Ⲁibraaniyiin 6
6
Dhuŋun dhina dhathiji Kalo abiŋaijo diluminyi dhathapa dhunijuŋw
1A minoŋ abricije anagathani dhuŋuna dhina dhidiŋinilo kwerkwereny dhan al Masiiẖ dilela diliŋa dhuŋuna dhina dhiro didima; athana geto dhugul manaŋ dha dhurle dugore galo gi ŋiro ŋina ŋimai a dha imaan gi Kalo no, 2a dha taⓐliim dhadhuye doi, a dhadhigeta doi alaŋ, a dhadhi dire dai, a dha ẖukm gwina gwathije gwortal. 3A dhuŋun ibidha dhanapai, ada Kalo gimuminyi. 4Gi dhuŋun dha ŋediŋa lina limaliŋa dhuŋuna kwereny, alŋila dhedhaŋw tur gwa Sama, alro lina luthi aicaijiyuŋw gwa Dhigirim dhina Dhiŋir, 5alŋila dhuŋuna dha Kalo dhina dhiŋir a ŋoma ŋa gidhila gina gaji gila, 6alide, lati luthi ŋoma dilgitini dilro liyaŋ manaŋ dilurle dugore galo degen gi ŋidi ŋina ŋike no; ŋinena rinyiilo Ŋare ŋa Kalo manaŋ gwan lidom legen, alabrico duŋwapai dhara gi je ganu ja liji. 7Ŋinena ma kau ice kwiyaŋu gina ginu ŋwamun ŋwoinyadho, ŋwuteya ŋida ŋina ŋiŋir ŋan ŋediŋa lina laji ŋalapai, a kwiyaŋ gwathapai baraka di Kalo. 8Abi ada gwimateye cugi a karo gina giro kwira, a gwaduyini a gwaje githo diluini; gwina gwuthi dhuŋuna dhina dhiro gidon dhan dunini.
9Abi ada anaŋa limabiŋi gwiro minoŋ anaŋa luthi uminyuŋw dagalo gwai, liji lai lina luminyinu, dhuŋun dhai dhina dhiŋiranu dhina dhuthi dhuŋuna ganu dha gilaŋ. 10Ŋinena athathi Kalo urejunu kwijo gweda di ŋwudhudhani ganu gi ŋiro ŋalo a ŋiro ŋina ŋibur ŋa uminyi gwalo, gwina gwaŋianya gi jiriny juŋun no, ŋinena upijanya lijo lina liŋir didirel ŋiro, a loma lathanyal upijo ŋiro. 11Abi anaŋa libupo gweta gweta dagalo ganu duŋwaŋiye dhuŋuna ibidha dhadhapai ŋiro momaŋ diliŋini momaŋ gwa dhunijo di gi lamun lina lamira. 12Dathanya idhi micimicol no, nyabiro ŋinena ŋediŋa lina luthi imaan a lina luthi muthuŋw dugore lina laji lapai dhuŋuna dhina dhardhai Kalo.
13Dina abiŋaijo Kalo Ibraahiimuŋw dhuŋuna dhina dhaji dhaje, athuŋw uthi ŋoma gwalifiye kwiji gwai gweda gwina gwinunu dugun no, ŋwubi ẖalifiye kwidom gwai gwuŋun, 14ŋwarnu, Titiganu nyi gwaŋa barikiye, a nyi gwaŋa ginyajo gwoinyadhanu. 15A minoŋ, dina dhunijuŋw mutha gwai dhugore, ŋwapai dhuŋuna dhina dhabiŋaijodhai Kalo. 16A liji lathalifiye gweta gwai gwina gwinunu degen, a degen ẖalaf gwuminyinu diriniye dhuŋuna peth dhina dhuthi kadhuŋw. 17A gi dhuŋun ibidha ada Kalo gimabupe daŋajo lijo lina laji lapai dhuŋuna dhina dharuŋwdhai gwoinyadhanu gwuleny darnu dhuŋun dhina dhigetuŋw dhati dhuthi upeyinuŋw ganu no, ŋinena gitinuŋw ẖalaf gwai. 18Di gi dhuŋun ram dhina dhati dhuthi upeyinuŋw ganu no, dhina dhati dhan Kalo uthi ŋoma dabiŋi dhuŋuna dhina dhiro ŋidhuŋun no, anaŋa luthi gathajuŋw uwa gwina gwibur nono, anaŋa lina limabira dugun danamutha dhunijuŋw gwina gwigitinu kwereny dega. 19Gwina gwuthana gwiro ŋinena luri lina lathi muthedha duna alaŋ la dugor dega, gwina gwati gwuthi ŋoma gwide no a gwina gwimuthinu galo momaŋ, a gwuni gi kalo gina giŋir didirel kiru kwereny gwa kiraŋ; 20kalo gina gudhina Yasuuⓐ kwereny gwan anaŋa, gwina gwimaje gi ruṯba gwa Malkiis̱aadag gwina gwimaro kweleny gwa gusus gwortal.
Currently Selected:
Ⲁibraaniyiin 6: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
