Ⲁibraaniyiin 7
7
Yasuuⓐ gwina gwiro kweleny gwa gusus gwin ŋinena Malkiis̱aadag
1Malkiis̱aadag ibigwa gwiro malik gwa Saaliim, a gasiis ga Kalo gina ginunu peth, gwina gwibudhilo Ibraahiim gwai dina muŋw aura gi rinyiye gwa maluuk, ŋwubarikiye; 2gwina gwima Ibraahiim dhedha ⓐushur gi ŋidi peth; gwina gwan kwerkwereny Malik gwa dhuŋun dhina dhiŋir, ŋwubaji ŋwan ko Malik gwa Saaliim, gwina gwuthi maⓐna gwan Malik gwa audhaijiye galo; 3gwati gwuthi babuŋw, i nana, i liji luŋun lina lijo kwerkwereny no, athuŋw uthi ŋwamun ŋwina ŋwiro kwerkwereny, i ŋwamun ŋwina ŋwiro gidon ŋwa midhe gwuŋun no; ŋwubuthi dhuŋuna dhiro ŋinena dhina dhuthi Ŋari ŋa Kalo; a ŋeda gwaro gasiis gwortal. 4A minoŋ ireyul je galo darnu kwiji ibigwa gwinaŋ akwai, gwina gwidhedhi Ibraahiim gwina gwiro kweleny gwa baboŋa ⓐushur ko gi ŋidi ŋina ŋapuŋwulo ŋina ŋiŋiranu. 5Abi lina liro keleŋa ga Laawi, liro lina lapai ŋiro ŋa gusus, luthi amr dilapai ⓐashaar gi liji gi dhuŋun dha naamuus, a gi dhuŋun ibidha dhuthi maⓐna gwan nu, gi limegen, ŋinena tuilo gi kwiriny gwa Ibraahiim. 6Abi gwina gwati gwuthi lijo lina lijo kwerkwereny lina lidhuredhinu darnu liro keleŋa ga Laawi no gwimapai ⓐashaar di Ibraahiim, a ŋwubarikiye ŋeduŋw gwina gwuthi dhuŋuna dhina dhardhai Kalo. 7Abi dhuŋun dhati dhina dhuthi kadhuŋw gi dhuŋun ibidha darnu gwina gwitinyunu gwibarikinu di ŋeda gwina gwibuthanu no. 8Liji lo mina lina laji lai lina lathapai ⓐashaar; abi mine gweta gwo gwina gwidhedhinu shahaada darnu gwimidho. 9A nyi gwuthi ŋoma dabiŋi dhuŋuna darnu Laawi ko, gwina gwathapai ⓐashaar, gwimadhedha ⓐashaar ko Ibraahiim gwai. 10Abi ŋeda gwijo nanaŋ kwiriny gwa kwurna gwuŋun, dina budho Ibraahiimŋa Malkiis̱aadag gwai.
11Ŋinena ada dhuŋun dhina dhiro didima dhimupini ŋiro ŋai ŋa gusus ŋina ŋuthilo Laawi, (gi dhuŋun dha ŋiro ibiŋa liji lidhedhinu naamuus), aŋ gwiro dhuŋun dhina dhiro daruri dathi gasiis giter dire gi ruṯba gwa Malkiis̱aadag, athuŋwbi urninu gi ruṯba gwa H̱aruun na? 12Ada gusus gima upeyani ganu, a daruri naamuus gwupeyani ganu ko. 13A gwina gwabiŋudhina gi dhuŋun ibidha gwiro gweta gwa gabiila giter, a kwiji gwati gweda dugun gwina gwimapai ŋiro gi loboŋ no. 14Ŋinena liŋinu dhuŋun ibidha momaŋ darnu Kweleny gwega gwitui gi gabiila ga Yahuudha; gina gati gabiŋugai Muusa dhuŋuna dheda dhan gusus no. 15A minoŋ dhuŋun ibidha dhiliŋinu gwoinyadhanu ko ada gasiis giter gimadire giro ŋinena Malkiis̱aadag, 16gina gimaro gasiis, abi gwati gi dhuŋun dha naamuus gwina gwati gwuthi dhuŋuna dhadhapai dhan aŋinu no, abi gi dhuŋun dha ŋoma ŋa midhe gwina gwati gwerna no. 17Ŋinena jo shahaada gwan ŋeda darnu, Ŋa gwaro gasiis gwortal, gi ruṯba gwa Malkiis̱aadag. 18Ŋinena ruiuŋw irniye gwa gaanuun gina gijo kwereny gi dhuŋun dha erna ŋoma ŋuŋun ŋinena athuŋw uthi je ganu no. 19A minoŋ naamuus gwati gwimeajo ŋida ŋeda no, abi dhunijo gwina gwiŋiranu gwimupina; gwina gwalgwai doga di Kalo. 20A akwai gwoinyadhanu darnu gwati gwigitinu gwati gwuthi ẖalaf no. 21(Abi ŋediŋa lati ligitinu dilro gusus ẖalaf gwai no; abi ŋeda gwigitinu ẖalaf gwai di ŋeda gwina gwarnu dugun, Kweleny gwalifiyo a gwati gwuthi dhuŋuna dhiter dhan dhuŋun ibidha no, ŋwarnu, Ŋa gwaro gasiis gwortal gi ruṯba gwa Malkiis̱aadag.) 22Gwoinyadhanu gi dhuŋun ibidha Yasuuⓐ gwimaro gweta gwina gwuthi dhuŋuna dhina dhiro titiganu gi dhuŋun dhina dhidiminu dhina dhiŋiranu. 23A titiganu ŋediŋa liro gusus goinyadho, ŋinena uthilo dhuŋuna dha dhai athathil uthi ŋoma dije gi ŋiro gwortal no. 24Abi ŋeda, ŋinena athuŋw je gwortal, gwuthi ŋiro ŋa gasiis ŋina ŋati ŋerna gatur no. 25A gi dhuŋun ibidha ŋeda gwuthi ŋoma duŋwgilaŋiye ŋediŋaije lina lathidoga ŋeda gwai di Kalo momaŋ ko, ŋinena midhuŋw ŋwamun peth duŋw abiŋadhaijo Kaloŋa degen gwai.
26Gwiŋir dega danuthi kwelenya gwa gusus gwina gwiro ŋinena ibigwa, gwina gwiŋir didirel, a gwina gwati gwuthi dhuŋuna dhina dhike, i dhuŋun dhina dhiro ŋirle no, ŋinena juŋw galo ter gi liji lina lathapai ŋida ŋina ŋike, a gwimagitini kalo gina golanalaŋ gi Samawaat; 27gwina gwati gwuthi dhuŋuna dhina dhiro daruri dugun ŋwamun peth, gwiro ŋinena leleny la gusus, duŋwdhedha Kaloŋa ŋida ŋadhi dhuge ŋwamun peth, kwerkwereny gwan ŋidi ŋuŋun ŋina ŋike a gidon gwan ŋidi ŋina ŋike ŋa liji no; ŋinena apuŋw dhuŋuna ibidha lamun letipo, dina dhedhuŋw Kaloŋa gwidom gwuŋun. 28Naamuus gwathiruje lijo leleny la gusus lina luthi muluŋw nono; abi dhuŋun dha ẖalaf, dhina dhijo gidon gi naamuus, dhimaruje ŋeduŋw Ŋari ŋina ŋiro didima gwortal.
Currently Selected:
Ⲁibraaniyiin 7: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
