ŋɩru ŋun ŋapɩlo duwəjo 28

asa 28

bulus gwo maliṯa

1na gwune nanəbɩrini nanalɩŋe lɩrgwoma lun luɽeico ḏɩrawe ga lan maliṯa. 2na liji leḏi lɩrgwom lono nuŋwijilino gworki, nuijiludəḏɩjo igo, nuijilgwulo wei gi gwune gau gɩnu na galo gɩnyidi ga. 3na gwune na bulus wəɽeice duɽi ldu nulgele kigo, na ḏuŋə tuḏo kəgiriə ganu, numəṯo ḏi ḏuŋun. 4gwune na liji leḏi lɩrgwom aŋu ḏuŋɩnyaŋe ḏirdɩnu gi ḏi ḏuŋun naluməḏəṯe laginŋu, nalarno, gwerkwe gwiji kweno gwuɽinyɩḏo ḏɩmar gwun gwubɩḏɩnu ŋau, namɩni gwate gwa ŋuɽun ŋun ŋɩḏuḏɩnu ga ouwɩrico gwəmɩḏe no. 5na bulus wini ḏuŋə ḏe kigo, gwate manarre ŋuɽuna ŋədi no. 6nalḏuḏɩni nalarno aŋɩnu yuŋun yar yandiɽo amuḏi, i gwaici ga gwai nyɩkwom. gwune naleṯeḏa gɩtten nate nanaŋu manarre ŋuɽuna ŋədi no, nalbi ŋadɩgɩɽenya ganu nalarno gwiro elo.

7naluɽeico gala ga kono nagijo gala geḏi gwele gweḏi lɩrgwon gwun gwan bubilus, na ŋu mijiməṯo nuijiduji liḏo ŋwamon ṯəɽɩl. 8na baba gweḏi bubilus gweḏeḏo nanu aŋɩnu yuŋun yɩbuḏu nanu naṯuŋwuru ŋuwəno, na bulus əḏi lugwun nuuməḏɩjo eloŋu nungele ḏi elo, nugele muma. 9na gwune na ŋuɽun ŋeno wila, kworo lun leḏeḏo nanu leḏi lɩrgwom lono nalwila lugwun nalgelini muma. 10lun laṯijinəji gworki; na gwune nananwalane murkab gwe, nuŋwijilḏəḏə ŋɩdio ŋun ŋɩbunyanalo.

ḏiwila rumiya ḏiwiwiḏi nyoyon

11gwune na luwə ro ṯəɽɩl nanəḏi kwu murkab ganu gweḏi akandria gwun gwijiga gi lɩrgwoma nanu ḏoɽom ḏe gwulinu ŋwule ŋweḏi nyaɽe nyittən nyeriḏɩnu nyun nyiro ləmɩnyə. 12nanaṯɩmi sarakus nanɩjiga ŋɩnəwei ŋwamon ṯəɽɩl. 13na ŋɩnəwei nanawele liro kɩḏɩriḏ nanaṯɩmi rigiyun; nanajiga lamtɩdo na ḏɩron obɩḏa gelio gwe, na lamon lete nalwila buṯiwul. 14na ŋɩnəwei nanabule lɩmage nalarno ananlijiga ŋwamon kwoɽoṯəɽɩl, na dino nanwila rumiya. 15na ŋɩnəwei gwune na lɩmage diŋɩnno anəmɩla, nalwila nanalobeḏe gi cu jeḏi abiyus kalo gun gəṯi ŋwumədelə ṯəɽɩl; gwune nal bulus aŋu nueico eloŋu sukran nubɩɽe nanu. 16na gwune nanəḏi rumiya na gwele gweḏi ajana yun yiro ḏuɽi di ḏəḏə bulusŋ ŋuɽuna gwalijiga ajana ye kaja yedɩmiḏi.

