rumiya 10
10
asa 10
1lɩmagəri, ḏugwor ḏinyi ḏibunyu gworki na ḏuməḏɩjo eloŋu ḏinyi gwan liji leḏi isreiyil ḏiro ḏɩkədəḏɩne ga ḏagin. 2na nyi gwiteijo ga lagin niarno, lal dugwor dagin pəjo eloŋu namɩni ŋədu ŋe ḏilɩŋeḏa no. 3gi gwune liro jɩɽilo gwan ŋuɽun ŋun ŋiŋir ŋun ŋaṯɩlil elo ḏəḏə nalmɩni bunyi lagele ŋuɽuna ŋagin ŋun ŋiŋir, na late lɩtienɩjo lula lagin ŋuɽun ŋun ŋiŋir ŋun ŋaṯɩlil elo ḏəḏə no. 4gi gwune kɩrisṯo gwiṯɩmejo ŋuɽuna ŋun ŋigelijɩlo elo musaŋ, na ŋu gwiro ṯaṯ ḏeḏi ŋuɽun ŋun ŋiŋir gi liji wei lun ləmɩnyu.
ṯaṯ ḏun ḏiya ḏe ḏɩpiḏa pɽul ḏeḏi liji wei
5gi gwune musa gwuli nuarno, gwiji gwun gwaṯɩduji ŋuɽuna ŋun ŋiŋir ŋeḏi ŋuɽun ŋun ŋigelijɩlo elo musaŋ ŋuŋmiḏe. 6namɩni ŋuɽun ŋun ŋiŋir ŋe ḏɩməṯo ŋaro dino, aṯaŋara gi ḏugwor ganu ḏuŋa no, əḏi gwiro gwun gwar gwabo kanyin? gwiro gi gwarno, kani gwəgwulejo kɩrisṯoŋ ga. 7i əḏi gwiro gwun gwagwuli kalo gun gwola ganu? gwiro gi gwarno, kani gwabuja kɩrisṯoŋ gi liji lun laiyo. 8namɩni ŋɩrṯa ŋalumə? ŋuɽun ŋijano gɩṯo lugwuŋa, gi linyu luŋa na gi ḏugwor ganu ḏuŋa, i ŋuɽun ŋe ḏɩməṯo ŋun ŋaṯɩliŋumə, ŋun ŋarno, 9na ḏa ŋa məteijo yecuŋ ga linyu le na ŋarno gwiro gwele gwun gwiro elo, ŋa məmɩnyi gi ḏugwor ganu ḏuŋa naŋarno ma elo diɽi gi liji lun laiyo, ŋa gwakədəḏɩni ga. 10gi gwune ḏugwor ḏe gwiji gwəmɩnyu ŋumaro gwiŋir gi jei ganu jeḏi elo, na linyu le gwəteijo ga nukədəḏɩni ga. 11gi gwune gɩḏam geḏi elo garno, gwatɩn gwetɩdo gwun gwəmɩnyi gwa ḏare ape no. 12gi gwune gwiju gwate gwidono ḏi gwugrigi no, gi gwune gwele gwetɩdo gwun gwiro elo gwiro gwele gweḏi liji wei, na gwutu ḏɩbona gi liji wei lun laṯorniḏe lugwun. 13gi gwune liji wei lun laṯornɩḏe jiri je jeḏi gwele ləkədəḏɩni ga.
14namɩni galakwe nalorniḏaṯe lugwun gwun gwate gwəmɩnyilgwe no? na galakwe gwalgwəmɩnyi gwun gwate gwudiŋɩnilgwe no? na galakwe ladiŋɩni ḏa gwiji mete gwun gwuməḏɩjilo no? 15na galakwe laluməḏɩjo ḏa late lɩmawəjɩni no? gi gwune ŋulinu kɩḏam geḏi elo, eʼe galakwe ŋwara ŋweḏi liji lun laṯumə ŋuɽuna ŋiŋir ŋe ḏouwɩɽɩḏa ŋwiŋir gi jei, 16namɩni luŋa wei late lɩməṯeijo ŋuɽuna ŋun ŋiŋir ŋeḏi yecu kɩrisṯo nəni no, gi gwune isaia gwarno, gwele gwun gwiro elo, əḏi gwiro gwuməmɩnyi ŋuɽuna ŋəri? 17na dino ḏɩməṯo ḏiwiḏi ḏidiŋɩna ḏe, na ḏidiŋɩna ḏiwiḏi ŋuɽun ŋe ŋeḏi kɩrisṯo. 18namɩni nyi gwarno, luŋa late lɩmədiŋɩni na? i gwerkwe,
ŋwal ŋwagin ŋwuwɩreḏelo kɩḏilio ganu wei,
na ŋuɽun ŋagin kalo goleno ganu geḏi gɩḏilio.
19namɩni nyi gwarno, ŋate ŋilɩŋiḏɩlo lun liro liji leḏi isreiyil na? gwerre ganu musa gwarno,
nyi gwajɩki ḏugwore liji le lun late leḏi gwele gwetɩdo no,
na liji le leḏi gwele gwetɩdo lun liro jɩɽilo nyi gwajɩɽi ganu
cicer.
20namɩni isaia gwubɩɽe nanu gworki na gwarno,
libujɩlo lun late libunyiŋi no,
na lilaŋinijo lun late liɽoṯeḏenyi no.
21namɩni gwan liji leḏi isreiyil nuarno,
ganyin nyi wali di ḏinyi ganu gi liji lun late ləṯi nəni no,
na lun lɩkiḏiḏianale.
Currently Selected:
rumiya 10: OTR1966
Highlight
Share
Copy
Want to have your highlights saved across all your devices? Sign up or sign in
Nuba, Otoro New Testament
© British and Foreign Bible Society, 1966.
