gwate gwaṯɩdeŋɩnejo no,

na jei kani ate alaŋu no, na nəni kani ate aldiŋɩni

kəbe na gi lamon leno no.

9na ḏauuḏ gwarno,

ouwɩricɩlo ḏiṯa ḏagin nuro gi ḏigiɽijo luŋaije,

na gɩbəɽɩnyo na ŋɩdi ŋe ḏobɩlkeja, na ḏakɩmiḏa ḏun

ḏɩwəɽəcu lagin;

10na ouwɩricɩlo jei jagin alrimi ganu kani ate aldaŋa ga no,

na duɽo dagin duɽu ganu gi gɩḏilio.

11na dino nyi gwarno, luŋa lɩmobɩlkəḏɩni kani nalubɩliḏe wɽi a? awe, ŋate ŋiro dino ḏuṯ no, namɩni ḏobɩliḏa ḏe ḏagin ḏɩkədəḏɩnə ga ḏɩmila gi liji lun liro ga dino, kani a liji leḏi isreiyil laḏɩŋane ŋuɽuna ŋun ŋidujilo alɽijo ganu alaɽuwa. 12na ḏa ḏobɩliḏa ḏagin ḏɩməpijo gɩḏilio ḏɩbona ḏutu, na ḏɩtieno ḏagin ḏɩməpijo liji lun liro ga dino ḏɩbona ḏutu, namɩni ḏaɽuwa ḏagin ḏapa ḏuṯəno ŋwamon ganu ŋwutəno.

ḏɩkədəḏɩnə ga ḏeḏi liji lun liro ga dino; ḏəŋinio ḏe ḏikanana

13gi gwune nyi gwuməḏɩjaje nyaŋa lun liro ga dino, na gi gwune nyi gwiro ḏuwəjo gi liji lun liro ga dino, na nyi gwabuḏi ŋɩru ŋeno ŋinyi, 14kani ŋuɽun ŋe ŋədi nyiliɽi liji ganu leḏi amɩrɩgen yinyi lɩlkədəḏə ga kworo lagin. 15gi gwune ḏa ḏidonyino ḏagin ḏɩmaro ḏouwɩɽiḏa ḏeḏi gɩḏilio, na ŋɩrṯa ŋiro ḏa lɩməmɩnyini namɩni ḏɩmiḏa gi ḏidiɽo gi liji lun laiyo? 16na dino ḏa jilo jun jimɩɽiḏilo elo ldu jun jiro lɽa jɩmaro jɩpiḏo pɽul, na dino jun jɩṯanu jɩpiḏo pɽul; na ḏa ḏro ḏɩmapiḏe pɽul, na dino dɩrna dun daṯobɩḏa gwaɽe nanu ḏapiḏe pɽul. 17namɩni ḏa lɩmapəne dɩrna galo kworo, na ŋa gwun gwiro gwaɽe gwun gwan seitun gweḏi geḏo, na ŋa makani kɩlɩgi ganu lagin kwaɽe, na lanyaliyu kal gete ŋau ŋeḏi ḏro na ḏɩmiḏa ḏun ḏutu ḏeḏi gwaɽe gwun gwan seitun, 18ŋa gwo gwabupaḏe ganu kwulo gwuŋa gi ḏɩrna. na ḏa ŋa mabupaḏe ganu kwulo gwuŋa namɩni aḏɩŋano ŋa gwədu gwuməṯi ḏro no, namɩni ḏro ḏiro ḏɩməṯaŋa. 19na dino ŋa gwarno, dɩrna ḏɩməpəne galo kani nyigakanenyi. 20gwerkwe ŋiro dino, luŋa lɩməpəne galo gi gwune lɩbɩɽaṯɩn ḏɩməṯo, namɩni ŋamamaṯaḏe ḏɩməṯo ḏe. ŋa gwo gwabuḏi gwula gwuŋa ŋamɩni ḏonye, 21gi gwune ḏa elo gwate mino dɩrna dun diduḏi kwaɽe no, jil muma gwate gwaŋino ŋa dino no. 22na ŋiro dino aŋəḏi diŋiriḏa ḏeḏi elo na ŋuɽun ŋuŋun ŋun ŋɩbɩɽe. ŋuɽun ŋuŋun ŋɩmaro ŋɩbɩɽe gi liji lun limobɩliḏe, namɩni ḏiŋiriḏa ḏeḏi elo ḏaje lugwuŋa ḏa ŋamajaḏaṯa gi ḏiŋiriḏa ḏuŋun, namɩni ḏa ŋate ŋɩmaro dino no ŋa dino ŋa gwaje gwouɽəne galo. 23na luŋa dino ḏa luŋa late limajaḏaṯa gi ḏɩbɩɽaṯa ḏɩməṯo ḏagin no lagakane gi gwune elo gwəṯi ŋɩma lulgakaje dino. 24gi gwune ḏa ŋamaro gwouɽəno galo kwaɽe gwun gwan seitun gweḏi geḏo gi ḏigelɩno ḏuŋun, na ŋa magakane kwaɽe gwun gwiŋir gwun gwan seitun ŋuɽun ŋe ŋiro kaja ŋədu ŋe ḏigelɩno no, na ŋwamon ganu umɩnyo leno lun liro dɩrna dun diduḏi kwaɽe lagakane kwaɽe gwagin?