bulus gwuməḏɩjo liju lun laṯɩweleḏa lugwun rumiya

17gwune na ŋwamon ete ŋwun ŋwiro ṯəɽɩl, na bulus orniḏa liju lun lɩbuṯano alaɽuwaḏa ldu. na gwune nalwila lugwun nuleicɩno, lɩmagəri, nyi gwate manduji ŋuɽuna ŋun ŋaki liji no, i ŋun ŋimɩniŋidonye gɩmuri geḏi lɩgwurninyo lage no, nyilmɩni ḏəḏə liji leḏi rumiya uro urucəlim nyi gwiro lɩbabuny. 18na luŋa gwune iḏeijɩnyilo lar linyikədə ga gi gwune ŋuɽun ŋate ŋijo ŋe ḏaiya lugwi no. 19na gwune na liju donye ŋuɽuna ŋeno, niŋilremeṯeḏeice gi ḏibunya gesarŋ, namɩni nyi gwate gwəṯɩn ŋuɽuna ŋe ŋicɩgiŋe liji linyi no. 20na ŋiro dino ŋiɽoṯeḏɩŋe lagalo ŋwilaŋu inaŋiḏe; gi gwune ḏiḏuḏɩnɩjo ḏeḏi isreiyil nyikanu ajirɩjir ye yeno. 21naleicɩno, anate nimanape jɩḏam yauḏia jan ŋa no, na gwate gwete gi lɩmage manwila ŋɩne gwijinuməḏɩjo ŋuɽuna ŋɩki ŋan ŋa no. 22namɩni anar nandiŋɩni lugwuŋa ŋuɽuna ŋun ŋaṯaŋare. na ŋeno ŋilɩŋinu lagəri na kalo wei liji laṯuməḏəṯo ŋuɽun elo ŋeno ŋun ŋiro kaja.

23gwune nalaŋiḏi lamon lun liŋir laliwila lugwun lutu kwu dunu gwun gwaṯunje; naṯɩluməḏɩjo mimmi gilio kəbe na galo ro garage nulaŋijo ŋuɽuna ŋeḏi ŋele ŋeḏi elo, nuarno lulidi nanu yecu gwe ŋuɽun ŋe ŋun ŋigelijɩlo elo musaŋ na ŋeḏi nebɩŋa. 24na kworo naləmɩnyi ŋun ŋuməḏulo, namɩni kworo nalde. 25na gwune nate naləmɩnyejiḏi laginŋu no, nalwele gwune uməḏɩjɩlo bulus ŋuɽuna ŋetɩdo nuleicɩno, gwuɽɩwə gwun gwɩpiḏo pɽul gwuməḏɩjo lɩgwurninyo lage gwerkwe isaia gwe gwun gwiro nebi, 26nuleicɩno,

wiḏɩl gi liji leno nyaleicɩno,

ḏidiŋɩna ḏe nyaldiŋɩnu namɩni nya late lalɩŋe no;

na ḏaŋaḏa ḏe nyaladaŋa ga namɩni nya late laŋu no;

27gi gwune dugwor deḏi liji leno dɩni,

na nəni nagin diŋɩni nɩrimo ganu,

na luŋa nalməṯo jei jagin;

i gwəṯi ladaŋa ga jei je jagin,

naldiŋɩni nəni ne nagin

nallɩŋe dugwor de dagin

nalwɩrla ga na nyilgele muma.

28na ŋiro dino lɩŋiḏɩl nyarno, ḏɩkədəḏɩnə ga ṯeno ḏeḏi elo ḏuwəjɩnu gi liji lun liro ga dino na luŋa aldiŋɩni dino. 29na gwune nuumə ŋuɽuna ŋeno na liju ele luməḏəṯi ŋuɽun elo ŋutu.

ŋuɽun ŋun ŋiro gɩdo

30na bulus jiga jɩḏilio jɩttən kwu dunu gwun bibiru əlgɩrucə ye yuŋun, naṯulməṯo wei lun laṯɩwila nalijiga lugwun, 31naṯuluməḏɩjo ŋuɽuna ŋan ŋele ŋeḏi elo, nulalɩmi ŋuɽun ŋan gwele gwun gwan yecu kɩrisṯo ḏibɩɽeḏa ḏe nanu wei naṯɩn gwiji gwetɩdo akajo no.

Currently Selected:

ŋɩru ŋun ŋapɩlo duwəjo 28: OTR1966

Highlight

Copy