1 kurinṯus 11

asa 11

1ḏujɩlo gi nyi, ŋiro gi nyi dino ŋidujiŋɩlo gi kɩrisṯo.

aṯa la kɩɽɩbəne ŋwuɽa ŋwagin kɩniso

2namɩni nyi gwajibuḏi gi gwune nyaŋa laṯinyiaḏɩŋane ŋuɽun wei, nanyaməṯo ḏalɩmia ḏiḏir ḏiro gi gwune ḏəḏɩŋwajɩne. 3namɩni nyi gwubunyu nyalalɩŋe kɩrisṯo gwiro lɽa leḏi ləmɩnyo wei gwete gwete, namɩni lja leḏi gwa liro gwəmɩnyo, na lɽa leḏi kɩrisṯo liro elo. 4ləmɩnyo wei lun laṯuməḏɩjo eloŋu na laṯaŋiḏi ŋuɽuna ŋun ŋaŋijilo elo na ŋwuɽa ŋwagin ŋwakɩɽɩbəḏɩnu laṯəpijo ŋwuɽa ŋwagin ḏare. 5namɩni la wei lun eloŋu na laṯaŋiḏi ŋuɽuna ŋun ŋaŋijilo elo na ŋwuɽa ŋwagin ŋwate ŋwukɩɽɩbəḏɩnu no laṯəpijo ŋwuɽa ŋwagin ḏare, gi gwune liro gi luwəḏɩnu. 6gi gwune ḏa gwa gwate məkɩɽɩbəne lɽa luŋun ga no ŋwumɩni wɩɽo elo, namɩni ḏa ḏare ḏɩmaro kwa nuwɩɽo elo i ŋwuwəḏɩni ŋwumɩni kɩɽɩbəne ga. 7gi gwune ŋate ŋɩdeleḏo gwəmɩnyo gwəkɩɽɩbə lɽa luŋun no, gi gwune ŋu gwuwəɽəno elo na ḏoɽeḏa ḏuŋun, namɩni gwa gwiro ḏoɽeḏa ḏeḏi gwəmɩnyo. 8gi gwune gwəmɩnyo gwate gwukədɩnu kwa no namɩni gwa gwukədɩnu kwəmɩnyo; 9na gwəmɩnyo gwate gwugelɩnu gwan gwa no, namɩni gwa gwugelɩnu gwan gwəmɩnyo. 10na gwan ŋuɽun ŋeno, ŋideleḏo kwa gwakani giria gi ḏəŋinio ḏeḏi ŋele gi lɽa elo luŋun, gwan liji leḏi kanyin. 11namɩni kwele gwun gwiro elo, gwəmɩnyo gwate gwanəṯi ŋuɽuna ŋədi ḏa gwa mete no, na gwa ḏa gwəmɩnyo mete no. 12na ŋiro gi gwune gwa gwukədɩnu kwəmɩnyo, na ŋiro dino gwəmɩnyo gwilɩŋinu kwa, namɩni ŋɩdi wei ŋɩwiḏi ḏi elo. 13akɩmiḏil nyaŋa; ŋate ŋideleḏo kwa gwuməḏɩjo eloŋu ḏa gwate məkɩɽɩbəne lɽa luŋun ga na? 14na ŋuɽun ŋeḏi ŋɩdi ŋun ŋɩgelɩnu ŋeḏi gɩḏilio ŋate ŋalɩmije ḏa gwəmɩnyo məṯi əɽu yola yaṯəpijo ḏare na? 15namɩni ḏa gwa məṯi əɽu yola yiro ḏoɽeḏa ḏuŋun. gi gwune əɽu yuŋun yiḏəḏuŋu kani aṯukɩɽɩbəne. 16namɩni ḏa gwete maŋino məmɩnyi ḏɩbereḏa, anate nəṯi ŋuɽuna ŋiro gi kworo kweno no, i kɩniso geḏi elo giro kajakaja.

