ŋɩru ŋun ŋapɩlo duwəjo 27

asa 27

ḏiwila ḏeḏi bulus rumiya, na kariṯ

1na gwune nalarno ilwele murkab gwe iṯalia nalɩgele bulusŋaije ŋwubabuny ŋwe gi ḏi ḏeḏi gwete gwan yulus, gwun gwiro gwele gweḏi ajana yun yiro ḏuɽi di yeḏi ajana yeḏi uguṯus. 2nijiləḏɩje kwu murkab ganu gweḏi adrəmɩṯinia gwun gwar gwele gi jɩmɩrɩgen jun jijo kɩməmu elo geḏi asia. nanawele ariṯakusŋale gwun gwiro gwete gweḏi makɩḏunia gweḏi amɩrɩgen yun yan ṯasaluniki. 3na giləganu nanaṯɩmi saiḏa. na yulus ərrɩjo bulusŋ ŋuɽuna ŋiŋir nuouwɩrico nuwele gwanaŋaḏa lɩmeḏin alaŋiḏa. 4gwune nanawalane ŋɩnəwei murkab gwe nanawila ṯaṯ gelio gabarus gwe na ḏɩron ḏakəjije, 5gwune nanamuri gi ḏirawe elo ḏun ḏaṯɩdare kilikia na bambilia nanaṯɩmi mira amɩrɩgen yeḏi likia. 6na ŋɩnəwei na gwele gweḏi ajana yun yiro ḏuɽi di buje murkab gwete gweḏi akandria gwar gwaŋawele iṯalia; nuŋwijɩnəḏɩje. 7gwune nanawele murkab gwe ŋwamon ŋwutu mɩce mɩce, nanawele lɩḏɩmiḏɩnu gɩṯo kiniḏus, na ḏɩron ḏate ḏimijouwɩrico nanawele morrr no, nanawele gelio kariṯ gwe gɩṯo salimuni; 8na gwune nanawele lɩḏɩmiḏɩnu, nanawila kalo gan ḏimɩɽino nanu, gun gijo gɩṯo kamɩrɩgen yan lasaiya.

maliṯa: ḏɩron ḏutu na murkab make

9na gwune na ŋwamon uti na ŋuɽun ke gi ḏiwila murkab gwe, gi gwune ŋwamon ŋwe ḏɩməṯo əbuṯo ŋwimete nal bulus uməḏɩjo nuleicɩno, 10lele le, nyi gwilɩŋiḏi ḏɩḏia na ḏigereḏa ga ḏutu ḏaje kwilo kweno, gwədu murkab gwe na ŋɩdi ŋe ŋuŋun cucun no, namɩni liŋə gi lulo lage dino. 11namɩni gwele gweḏi ajana yun yiro ḏuɽi di diŋɩni ŋuɽuna ŋeḏi gwiji gwun gwaṯɩwiwili murkab na ŋeḏi gwele gweḏi murkab ŋutəno kworo gweḏi bulus. 12na gi gwune galo kono gate giŋir gwun jiga ḏoɽom ḏe no, lutəno lagin lar lawalane kalo kono, nalarno lawele binikia na ḏa lɩməṯi ŋɩma alijaga ŋɩnəwei ḏoɽom ḏe kalo gun gɩmɩɽinu nanu geḏi kariṯ, gun gaṯɩlgidiŋaḏaṯa lakwogwo gwe kalo gun gaṯɩn anyin abuḏa na gelio gwe.

13gwune na ḏɩron abuḏa ḏun ḏiwiḏi gelio gwe upiə mɩce mɩce nalarno lɩmabuje ŋuɽuna ŋiro gi gworo gwun bunyilo, nalabuja ajirɩjiro yun yəṯi gwaŋ gwɩni bucu yun yaṯɩḏuḏɩni murkab ŋau ganu, nalwele gɩṯo kɩməmu elo kariṯ. 14nalwele mɩce na ḏɩron gwulə ḏutu lagin kwu murkab ḏun ḏiro ŋədura. 15gwune na ḏɩron məṯo murkab nate nuəṯi ŋɩma gwele kɩɽelo gwe no, nanouwɩrico ḏɩronia nuape murkab kaja guŋun. 16nanəmɩliḏe ga lɩrgwoma nanu lɩti gi diɽil lan kaludi kalo gun gate ḏɩronia no, nanəṯi ŋɩru ŋɩbɩɽe gi anabuje murkab gwun gwɩti. 17na gwune luŋa nalabuje, nalapa car nalɩgwuli ga gelio nalgaki murkab gwun gwubuḏo; na gi gwune naldonye nalarno ḏɩron ḏa gwuloḏeṯa murkab kalo gun giro mumuɽuṯ, nalgwulejo jiria ga jeḏi murkab nal ḏɩron ape. 18na gwune na ḏɩron je ḏɩbuḏo nejipi gworki, na giləganu na luŋa naliḏeije ga louwini ŋɩdi ŋe gi ḏɩrawe. 19na gwune na ŋwamon ro ṯəɽɩl nalwini ŋɩdi ŋe di dagin de ŋun ŋaṯilɩŋape ŋɩru kwu murkab. 20gwune na anyinŋa ŋwudum ŋwe nal jəbɩɽu kɩɽɩbə nate naloɽa ga ŋwamon ŋwutu no, na ḏɩron ḏɩbuḏo ḏɩpiḏije, na ḏiḏuḏɩnɩjo ḏəri ḏɩmete ḏe ḏəbɩrino.

