1 kurinṯus 12

asa 12

ḏiḏəḏo ḏeḏi gwuɽɩwə ḏun ḏiro kajakaja na ḏigakia ḏagin

1na gwan ḏiḏəḏo ḏeḏi gwuɽɩwə lɩmagəri, nyi gwate gwarno nyalaro jɩɽilo no. 2nyalilɩŋiḏi nanyarno kaja kono nyalro liji lun liro ga dino, nyalgwuloḏəṯɩnu ŋɩdi ŋun ŋaṯɩlorṯeḏa ŋun ŋate ŋaṯumə no, kalo gun gaṯajigwulo. 3na ŋiro dino nyi gwarno ŋilɩŋiḏanyalo, gwatɩn gwetɩdo manumə gwuɽɩwə gwe gweḏi elo manarno yecu gwiḏenɩnu no, na gwatɩn gwetɩdo manarno yecu gwiro gwele no namɩni gwuɽɩwə gwe gwun gwɩpiḏo pɽul.

4na ḏiḏəḏo ḏo ḏiro kajakaja ḏeḏi gwuɽɩwə, namɩni gwuɽɩwə gwiro gwetɩdo gwun gwɩpiḏo pɽul. 5na ŋɩru ŋo ŋiro kajakaja, namɩni gwele gwiro gwetɩdo gwun gwiro elo. 6na ŋɩma ŋiro kajakaja ŋaṯape ŋɩru, namɩni elo gwiro gwetɩdo gwun gwaṯape ŋɩru wei ŋɩdi wei. 7namɩni nulḏəḏə wei gwete gwete ḏəŋinio ḏeḏi gwuɽɩwə gwun gwɩpiḏo pɽul kani ŋwuləpijo ŋuɽuna ŋun ŋəṯi jei ganu. 8gi gwune gwete nuḏəḏə ŋadɩgɩɽe ŋe ḏuməḏo gwuɽɩwə gwe gwun gwɩpiḏo pɽul, na gwiro kaja nuḏəḏə ŋuɽuna ŋe ḏilɩŋeḏa gwuɽɩwə gwe kweno dino, 9na gwiro kaja nuḏəḏə ḏɩməṯo gwuɽɩwə gwe kweno dino, na gwiro kaja nuḏəḏə ŋɩma ŋe ḏigela liji muma lun leḏeḏo nanu gwuɽɩwə gwe gwetɩdo, 10na gwiro kaja ḏapa ŋɩru ŋɩma ŋe ŋun ŋɩbuṯano kworo gweḏi liji, na gwiro kaja nuḏəḏə ḏaŋiḏio ŋuɽuna ŋun ŋaṯɩl elo aŋijo, na gwiro kaja nuḏəḏə ŋɩma ŋeḏi giloḏa ga gwuɽɩwə gwiro kajakaja, na gwiro kaja nuḏəḏə ḏumədo ḏun ḏiro kajakaja, na gwiro kaja gwaṯiwɩrlijo liji ḏuməḏo ḏun ḏate ḏilɩŋiḏɩlo no, 11namɩni gwuɽɩwə kweno gwetɩdo ŋaṯularre ŋeno wei, naṯulɩgəjgɩnyeḏɩjo ganu gwete gwete ŋun ŋɩbunyɩlo gwuɽɩwə.

