Qalaaṯiiya 4
4
Alŋa liro keleŋa ga Kalo imaan gwai gi al Masiiẖ
1Nyi gwarnu ŋari ŋina ŋiro lira, ada ŋimaje nanaŋ ŋiro ŋitiny, ŋati ŋiro ter gi gine no, abi ŋiro kweleny gwa ŋidi peth; 2abi ŋeda gwoma gi doi ganu da liji lina lathidima a wukala di gi lamun lina lidhunijo babuŋw gwuŋun. 3A minoŋ alŋa ko, dina rana litilitiny, alŋa liro jine gi dhuŋun dhina dhigitinu kidhila. 4Abi dina ma lamun ila, a Kalo ukeja Ŋare ŋuŋun, ŋwuliŋini gi kwa, ŋiliŋinu duthejo dhuŋuna dha naamuus kuni, 5duŋwulbibre lina lijo gi naamuus ganu, dilro keleŋa ga Kalo. 6A ŋinena nyaŋa limaro keleŋa guŋun, a Kalo gimukeja Dhigirima dha Ŋari ŋuŋun gi dugor ganu dalo, ŋwure gwula, ŋwarnu, Babo gwai, a Babo. 7A minoŋ ŋa gwati gwiro gine manaŋ no, ŋabiro ŋari; a ada ŋa gwimaro ŋari, a minoŋ ŋa gwuthi ŋelenya ŋa Kalo al Masiiẖ gwai.
Buulus gwabiŋaijo lijo lina limurle dugore galo degen gi ŋidi ŋina ŋike dathil auradhi dapai ŋida ŋina ŋike manaŋ no
8Abi kaija ibige gina gati giliŋidhanyagai Kaloŋa no, nyaŋa lupijo ŋediŋaije ŋiro lina liro kalo, abi gi dhuŋun dhina dhuthilo lati liro kalo no. 9Abi ŋinena nyaŋa limaliŋa Kaloŋa, abi gwoinyadhanu nyaŋa limaliŋini dugun, akwai nyaŋa luthi ŋoma daura manaŋ gi dhuŋun dhina dhigitinu kidhila dhina dhimulo nono a dhina dhati dhuthi ŋida no dhina dhathanya bupe, danyadhai gukini manaŋ? 10Nyaŋa lathaŋidhani ŋwamun, a ŋwamun ŋwa ko, a ŋwa dhorum, a ŋwa ŋwuram, a ŋwa kaiyo, a jidhila. 11Nyi gwidhenyadhadho dagalo dathajupijo ŋiro tur no.
12Nyi gwothaijaje galo, limega lai, danyaro ŋinena nyi; ŋinena nyi ko gwaro ŋinena nyaŋa; athinyil upijo dhuŋuna dheda dhina dhike no. 13Abi nyaŋa liliŋidhi akwai gi mule nono gwa aŋinu nyi gwabiŋaijaje Dhuŋuna dhina Dhiŋir kwereny. 14A idheje gwina gwijo kaŋinu iny athanya doinyo, i athanya irinu no; nyilbuminyi gwiro ŋinena malaak gwa Kalo, gwiro ŋinena nyan uminyi al Masiiẖ Yasuuⓐuŋw. 15A minoŋ dhuŋun dhimela na dhina dhuthi baraka dhina dhabiŋaijaje? Ŋinena nyi gwiro shaahid gwalo darnu nyaŋa limawala je galo jalo, nyildhedha, ada dhuŋun ibidha dhimuthi ŋoma dupini. 16A minoŋ nyi gwimaro dhuwan dhalo, ŋinena majabiŋaijo dhuŋuna dhina dhiro titiganu a? 17Liji ibila lara lajiŋiriye dugore; abi dhuŋun dhegen dhati dhiŋir no, abi lathibupe dajilodhadha buiny danyabupe dhuŋuna dhegen. 18Dhuŋun dhiŋir ada limaji uminyi gi dhuŋun dhina dhiŋir ŋwamun peth, a gwati gwaudhi ada nyi gwimaje dagalo ganu dogo no. 19Keleŋa gai giny gina gitigitiny, nyi gwimumi ŋiya ko gwan nyaŋa gi liŋini di al Masiiẖ gitini dagalo momaŋ. 20Abi nyi gwuminyu dinyje dagalo, a nyurle ŋwal galo ŋwiny; ŋinena ubiny galo gwan nyaŋa.
S̱uura gi dhuŋun dha kitham gina gurun
21Abiŋaijinyilo, nyaŋa lina lathibupe danyaje gi naamuus ganu, nyaŋa lati luthejo dhuŋuna dha naamuus nyuni na? 22Ŋinena ulinuŋwna darnu, Ibraahiim gwuthi keleŋa ram, ŋeta ŋa kwa gwina gwiro gine, a ŋeta ŋa kwa gwina gwati gwiro gine no. 23Abi ŋina ŋiliŋinu kwa gwina gwiro gine, ŋiliŋinu gi dhuŋun dha aŋinu; abi ŋina ŋiliŋinu kwa gwina gwati gwiro gine no, ŋiliŋinu gi dhuŋun dhina dhabiŋaijidhai Kalo. 24A ŋidi peth ibiŋa ŋiro s̱uura; ibila lina liro ram liro ŋinena dhuŋun dhina dhidiminu ram; a dheta dhigitinu gi len lina lan Siinaa, diliŋa keleŋa gina giro jine, gwina gwan Haajar. 25Ŋinena Haajar ibigwa gwiro ŋinena len lina lan Siinaa gi Ⓐarabiiya, abi gwiro ŋinena Urushaliim gwina gwo ŋinena, a gwina gwiro gine keleŋa gai guŋun. 26Abi Urushaliim gwina gwo kabo, ŋeda gwina gwiro nana gwega alŋa peth, ŋeda gwati gwiro gine no. 27Minoŋ dhulinu, Iŋirii dhugore, kwa gwai gwina gwiro ludum gwina gwati gwiliŋidhi no; opadhalaŋ, ŋure gwula, ŋa gwina gwati gwuthi ŋwuredenya ŋwa dhiliŋa no; ŋinena kwa gwina gwijalo cucun gwuthi keleŋa goinyadhanu gi kwa gwina gwuthi kwoma. 28Abi anaŋa, limega lai, anaŋa liro ŋinena Isẖaag, anaŋa liro keleŋa ga dhuŋun dhina dhabiŋaijidhai Kalo Ibraahiimuŋw. 29Abi gwiro ŋinena kaija ibige gwina gwiliŋinu gi dhuŋun dha aŋinu ŋwirini gwina gwiliŋinu gi Dhigirim, a minoŋ ŋinena ko. 30Abi ŋinena kitham garakwai? Ruco kwaio gwina gwiro gine a ŋari ŋuŋun; ŋinena ŋari ŋa kwa gwina gwiro gine ŋati ŋalmutha ŋelenya ŋari ŋai ŋa kwa gwina gwati gwiro gine no. 31A minoŋ, limega lai, anaŋa lati liro keleŋa ga kwa gwina gwiro gine no, abi anaŋa liro keleŋa ga kwa gwina gwati gwiro gine no.
Currently Selected:
Qalaaṯiiya 4: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
