Ⲁibraaniyiin 5
5
Daruri alŋa lela momaŋ gi dhai dha kwiji gwina gwiro Masiiẖi
1Leleny peth la gusus lina lupinu gi liji ganu ligitinu lan liji gi ŋidi ŋina ŋathildhedha Kaloŋa, duŋwdhedha Kaloŋa dhedhaŋw tur, ŋwudhuge ŋida ŋan ŋidi ŋina ŋike. 2Ŋwuthi ŋoma ŋwumutha dhugore gi liji lina lidhimithi a lina lidhudho; ŋinena juŋw ko keligeny ganu gi mule nono. 3A gi dhuŋun ibidha dhadhi mule nono aram gwadhedha Kaloŋa ŋida ŋan ŋidi ŋina ŋike ŋa liji a minoŋ ko ŋan gwidom gwuŋun. 4Kwiji gweda gwati gwuthi ŋoma dapai nuŋw ibigwa kwidom gwai gwuŋun no, abi gwina gwurnio Kalo, gwiro ŋinena urniuŋwna H̱aruunuŋw ko. 5A minoŋ ko al Masiiẖ gwati gwimajidho gwidom gwuŋun gwiren duŋwuro kweleny gwa gusus no; abi gwina gwaicinu, Ŋa gwiro Ŋari ŋiny, nyi gwimaŋa liŋa ŋinenaŋina. 6Gwiro ŋinena aruŋwna kalo giter ko, Ŋa gwaro gasiis gwortal, gi ruṯba gwa Malkiis̱aadag. 7Gwina gwijo gi ŋwamun ŋwa aŋinu yuŋun, dina abiŋaijuŋw Kaloŋa gwulo gwai gwuleny a ŋwal ŋwai ŋwothaije Kaloŋa galo gina guthi ŋoma duŋw gilaŋiye gi ai, a ŋeda deŋinaijo ŋinena uthuŋw ŋidhenyo ŋuŋun; 8ŋinena ruŋw Ŋari, ŋwalimiye uthejuŋw kuni gi dhuŋun dhina dhumeyo ŋiya; 9a gwimaro didima, ŋwuro kweleny gwa gilaŋ gwina gwathije gwortal di ŋediŋa peth lina lathuthejo ŋeduŋw nyuni; 10gwina gwidhedhinu jiriny di Kalo jan kweleny gwa gusus gi ruṯba gwa Malkiis̱aadag.
11Gi dhuŋun dha dhuŋun ibidha anaŋa luthi dhuŋuna dhoinyadho dhanadhai abiŋi, a dhibur dhajaŋajo dhuŋuna ibidha, ŋinena uthanya eluŋw micimicol didiŋini. 12Titiganu gwiŋiranu danyaro liji lina lathalimiye lijo, ŋinena diŋinanya kaija gina golaŋ ganu, abi nyaŋa libupo daji kwiji gweta alimiye manaŋ dhuŋuna dhina dhiro kwerkwereny dhina dhidhi di Kalo; a nyaŋa limaro lina libupo ŋan, a nyaŋa lati libupo kia gina gibur no. 13Gwati gweda gwina gwathiye ŋan gwiliŋidhi dhuŋuna momaŋ gi dhuŋun dha dhuŋun dhina dhiŋir no, ŋinena ruŋw lugur. 14Abi kia gina gibur gan ŋediŋa lina limaro lipilipa, lina limuthi ŋadigirenya ŋina ŋaliminu dilliŋa dhuŋuna gi dhuŋun dhina dhiŋir a dhina dhike.
Currently Selected:
Ⲁibraaniyiin 5: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
