1 kurinṯus 14

asa 14

ḏiḏəḏo ḏeḏi ḏaŋiḏio ŋuɽun ŋun ŋaŋijilo elo, na ḏuməḏo ḏun diro kajakaja

1bunyil ḏəmɩnyo, nanyabunyi ḏiḏəḏo ḏeḏi gwuɽɩwə, nyamɩni bunyane ḏaŋiḏio ŋuɽuna ŋun ŋaŋijajɩlo elo. 2gi gwune ŋu gwun gwuməḏi ḏuməḏo ḏe ḏun ḏate ḏilɩŋiḏɩlo no, gwate gwaṯuməḏɩjo liji no namɩni elo, gi gwune gwatɩn gwetɩdo gwadiŋɩni no; namɩni gwuɽɩwə gwe gwaṯumə ŋuɽuna ŋun ŋɩlɩbo. 3namɩni gwun gwaṯaŋiḏi ŋuɽuna ŋun ŋaŋijilo elo gwuməḏɩjo liji ŋuɽuna ŋun ŋaṯɩlibɩɽi nanu, na ŋaṯɩlimoɽe ganu. 4na ŋu gwun gwuməḏi ḏuməḏo ḏe ḏate ḏilɩŋiḏɩlo no gwaṯɩbɩɽi gwula gwuŋun nanu; namɩni gwun gwaṯaŋiḏi ŋuɽuna ŋun ŋaŋijilo elo gwabɩɽi kɩniso nanu. 5namɩni nyi gwəmɩnyu nyaŋa wei lumə ḏuməḏo ḏe ḏiro kajakaja, namɩm nyi gwəmɩnyəno nyaŋiḏi ŋuɽuna ŋun ŋar ŋajɩl elo aŋijo; gi gwune ŋu gwun gwaṯaŋiḏi ŋuɽuna ŋun ŋaŋijilo elo gwubuṯano kworo gwun gwuməḏi ḏuməḏo ḏe ḏiro kajakaja, ḏa gwate mawɩrli ŋuɽuna ga kani a kɩniso bɩɽe nanu no. 6namɩni dino lɩmagəri, ḏa nyi mila lagalo na nyi gwumə ḏuməḏo ḏe ḏun ḏiro kajakaja, namɩni nyi gwajibəḏəṯɩjo ŋuɽuna ŋɩrṯa ŋiŋir ḏa nyi gwate gwuməḏɩjaje ŋuɽun ŋe ŋun ŋaŋinu lugwi, i ḏilɩŋeḏa ḏe, i ŋuɽun ŋun ŋaŋijilɩlo elo i ḏalɩmia ḏe no? 7na ŋɩdi ŋun ŋate ŋɩmiḏo no namɩni ŋaṯəri gwula, ḏa ŋɩmaro ŋwula, i ŋiɽebeḏe, na ḏa ŋate ŋɩməri gwula gwiro kajakaja no, na galakwe allɩŋe ŋun ŋəṯəri gwula? 8na dino ḏa burujo məri ŋwal ŋwun ŋwɩti, na əḏi gwiro gwagele gwula gwuŋun muma gi ḏɩrra? 9na ŋiro dino, na ḏa nya late laṯumə ŋwinyu ŋwe ŋuɽuna ŋun ŋaṯɩlilɩŋe na galakwe ŋalɩŋini? na dino nyaŋa luməḏɩjo ḏɩronia. 10na nyi gwarno ŋuɽun ŋo ŋutu ŋiro kajakaja kɩḏilio na ŋatɩn ŋetɩdo ŋatɩn ŋuɽuna no. 11na ḏa nyi gwate malɩŋe ŋuɽuna ŋarau no, nyi gwaro kwiji gwun gwaṯumə gi gwiji gwun gwaṯumə ḏuməḏo ḏiro kaja, na gwiji gwun gwaṯumə gwaro lugwi gwiji gwun gwaṯumə ḏuməḏo ḏiro kaja. 12na nyaŋa dino gi gwune nyalaṯɩbunyi ḏiḏəḏo ḏeḏi gwuɽɩwə gworki, bunyil kani nyalbaḏaice kani nyabɩɽi kɩniso nanu. 13na dino ŋu gwun gwaṯumə ḏuməḏo ḏe ḏun ḏate ḏilɩŋiḏɩlo no, ouwɩrico nuumədɩjo eloŋu nuḏəḏə ŋɩma kani ŋuwɩrli ŋuɽuna ga. 14gi gwune ḏa nyi muməḏɩjo eloŋu ḏuməḏo ḏe ḏun ḏate ḏilɩŋiḏɩlo no, gwuɽɩwə gwinyi gwuməḏɩjo eloŋu namɩni ḏilɩŋeḏa ḏinyi ḏate ḏaṯɩɽe nyaɽe no. 15na ŋeno ŋɩrṯa ŋiro? nyi gwuməḏɩjo eloŋu gwuɽɩwə gwe gwinyi na nyi gwuməḏɩjo eloŋu ḏilɩŋeḏa ḏe ḏinyi dino; na nyi gwelɩŋi gwuɽɩwə gwe gwinyi, na nyi gwelɩŋi ḏilɩŋeḏa ḏe ḏinyi dino. 16namɩni ḏa maŋeico eloŋu sukran gwuɽɩwə gwe, na ŋu gwun gwijiga kalo geḏi liji lun late lilɩŋiḏɩlo no, galakwe gwarno, gwerkwe, gi ḏeico ḏuŋa sukran, gi gwune gwate gwilɩŋiḏi ŋa gwarau no? 17na gwerkwe ŋa gweico eloŋu sukran muma, namɩni gwiro kaja gwate gwubɩɽia nanu no. 18na nyi gwaṯeico eloŋu gwi sukran nyi gwaṯumə ḏuməḏo ḏe ḏiro kajakaja ḏutəno lagalo wei; 19namɩni kalo geḏi kɩniso nyi gwəmɩnyəno nyi gwuma ŋuɽuna ṯoḏɩne ḏilɩŋeḏa ḏe kani nyiŋalɩmi liro kaja dino, aŋan ŋuɽun alɩb di ḏumədo ḏe ḏun ḏate ḏilɩŋiḏɩlo no.

