Ⲁibraaniyiin 8
8
Ŋiro ŋina ŋuthilo al Masiiẖ ŋa gasiis ŋinunu gi ŋiro ŋina ŋuthilo Yahuud ŋa gusus
1Abi gi dhuŋun dhina dhiro kwerkwereny dha dhuŋun dhina dhabiŋanu dhiro minoŋ. Anaŋa luthi kwelenya gwa gusus gwina gwuthi dhuŋuna dhina dhiro ŋinena ibidha, gwina gwo gwijalo gi dhoi dhina dhiro dhiŋir dha kursi ga ŋeleny gi Samawaat; 2gwiro gadham ga kalo gina giŋir didirel, a gutu gina giro titiganu, gina gigeto Kweleny, a gati gigeto kwiji no. 3Ŋinena athi leleny peth la gusus gitini dildhedha Kaloŋa dhedhaŋw tur a ŋidi ŋadhi dhuge; a gi dhuŋun ibidha dhuŋun dhiro daruri di kwiji ibigwa uthi ŋida ŋadhi dhuge ko. 4Ada gwimathije kidhila gwati gwaro gasiis gatur no, ŋinena jo gusus gina gathidhedha Kaloŋa dhedhaŋw tur gi dhuŋun dha naamuus. 5Lina lathupijo Kaloŋa ŋiro ŋina ŋiro ŋinena ŋiro ŋa Samawaat a dhigirim dha ŋiro ibiŋa; gwiro ŋinena abiŋaijina Kalo Muusaŋw dina bupuŋw digeta gutu, ŋwaicinu, Aŋadhi daŋa geta ŋida peth gi dhuŋun dha s̱uura gwina gwaŋinijaŋa gi len alaŋ. 6Abi ŋinena gwimapai ŋiro ŋina ŋiŋiranu gwuleny. Ŋeda gwiro gweta gwina gwo keligeny ganu ko gi dhuŋun dhina dhidiminu dhina dhiŋiranu, dhina dhimuthinu galo gi dhuŋun alaŋ dhina dharildhai dhina dhiŋiranu. 7Ada dhuŋun ibidha dhina dhidiminu dhina dhiro kwerkwereny dhati dhimuthi dhara no, kalo gati gai bupini gan dhuŋun dhina dhiro nimra ram no. 8Ŋinena bujuŋw dhuŋuna dhina dhuthi dhara degen ganu ŋwulaicinu, Aŋadhul, ŋwamun ŋwaji ŋwila, Kweleny gwarna, ŋwina ŋwinyiŋwai meaje dhuŋuna dhina dhidiminu dhina dhiyaŋ gi dunu gwa Israayiil a gi dunu gwa Yahuudha; 9dhati dhiro ŋinena dhuŋun dhina dhidiminu dhina dhigetiny baboŋa lai lalo gi lamun lina limuthinyilai dhoi dhegen dinyil teya gi len la Mas̱r; ŋinena athil muthini galo gi dhuŋun dhiny dhina dhidiminu no, athinyil gitijo je no, Kweleny gwarna. 10Dhuŋun dhiro ibidha dhina dhidiminu dhina dhabiŋaijinydhai duna gwa Israayiil maji ma ŋwamun ibiŋwe erna, Kweleny gwarnu; nyi gwageta nuwaamiis gwiny gi ŋadigireny ganu ŋegen, a nyule gi dugor alaŋ degen, a nyi gwaro degen Kalo gegen, a ŋediŋa laro liji liny. 11A ŋediŋa peth gweta gweta gwati gwalimiye kwijo gwina gwijaijilgwai galo no, a gweta gweta gwati gwalimiye megen no, ŋwaicinu, Liŋidhi Kwelenya, ŋinena adhinyi liji peth aji nyilliŋa, gi lina litilitiny a lina lipilipa. 12A nyi gwaro gweta gwina gwuthi inaŋw gi dhuŋun dhegen dhina dhathilapai dhina dhike, a nyi gwati gwaŋidhani ŋida ŋegen ŋina ŋike i dhuŋun dhegen dhina dhathikiye dhuŋuna dha naamuus manaŋ no. 13Ŋinena dina aruŋwnu gwina gwiyaŋ gwimaruje gwina gwiro kwerkwereny gwurun. Abi gwina gwimaro gwurun a ŋwuthi jidhileo joinyadho gwimaje githo derna.
Currently Selected:
Ⲁibraaniyiin 8: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
