ŋɩru ŋun ŋapɩlo duwəjo 26

asa 26

bulus gwuməḏi gi jei ganu jeḏi agɩribas

1na agɩribas eico bulusŋ no, ŋa gwəṯi ŋɩma ŋa gwumə wɽi ŋeḏi gwulo gwuŋa. na bulus wali ḏi ganu nulwɩrlijo ŋuɽuna gan gwulo gwuŋun. 2nyi gwəḏuɽəḏɩjo gwula gwi gwadile ganu, gwele gwun gwan agɩribas, gi gwunanyine kweno ŋimiluməḏə ŋeḏi gwulo gwi gi jei ganu lugwuŋa ŋuɽun wei ŋun ŋicɩgiŋe liju. 3nimɩni dile ganu ŋutəno gi gwune ŋilɩŋiḏəlo muma gɩmuri wei geḏi liju na ŋuɽun ŋagin. na dino nyi gwubunyu lugwuŋa ŋa gwacire bibi ŋwideŋɩnejo. 4na liju wei lilɩŋiḏi ŋuɽuna ŋe ḏɩmiḏa ḏinyi gwune gwerre ganu duḏi ŋaɽe naṯɩje gi liji ganu linyi urucəlim; 5lun lilɩŋiḏɩnyi uro gwerre, ḏa lɩməmɩnyi alaŋiḏi ŋwinyi, galakwe nyi gwiro gwete gi lɩbarɩsi gwun gwɩdɩmiḏi gɩmuri gəri gutəno gworo gwe lɩbarɩsi. 6na gwunnɩno nyi gwo gwuḏuḏɩnu nyakɩmini ŋuɽun ŋe ḏiḏuḏɩnɩjo ŋun ŋarɩŋe elo no ŋulḏəḏə lɩgwurnəri ləri; 7ŋun ŋɩḏuḏɩnijɩlo əriḏ yəri di na gwuttən ŋalɩməṯo ŋapɩjɩlɩŋe eloŋu ŋɩru muma anyine na gilio. na gwan ḏiḏuḏɩnɩjo ṯeno gwele, ŋeno ŋɩcɩgiŋɩŋe liju. 8gwudaro gəko na ŋuɽun bɩɽe lagalo nanyarno lal elo diɽi lun laiyo? 9na gwerkwe nyi kwulo gwi nyi gwarno arram nyi gwape ŋɩru ŋutu ŋun ŋɩdonyiŋe jiri jeḏi yecu gweḏi nasɩra. 10na ŋərrine dino urucəlim; nilaŋiṯəjo kɩrkon lutu lun lɩpiḏo pɽul, ŋele ŋe ŋun ŋapɩlo gi jɩsis jun jɩbuḏo na gi gwune leliɽinyɩḏɩlo niəmɩnyi dino. 11naṯɩlakɩmi ŋwamon ŋwutu gi lɩdunu wei leḏi elo, naṯɩlremeṯeḏeice alḏene; niɽe ganu lagin cicer naṯɩniḏagɩɽini gi jɩmɩrɩgen jiro kaja. 12na gwune wiḏi ḏimiska nyi arra dino ŋele ŋe na ḏuwəjo ḏe ḏeḏi jɩsis jun jɩbuḏo, 13gwele kwe, anyino ganu niaŋu gi ṯaṯ bure gweḏi kanyin gwoɽəḏene ga kanyin nuŋwioɽejo ga na lun lɩwiḏanale. 14gwune nanalaici ga kwɩnyəm nidiŋɩni ŋuɽuna ŋuŋwiluməḏɩjo ŋuɽuna ŋeḏi lɩbrani nuŋwileicɩno, sawul, sawul, gwudaro gəko naṯunŋwinḏagɩɽini? ŋɩki lugwuŋa ŋa lupəḏeice kɩɽelo dino. 15nieicɩno, ŋa gwan əḏi gwele? na gwele arno, nyi gwan yecu gwun gwaṯanḏagɩɽini. 16namɩni ŋaḏuḏɩni ŋwara ŋwe ŋwuŋa; gi gwune aŋinijaŋa kani ŋwaŋəduji gaḏam na ḏaŋiḏio ḏinyi gwan ŋɩdi ŋeno ŋun ŋaŋəḏəlo, na dino ŋɩdi ŋun ŋaŋinjoŋaŋe; 17na nyi gwəbɩriaŋa gi liji ganu na gi liji ganu lun liro ga dino lun lar laŋanuwəje gwunnɩno. 