elo gwubunyu liji wei lape ŋino ŋe

25na lɩmagəri, nyi gwubunyaje nyalalɩŋe ŋuɽuna ŋeno ŋun ŋɩlɩbo kani nyate nyabuḏi lula lalo no, galakwe liji leḏi isreiyil lɩmabɩɽe dugwor nanu kworo kəbe na ḏiḏuɽəḏɩno ḏeḏi liji lun liro ga dino ḏiṯɩmi na ḏiməḏi wɽi, 26na ŋiro dino liji wei leḏi isreiyil ləkədəḏɩni ga, gi gwune ŋulinu,

gwara gwətuḏə siʼun gwun gwəkədəḏə liji ga,

na gwəbɩri ŋuɽuna wei ḏi yagub ŋun ŋədu ŋeḏi elo no.

27na ŋeno ŋuɽun ŋinyi ŋun ŋɩkaiilo lagin,

gwune nyi gwəbɩri ŋuɽuna ŋagin ŋun ŋɩki.

28na gwan ŋuɽun ŋun ŋiŋir ŋeḏi yecu kɩrisṯo, luŋa liro lun lɩkiḏiḏɩl eloŋale gwan nyaŋa, namɩni gwan ŋuɽun ḏɩməṯɩno ḏeḏi elo na luŋa ləmɩnyɩnu ḏi elo gwan lɩgwurninyo. 29gi gwune eɩo gwate gwaṯɩwəri ḏiḏəḏo ḏuŋun gi liji, i ḏorniḏa ḏuŋun minu no. 30na gi gwune janya gwerre dino nya late ləṯeijo eloŋu nəni no, namɩni gwunnɩno nyalmɩnəḏɩni gi gwune liji leno late ləṯeijo nəni no, 31na ŋiro dino liji leno gwunnɩno late ləṯeijo ŋuɽuna nəni no, kani alɩnəḏɩni luŋa dino ŋino ŋe ŋun ŋaŋinu lagalo. 32gi gwune lɩmal elo laŋiṯijo wei ldu late ləṯɩn nəni no kani nulino wei.

33əgeye, ḏɩbona na ḏilɩŋeḏeno na ḏilɩŋeḏa ḏeḏi elo ḏoliḏa ganu gworki. əḏi gwiro gwəṯi ŋɩma gwalɩŋe ḏakɩmiḏa ḏuŋun, na əḏi gwiro gwəṯi ŋɩma gwabunyi kəbe nulɩŋe daṯ duŋun?

34gi gwune əḏi gwiro malɩŋe ŋaḏɩgɩɽenya ŋeḏi gwele i əḏi

gwiro gwimaŋijo ŋuɽuna?

35i əḏi gwiro gwiḏəḏə ŋɩdio gwerre kani ŋɩmulwəɽeice?

36gi gwune ŋɩdi wei ŋɩwiḏi lugwun, na ŋɩdi wei ŋigelɩnu ŋu gwe na ŋuŋun ŋiro, na ḏoɽeḏa ḏaje lugwun gi gɩḏilio. gwerkwe.

Currently Selected:

rumiya 11: OTR1966

Highlight

Copy