ḏidujia ṯarabesa ḏeḏi elo ŋɩrleḏ

17namɩni ḏa nyi majiḏəḏə ŋuɽuna ŋeno nyi gwate gwajibuḏi no; gi gwune nyalaɽuwaḏo ldu ŋədu ŋe ŋiŋirano no namɩni ŋe ŋɩkeno. 18na gwerre ganu, na ḏa nyalmaɽuwaḏe ldu kɩniso, nyi gwudiŋɩnu ḏɩkenyɩḏiḏio ganu ḏo lagalo, na nyi məmɩnyi ŋuɽuna ŋeno kworo ŋiro gwerkwe, 19gi gwune gwerkwe ŋuɽun ŋaje lagalo ŋun ŋiro kajakaja, kani luŋa lun ləmɩnyɩnu laŋini lagalo. 20na ḏa nyalmaɽuwaḏe ldu, ŋədu ŋe ḏiṯa gi ṯarabesa ḏeḏi gwele gwun gwiro elo no. 21gi gwune wei gwete gwete gwadare gwapene kworo, nuape ḏiṯa ḏan gwulo gwuŋun, na gwete gwa jaŋu e, na gwiro kaja gwɩrləle. 22nya late ləṯi lɩduno le lanyanʼe ganu na lanyaniyu ganu na? nyalaṯabɩlaṯe kɩniso geḏi elo nanyalapi ḏare lun late ləṯi ŋɩdio na? nyi gwaɽeico au? nyi gwajibuḏi gwan ŋeno a? nyi gwate gwajibuḏi no.

23gi gwune nyi mapa ŋuɽuna kwele gwun gwiro elo ŋun ŋiḏəḏijɩlo dino: galakwe gwele gwun gwan yecu mapa gia gilio gun ge ḏugiḏio, 24na gwune nueico eloŋu sukran nubɩleṯɩnya ganu, nuleicɩno, apul, nyaʼe, aŋɩnu yinyi yiro yeno yun yimakini gwan nyaŋa, aṯanyarre dino nyilaḏɩŋane. 25na gwune nalʼe nuapa kɩɽuda dino nuleicɩno, kɩɽudo keno giro geḏi ŋuɽun ŋun ŋiya ŋun ŋɩkaiilo elo ŋuwən ŋe ŋinyi; aṯanyarre dino na kaja gun ganyagiyu nyilaḏɩŋane. 26nune nyalmaʼe gia keno, nyeyu kɩɽudo, nyaŋiḏi ḏaiya ḏeḏi gwele gwun gwan yecu kəbe nunaɽuwa.

27na dino, gwun gwiṯi gia i nuyu kɩɽudo geḏi gwele gwun gwiro elo gwate gwɩdeleḏo no, gwape ŋuɽuna ŋɩki kaŋɩnu na ŋuwən ŋeḏi gwele, 28nyamɩni ouwɩrico gwiji ŋwuməḏɩjo ḏugwor ḏuŋun, ŋwouwɩrico ŋwuʼe gia nuyu kɩɽudo; 29na ŋu gwun gwiṯi nuyu gwate gwɩdeleḏo no, gwiṯi ki nuyu ḏakɩmino ḏe kwulo gwuŋun, nate nulɩŋe aŋɩnu yeḏi gwele yiro no. 30na gwan ŋuɽun ŋeno lo lutu lagalo lɩrebɩna na leḏeḏo nanu, na lutu lɩmai. 31namɩni ḏa ilakɩmi lula lage ilate lakɩminu no; 32namɩni gi gwune ilmakɩmini gwele gwun gwiro elo, na mijikɩrɩnya kani ate ilakɩmini gɩḏilioŋale no.

33na dino lɩmagəri, ḏa nyalmaɽuwaḏa ldu gi ḏiṯa, ḏuḏɩnijil gwete gwete ŋɩmaga lagaloŋu. 34na ḏa gwete ma jaŋu e, ouwɩrico ŋwuʼe dunu, kani nyate nyaɽuwaḏa ldu gi ḏakɩmino no. namɩni ŋuɽun ŋun ŋɩṯanu ŋilgele muma ḏa nyi mila.

Currently Selected:

1 kurinṯus 11: OTR1966

Highlight

Copy

Compare