ḏəŋinio ḏedi aŋɩnu

12na ŋiro gi gwune aŋɩnu yiro yetɩdo na yəṯi ŋɩdio ganu ŋutu, na ŋɩdi wei ŋeḏi aŋɩnu ŋutu namɩni aŋɩnu yiro yetɩdo, na kɩrisṯo gwiro dino; 13gi gwune liŋə wei gwuɽɩwə gwe gwetɩdo gwun gwɩpiḏo pɽul ilmababṯaijɩni kaŋɩnu yetɩdo, ḏa limaro liju i ligrigi, i lun liro lɩwainy i lun late liro lɩwainy no, na liŋə wei ilmeyu kwuɽɩwə gwetɩdo gwun gwɩpiḏo pɽul. 14gi gwune aŋɩnu yate yəṯi ŋɩdio ŋetɩdo no namɩni ŋutu ganu. 15na ḏa lara limarno, gi gwune nyi gwate gwiro ḏi nyi gwədu gweḏi aŋɩnu no, na dino gədu geḏi aŋɩnu na? 16na ḏa gəni gɩmarno, gi gwune nyi gwate gwiro gei nyi gwədu gweḏi aŋɩnu no, na dino gədu geḏi aŋɩnu na? 17na ḏa aŋɩnu wei yɩmaro gei, na ḏidiŋɩna ḏaḏa? na ḏa wei yɩmaro ḏidiŋɩna namɩni ḏiruḏɩno ḏaḏa? 18namɩni elo gwugelo ŋɩdio wei ŋete ŋete kaŋɩnu ŋiro gi gwune əminyulo. 19na ḏa luŋa wei limaro ŋɩdi ŋetɩdo na aŋɩnu yaḏa? 20namɩni gwunnɩno ŋɩdi ŋeḏi aŋɩnu ŋutu ganu namɩni aŋɩnu yiro yetɩdo. 21na gei gate gəṯi ŋɩma geico ḏi no, nyi gwate gwubunyaŋa no, i dino lɽa leico ŋwara no, nyi gwate gwubunyaje no. 22awe, namɩni ŋutəno, ŋɩdi wei ŋeḏi aŋɩnu ŋun ŋaṯaŋiḏi ŋɩrebɩna ŋəṯi jei ganu gworki. 23na ŋɩdi ŋun ŋaṯɩlŋarno ŋɩbɩɽaṯo ḏinəjio, limilgaki ḏinəjio ḏutəno, na ŋɩdi ŋage ŋun ŋaṯilɩkɩɽɩbə ga ŋəṯi ḏiŋiriḏa ḏutəno, 24namɩni ŋɩdi ŋage ŋun ŋiŋir ŋate ŋɩbɩɽaṯɩn ŋɩdi ŋədi no. namɩni elo gwuɽuḏi aŋɩna ganu yetɩdo, nuḏəḏə ḏinəjio ḏuṯəno ŋɩdi ŋun ŋɩbɩɽaṯo, 25kani ate an ḏɩkenyɩḏiḏia je ganu kaŋɩnu no, na kani a ŋɩdi ŋeno alro ḏidɩmeḏa gworo. 26na ḏa ŋɩdi ŋete ŋeḏi aŋɩnu miḏe namɩni ŋɩdi wei ŋiḏe dino, na ḏa ŋete ŋɩmanəjini na ŋɩdi wei ŋadile ganu. 27na nyalro aŋɩnu yeḏi kɩrisṯo, na gwete gwete nyalro ŋɩdi ŋuŋun. 28na elo gele liji kɩniso, gwerre duwəjo, na nimɩro nɩttən nebɩŋa, na nimɩro ṯəɽɩl limualɩm, na gɩdo ganu lun lagele ŋɩru ŋɩma ŋe ŋun ŋɩbuṯano kworo gweḏi liji, na lun ləṯi ŋɩma laligele muma lun leḏeḏo nanu, na lun laṯɩlɩgelejo uwə, na lun laṯɩdɩme ŋelɩnya ŋeḏi kɩniso, na ḏuməḏo ḏun ḏiro kajakaja. 29luŋa wei liro duwəjo a? luŋa wei liro nebɩŋa? luŋa wei liro limualɩm a? luŋa wei lapo ŋɩru ŋɩma ŋe ŋun ŋɩbuṯano kworo gweḏi liji a? 30luŋa wei ləṯi ŋɩma laligele muma a? luŋa wei ləṯi ŋɩma lumə ḏuməḏo ḏiro kajakaja a? luŋa wei ləṯi ŋɩma laliwɩrlijo ŋuɽuna a? 31namɩni aṯanyabunyi gworki ḏiḏəḏo ḏun ḏiŋirano, namɩni nyi gwajaŋijo ṯaṯ ḏun ḏiŋirano gi loro wei.

Currently Selected:

1 kurinṯus 12: OTR1966

Highlight

Copy

Compare