20lɩmagəri, nyaŋa lo laro nyaɽe ḏilɩŋeḏa ḏe, nyamɩni ro nyaɽe ŋuɽun ŋun ŋɩki, namɩni ḏilɩŋeḏa ḏe duḏɩl liji lun luɽun. 21ŋulinu ŋuɽun ŋun ŋigelijɩlo elo musaŋ,

gwete gwun gwiro elo gwarno, liji le lun laṯumə ḏumədo

ḏiro kajakaŋa na ŋwinyu ŋwe ŋweḏi liji liro kaja nyi

gwaṯuməḏɩjo liji leno, namɩni ŋeno wei dino late

laṯiŋidiŋɩna no.

22na ŋiro dino ḏuməḏo ḏun ḏiro kajakaja ḏiro ḏəŋinio, ḏədu dedi lun ləmɩnyu eloŋu namɩni gi liji lun late ləmɩnyu eloŋu no, na ḏaŋiḏio ŋuɽuna ŋun ŋaŋijilo elo ḏədu ḏe liji lun late ləmɩnyu eloŋu no, namɩni gi liji lun ləmɩnyu. 23na da kɩniso wei gɩmaɽuwaḏa ldu, na wei limumə ḏuməḏo ḏe ḏun ḏate ḏilɩŋiḏɩlo no, naləḏio lun late lilɩŋiḏi ŋuɽuna ŋeḏi elo no, i lun late ləmɩnyu eloŋu no, na late larno nyaŋa ləṯi ḏiŋeroma na? 24namɩni ḏa wei limaŋiḏi ŋuɽuna ŋun ŋaṯɩlil elo aŋijo na gwete məḏio gwun gwate gwəmɩnyu eloŋu no i gwun gwate gwilɩŋiḏi no, gwalgɩɽeṯɩnya wei, na ŋu gwalakɩmini wei, 25na dino ŋuɽun ŋun ŋɩlɩbo ŋeḏi ḏugwor ḏuŋun ŋimaŋini; na dino gwidi gi jei ganu nuorṯeḏa eloŋu, nuarno elo gwo lagalo gwerkwe.