21na luŋa gwune naljiga ŋwamon ŋwutu late liṯin no, na bulus diɽi kɩlɩgi ganu lagin nuleicɩno, lele le, ḏa nyaldəŋɩnəḏi ilate laŋawila kariṯ no, na jiŋɩno jate jaŋəme nanu dino no, na ŋɩdi ŋate ŋaŋapiḏaṯe ga no. 22na gwunnɩno nyi gweiceijɩno, bɩɽiḏɩl nanu, gwate gwetɩdo lagalo gwanai no, namɩni murkab gwakɩre. 23gi gwune gwiji gweḏi kanyin gwuḏuḏɩneji giliŋ kono gweḏi elo, gwun gwaṯiəpijo ŋɩru na nyi gwuŋun gwiro. 24nuŋwieicɩno, aṯaḏonyɩḏa bulus no; arram ŋa gwaḏuḏɩni gi jei ganu ḏi gesar. na eʼe, elo gwiḏəḏaŋalo wei lun lɩwiḏanyale. 25na ŋiro dino lele le, bɩɽiḏɩl nanu, na nyi gwaṯəmɩnyi eloŋu na ŋuɽun ŋar gi gwune uməḏɩjinyi. 26namɩni gwerkwe gwijoba gwijiwɩrleje kɩməmu elo geḏi lɩrgwom lete.

27na gwune na ŋwamon ro di na kwoɽo gilio, nuŋwiji ḏɩron wɩwɩrleje kajakaja gi ḏɩrawe ḏun ḏan adria, na gɩlɩgina ganu ləmɩnyo leḏi murkab nallɩŋe lo gɩṯo kamɩrɩgen yəḏi; 28nalgwuleje ajirɩjiro ŋau ganu nalɩbuje ŋau ŋore ŋiro liji ganu ḏuɽi dɩttən. nalijiga mɩce nalaɽu naliḏeije mɩna nalɩbuje ŋɩmaro liji di na ṯoḏɩne. 29naldonye nalarno lali murkab wele kalo geḏi nyol, nalmɩni wini jaba je kwoɽo gɩdo gwe kwu murkab naluməḏɩjo eloŋu galo gwure. 30gwune na ləmɩnyo leḏi murkab are labɩre nalgwuliə murkab gwun gwɩti kworo gwun gwubuḏo gi gwune arɩl ligwulejo ajirɩjiro ga kɩɽelo kwu murkab yun yəṯi laŋ lɩni bucu lun laṯɩḏuḏɩni murkab. 31na bulus eico gwelɩnya gweḏi ajana yun yiro ḏuɽi di na ajana no, na ḏa leno late limajaḏaṯa kwu murkab ganu no, nya late ləbɩrini no. 32na ajana uɽə car ganu jeḏi murkab gwun gwɩti nalouwɩrico nuideḏe.

33na gwune na galo je gɩṯo gar guɽa, nal bulus uməḏɩjo laʼe ŋɩdio nuleicɩno, gwunanyine ŋwamon ŋwɩmaro di na kwoɽo ŋwun ŋwɩḏuḏɩnɩjenya ŋwe ḏəbɩrino, nanyamaməṯo əbuṯo nanyajiga jaŋu. 34na ŋiro dino nyi gwo gwuməḏɩjaje nyalaʼe kani nyabɩɽe nanu, na gwo gwanwani əɽu gi lɽa elo gwete lagalo. 35gwune nuar dino nuape gia, nuguməḏɩjo eloŋu gi jei ganu lagin wei; nubɩleṯɩnya ganu nuar galʼe. 36na wei nalbɩɽe nanu nalʼe dino. 37na anaŋa wei lun lijo kwu murkab ganu andro jɩnei jɩttən na ḏuɽi ṯəɽɩl na nyəɽɩl. 38na gwune nalpe, luŋa nalwini ŋwon ŋwe gi ḏɩrawe kani a murkab ouwɩri ganu.

39na gwune na galo uɽe nate nallɩŋe gala no; nalmɩni aŋu gala gwuɽo ganu gəṯi gɩməmu, naluməḏəṯe laginŋu nalarno kani aldare murkab gwe ḏa ŋɩmandro. 40naluɽə ajirɩjiro ganu yun yəṯi laŋ lɩni lun laṯɩḏuḏɩni murkab nalouwɩrico ŋau ganu, naldi car ganu jeḏi gwaŋ gwun gwaṯɩwɩwɩrli murkab, naldiɽeije giria elo gun gijo kɩɽelo gwe gi ḏɩron, nalwele kɩməmu elo gwe. 41nalwele kalo gun gaṯɩn ḏɩrawe ubiḏate, na murkab ḏuḏɩni kamuɽu; na galo geḏi murkab kɩɽelo gwe na amuɽu məṯo ḏiḏir, na ŋɩma ŋeḏi ŋau ŋaṯupi gworo nalar ŋakɩri murkab gɩdo gwe. 42na ajana arno yaɽinye ŋwubabunya, yarno ŋwapi ŋau alabɩre; 43namɩni gwele gweḏi ajana yun yiro ḏuɽi di arno gwəbɩri bulusŋ, nuakajo ajana; nugele ŋuɽuna nuarno lun ləṯi ŋɩma lapi ŋau, algɩɽiṯiə aldu gwerre alṯɩni kɩməmu elo; 44na lun lɩṯanu, kworo alumi jɩburə naljiwele, na kworo alumi ŋɩdio ŋeḏi murkab nalŋɩwele. na ŋiro dino nalubɩḏɩni wei ŋau ganu naltu kɩməmu elo.

Currently Selected:

ŋɩru ŋun ŋapɩlo duwəjo 27: OTR1966

Highlight

Copy