18naliḏi jei jagin, nalwɩrla ga kɩrɩm ŋalaɽuwaḏa kwu bure, na ŋɩma ŋeḏi seiṯan ŋalaɽuwaḏa ḏi elo, nal elo ḏuḏɩjo ganu ŋuɽun ŋagin ŋun ŋɩki, nalməṯo ḏiɽenyeḏa liji le lun lɩpiḏo pɽul ḏɩməṯo ḏe nyi gwe. 19na dino gwele gwan agɩribas, nyi gwate gwudonye ḏəṯeijo ŋuɽuna gəni ŋun ŋəŋinu gi ŋwume ŋeḏi kanyin no; 20namɩni gwerre nyi gwuməḏɩjo liji leḏi ḏimiska nə leḏi urucəlim, na leḏi yauḏia wei, na gɩdo lun liro ga dino, alwɩrla ga ŋuɽun ŋagin ŋun ŋɩki alaɽuwaḏa ḏi elo, alape ŋɩru ŋun ŋaŋiḏi ŋuɽuna ŋe ḏuwɩrla dugwore ga. 21na ŋuɽun ŋiro ŋeno ŋiməṯɩŋe liju kwu dunu gweḏi elo gwun gwubuḏo, nalaro liɽinye. 22naŋwimɩni elo dɩme, nyi gwajɩre nyilaŋiḏi gi liji lun lɩtilɩti na lun lɩbuḏo dino kəbe gwunanyine. nyi gwate gwanarno ŋuɽun ŋədi no namɩni ŋuɽun ŋeḏi nebɩŋa musaŋale ŋun ŋarɩlɩŋino ŋila; 23galakwe kɩrisṯo gwiḏe, na galakwe ŋu gwaro gwerre gi ḏidiɽo gi ḏaiya, gwaŋiḏi bure gi liji na lun liro ga dino. 24na gwune na bulus umə dino ŋeḏi gwulo gwuŋun, na baṯus uməḏɩjo ŋuɽuna ŋɩbuḏo nueicɩno, bulus, ŋa gwiro gɩɽilo; ḏalɩmia ḏuŋa ḏun ḏutu ḏimaŋəduji gɩɽilo. 25namɩni bulus eicɩno, baṯus gwun gwubuḏo, nyi gwate gwiro gɩɽilo no, nyi gwuməḏi ŋuɽuna ŋiro gwerkwe ŋadɩgɩɽe ŋe. 26na gwele gwilɩŋiḏi ŋuɽuna ŋeno. na gi jei ganu juŋun nyi gwuməḏi ḏibɩɽeḏa ḏe nanu, na nyi gwilɩŋiḏi ŋuɽun ŋatɩnɩŋe ŋɩlɩbo lugwun no; na ŋuɽun ŋeno ŋate ŋɩlɩbo gi nyirbuṯu no. 27gwele gwun gwan agɩribas, ŋa gwəmɩnyejo nebɩŋaije a? nyi ŋwilɩŋiḏi mumə ləmɩnyəlo. 28na agɩribas eico bulusŋ no, na ŋuɽun ŋe ŋɩti ŋa gwarno gwidi nanu nyiro gwukɩrisṯin a? 29namɩni bulus eicɩno, nyi gwaṯuməḏɩjo eloŋu ŋuɽun ŋe ŋɩti i ŋutu ŋa gwədu cucun no, namɩni wei lun lɩdeŋɩniji dino gwunnɩno anyine alro gi nyi aṯɩlmɩni kana ajirɩjir ye no. 30gwune nuar dino na gwele diɽi na mudir na bərnika na lun lijille ga; 31na gwune naldaka mɩce nalwɩrləḏiḏi nalarno, gwiji kweno gwate manduji ŋuɽuna ŋe ḏiɽinyɩḏa na ḏɩkana no. 32namɩni agɩribas eico baṯusŋ no, gwiji kweno gwəṯi ŋɩma gwakədənə ga ḏa gwədu gwubunyu gesarŋ no.

Currently Selected:

ŋɩru ŋun ŋapɩlo duwəjo 26: OTR1966

Highlight

Copy