ŋuɽun ŋe ḏorṯeḏa eloŋu alkədini muma

26na dino ŋɩrṯa ŋaro lɩmagəri? na ḏa nyalmaɽuwaḏa ldu, wei gwete gwete lagaloŋu ŋumanəṯi ḏelɩŋa, i manəṯi ḏalɩmiḏa, i manəṯi ŋuɽuna ŋun ŋaŋinu lugwun, i manəṯi ḏuməḏo ḏiro kaja, i manəṯi ḏuwɩrlio ŋuɽuna ga; ouwɩricil ŋuɽuna wei alro gi ḏibɩɽeḏa nanu. 27na ḏa gwete mumə ḏuməḏo ḏe ḏun ḏate ḏilɩŋiḏɩlo no, ouwɩricil alro lɩttən, i ḏa limaro lutəno ṯəɽɩl kuwei, na dino nalumə gwete gwete nanyaouwɩrico gwete ŋuwɩrli ŋuɽuna ga. 28namɩni ḏa manete gwetɩdo gwun gwəṯi ŋɩma gwawɩrlio ŋuɽuna ga no, ouwɩricil nujiga nyɩkwom kɩniso, ŋuuməḏɩjo gwula gwuŋun na elo. 29na ŋiro dino ouwɩricil nebɩŋaije lɩttən i ṯəɽɩl alumə, na lun lɩṯanu aliḏeije ŋuɽuna ŋagin.; 30namɩni ḏa man elo aŋiḏi ŋuɽuna gwete gwun gwiro kaja gwun gwijiga, ouwɩrico gweḏi gwerre nuje nyɩkwom. 31gi gwune nyaŋa wei gwete gwete nyəṯi ŋɩma ŋanyalaŋiḏi ŋuɽuna ŋun ŋajil elo aŋijo kani wei alalɩmini albɩɽe nanu. 32na gwuɽɩwə gweḏi nebɩŋa lo ŋuɽun ganu ŋeḏi nebɩŋa. 33gi gwune elo gwate gwiro elo gwe ḏuɽuḏɩno ganu no, numɩni ro gwe ḏouwɩɽiḏa.

ŋiro gi kɩniso wei geḏi liji lun lɩpiḏo pɽul, 34ouwɩricil la lalo alje nyɩkwom kɩniso gi gwune ŋɩtumuḏu alumə. almɩni ro lɩtieno gi gwune arne ŋuɽun ŋun ŋigelijɩlo elo musaŋ dino. 35na ḏa lɩmar lanlɩŋe ŋuɽuna ŋədi, ouwɩricɩlo alɩɽoṯəḏɩjo ləmɩnyəŋe lagin gi lɩdunu, na ŋiro ḏare gi la ḏa limumə kɩniso. 36ŋuɽun ŋeḏi elo ŋɩwiḏi lagalo a? i ŋɩwilijaje kuwei a?

37ḏa gwiji gwete manuməḏɩni manarno gwiro nebi, i manarno gwiro gwiji gweḏi gwuɽɩwə, ouwɩrico ŋwulɩŋe nuarno ŋuɽun ŋun ŋulijajɩlo, ŋeno ŋeḏi gwele gwun gwiro elo ŋiro. 38namɩni ḏa gwiji maŋeləḏəṯɩni ŋuɽun ganu ŋeno ouwɩricil ananŋeləḏəṯɩni ganu dino. 39na ŋiro dino lɩmagəri, bunyil gworki nyaŋiḏi ŋuɽuna ŋun ŋajɩl elo aŋijo, namɩni lo lanyalakajo lun laṯumə ḏuməḏo ḏun ḏiro kajakaja. 40nyamɩni ouwɩrico ŋɩdio wei aldujini ŋideleḏo muma.

Currently Selected:

1 kurinṯus 14: OTR1966

Highlight

Copy

Compare