Luuga 6:27-49

Abi nyi gwa gwabiŋaijaje lina lidiŋinu ŋinena, ŋajaici, Uminyul lijo lina likianyalai, athanyal gathaje uwa lina lathanyal doinya. Iŋiriyul dugore gi liji lina lathajin abiŋa, nyabiŋadhaijo Kaloŋa gi liji lina lathajure ŋina. Ada kwiji gwimajimiri gi nyirel ganu, nyabrico ŋajimiri manaŋ; a ada kwiji gwimajapa kiraŋa galo, athanya unyio luga lai lalo ko no. Athanya dhedha lijo peth lina lathajothaije galo; a ada kwiji gwimapa ŋida ŋalo, athanyaŋothaije galo manaŋ no. Athanya upijo lijo liter dhuŋuna dhiro ŋinena athanya lajin dujo ko. Ada nyaŋa limathuminyi lijo lina lathajuminyi, nyaŋa luthi shukr gwan ei? Ŋinena athi liji lina like uminyi lijo lina lathilluminyi ko. Ada nyaŋa limathigathaje lijo uwa lina lathajigathaje uwa, nyaŋa luthi shukr gwan ei? Liji lina like lathin do ko. Ada nyaŋa limathidhedha lijo ŋida ŋina laranyalnu ŋaji ŋajilwurijo, nyaŋa luthi shukr gwan ei? Liji lina like lathidhudhujiye ŋida ko, dapai ŋida ibiŋa ŋwamun ganu ram. Nyabuminyi lijo lina likianyalai, nyalgathaje uwa, nyaldhedha ŋida, athajilbi wurijo no; a mukaafa gwalo gwaji gwinaŋ, a nyaŋa laro keleŋa ga Kalo gina ginunu. Ŋeda gwathinuje lijo lina lati luthi shukr no a lina like. Athanyal ina, gwiro ŋinena athajin Babo gwalo ina. Athathanya akimiye lijo no, a nyaŋa lati lakimini no; athanya geta ẖukm gi liji no, a nyaŋa lati lagetini gi ẖukm no. Athanya dhudhani ganu ŋidi ŋegen ŋina ŋike, a ŋandhudhani ganu ŋalo ŋina ŋike. Athanya dhedha lijo liter ŋida, a ŋajillidhedha ko; ŋoinyadho ŋina ŋijogajinu. Gwiro ŋinena athanya yeco lijo liter, laji lajiyeco manaŋ. Ŋwulodaijo odaije gwai, ŋwulaici, Kwiji gwina gwirima gi je gwuthi ŋoma gwodha kwijo gwiter gwina gwirima gi je a? Lati liduthe ram gi libugul ganu na? Thilmiz dhati dhiliŋidhunu gi muⓐallim gwuŋun no; abi ada dhimaliŋa momaŋ, dhaji dharo ŋinena muⓐallim gwuŋun. Kworaŋ athanya baŋa kajilero ke ganu ga magalo, athathaŋa baŋudhi dhure dhina dhathije ke guŋa no? I akwai au gwuthi ŋoma gwabiŋaijo magalo, ŋaici, Maguri, abriciny ŋawala kajilero gina gijo ke ganu guŋa, ada ŋa gwati gwimaŋa dhure dhina dhijo ke ganu guŋa no? Kwiji gwai gwina gwuthi dhuŋuna ganu ram, wuli dhure dhina dhijo ke ganu duguŋa kwereny, abi ŋa gwaji gwuthi ŋoma gwadaŋa galo momaŋ, a ŋa gwuthi ŋoma gwawal kajilero gina gijo ke ganu ga magalo. Kwari gwina gwiŋir gwati gwathirire fruuta gwina gwidigiro no; a kwari gwina gwidigiro gwati gwathirire fruuta gwina gwiŋir no. Jari peth jiliŋinu fruuta gwai gwegen. Liji lati lathuthe ŋwudha gi cugi alaŋ no, i athathil uthe dugura ŋwira alaŋ no. Kwiji gwina gwiŋir gwathapai ŋiro ŋina ŋiŋir dhuŋun dhai dhina dhiŋir dhina dhathije gi dhugor ganu dugun; a kwiji gwina gwike gwathapai ŋiro ŋina ŋike dhuŋun dhai dhina dhike dhina dhathije gi dhugor ganu dugun. Liji lathapai dhuŋuna dhina dhathije gi dugor ganu degen dhoinyadho. Kworaŋ athanyabi arnu, Kweleny gwai, Kweleny gwai, athathanyabi apo dhuŋuna dhina dharinydhai no? Gwina gwathila diginy, ŋwudiŋini dhuŋuna dhiny, ŋwulapai, nyi gwajaŋajo darnu gwiro ŋinena aŋ. Gwiro ŋinena kwiji gwina gwaico duna, ŋwukwure libugula lolaŋ ganu, ŋwugeta dhugul kol alaŋ; a ma kwuru ire, ŋwupe duna ibigwe, athuŋwbi uriyo galo no; gwucinu momaŋ kol alaŋ. Abi gwina gwathidiŋini, athuŋw bapo dhuŋuna no, gwiro ŋinena kwiji gwina gwaico duna kwiyaŋ alaŋ, athuŋwbuthi dhugul no. A kwuru upe gwuleny, ŋwunida ganu, ŋwerna; a erna gwa dunu ibigwe gwinaŋ.