1 kurinṯus 13

asa 13

ḏamiyo ḏiro ḏiḏəḏo ḏun ḏɩbuṯano wei

1na ḏa nyi mumə ḏuməḏo ḏe ḏeḏi liji na ḏeḏi liji leḏi kanyin, namɩni nyi mete ḏəmɩnyo no, namɩni nyi gwiro ŋi aba yun yiro gwui yun yaṯare ganu na ṯəbəl ḏun ḏɩpiḏɩlo. 2na ḏa nyi məṯi ḏiḏəḏo nyi ŋwaŋiḏi ŋuɽuna ŋun ŋaŋijiŋilo elo, na ŋilɩŋiḏɩlo wei ŋun ŋɩlɩbo na ḏilɩŋeḏa wei, na ḏa nyi məṯi ḏɩməṯo wei kəbe niəbɩri ŋwurgwoma, namɩni nyi mete ḏəmɩnyo no, nyi gwate no. 3na ḏa limilḏəḏə ŋɩdio ŋinyi wei kani lun late ləṯi ŋɩdio no laʼe, na ḏa nyi məḏəḏə aŋɩna yinyi ḏɩnuna, namɩni nyi mete ḏəmɩnyo no, namɩni ŋate ŋɩbəḏəṯɩjo ŋuɽuna ŋədi ŋun ŋiŋir no.

4ḏəmɩnyo ḏaṯɩməṯo ḏugwore na ḏiro ŋino, na ḏəmɩnyo ḏate ḏaṯɩɽe ganu kwiji no, na ḏate ḏaṯabupaḏe ganu gi jei ganu jeḏi liji no, na ḏate ḏaṯɩbuḏi gwula no, 5na ḏate ḏiro ŋuɽuna garɩbuṯ no, na ḏate ḏaṯɩbunyi ŋuɽuna ŋan gwulo gwuŋun no, na ḏate ḏaṯɩje ganu cou no, na ḏəmɩnyo ḏate ḏaṯɩḏuɽəḏɩjo gwiji ŋuɽuna ŋun ŋɩki no, 6na ḏate ḏaṯɩdile ganu ŋuɽun ŋun ŋɩki no, namɩni ḏaṯɩdile ganu ŋuɽun ŋun ŋiro gwerkwe. 7ḏəmɩnyo ḏaṯɩməṯo ḏugwore ŋuɽun wei, na ḏaṯəṯi ḏɩməṯo ŋuɽun wei, na ḏaṯɩḏuḏɩnɩjo ŋuɽuna wei, na ḏaṯupini ŋuɽuna wei.

8ḏəmɩnyo ḏate ḏaṯete ḏuṯ no, namɩni ḏa ḏaŋiḏio ḏɩmaje ḏeḏi ŋuɽun ŋun ŋaŋijilo elo namɩni ḏete; na ḏa ḏuməḏo ḏɩmaje ḏun ḏiro kajakaja ṯono ḏete, na ḏa ḏilɩŋeḏa ḏɩmaje namɩni ḏete. 9namɩni liŋə nilɩŋiḏi ḏilɩŋeḏa kworo, na nilaŋiḏi ŋuɽuna kworo ŋun ŋaŋijijɩlo elo, 10namɩni ḏa ŋɩmila ŋun ŋiro muma, namɩni ŋwuleti ŋun ŋɩti ŋeḏi gwerre. 11gwune duḏi gwɩti nyi gwaṯumə gi ŋaɽe ŋun ŋɩti, naṯiuməḏɩni gi ŋaɽe ŋun ŋɩti; namɩni gwunnɩno niro gwuɽun na nyi meti ŋuɽuna ŋeḏi ŋwugɩḏe. 12gi gwune gwunnɩno liŋə ilaŋalaḏe kwu madara nyinyabir, namɩni kaja gəwei ilaŋiḏe gi jei ganu muma. gwunnɩno ŋilɩŋiḏɩlo kworo namɩm kaja gəwei ŋilɩŋe gi gwune ilɩŋiḏinu. 13na dino ŋuɽun ŋeno ṯəɽɩl ŋajaḏaṯa, ḏɩməṯo na ḏiḏuḏɩnɩjo na ḏəmɩnyo, namɩni ŋun ŋɩbuṯano gi loro lun liro ṯəɽɩl ḏəmɩnyo ḏiro.

Currently Selected:

1 kurinṯus 13: OTR1966

Highlight

Copy

Compare