Qalaaṯiiya 3
3
Kalo gathuminyi lijo gi dhuŋun dha imaan gwati gi dhuŋun dha naamuus no
1Liji lai la Qalaaṯiiya lina liro jirila, ei gwiro gwina gwimajapa ŋima, dathanya uthejo dhuŋuna dhina dhiro titiganu nyuni no? Gi je ganu jalo Yasuuⓐ al Masiiẖ gwigitinu dagalo, ŋwurinyini gi lure alaŋ lina limaliganu. 2Nyi gwara gwaliŋa dhuŋuna ibidha dagalo dogo. Nyaŋa lapo Dhigirima ŋiro ŋai ŋa naamuus a? i diŋini gwai gwa imaan. 3A minoŋ nyaŋa liro jirila; dina manya ela gi Dhigirim, nyaŋa limameajini ŋinena gi aŋinu a? 4Nyaŋa limumi ŋiya dhuŋun dhai dhoinyadho tur a? Ada dhimaro tur. 5A minoŋ gwina gwimajidhedha Dhigirima, a ŋwapai ŋiro ŋina ŋipiŋipa dagalo ganu, gwapo ŋiro ibiŋa ŋiro ŋai ŋa naamuus a? i diŋini gwai gwa imaan. 6A gwiro ŋinena uminyina Ibraahiim Kaloŋa, ŋwugitini gi ẖisaab gwuŋun darnu dhuŋun dhuŋun dhiŋir. 7Liŋidhul minoŋ darnu lina luthi imaan ŋediŋa liro keleŋa ga Ibraahiim. 8A kitham gina gaŋinu kwereny darnu Kalo gaji giŋiriye Liumam gi ŋwamun ibiŋwe imaan gwai, ŋwabiŋaijo Ibraahiimuŋw kwereny Dhuŋuna dhina Dhiŋir, ŋwarnu, Duguŋa Liumam peth laji labarikini. 9A minoŋ lina luthi imaan libarikinu Ibraahiim ŋalai gwina gwuminyu. 10Ŋinena peth lina luthi ŋiro ŋa naamuus lo gi dhuŋun dhadhi luini gwina gwikanu gwuleny gwadhai. Minoŋ dhulinu, Peth lina liluini lina lati lathela gi dhuŋun peth dhina dhulinu kitham ganu ga naamuus dilapai no. 11Gwimaŋini darnu abi kwiji gwate gweda gwina gwiŋirinu naamuus gwai gi je ganu ja Kalo no. A minoŋ gwina gwiŋir gwamidhe imaan gwai. 12Abi naamuus gwati gwiro gwa imaan no; abi kwiji gwina gwathapai dhuŋuna dha naamuus gwamidhe naamuus gwai. 13Al Masiiẖ gwimijibibre gi lo gwa naamuus, gwina gwigitinu duŋwuro lo gwan alŋa; a ŋinena ulinuŋwna darnu, Luini gwaje gi liji peth lina lalijini gi lure alaŋ lina limaliganu. 14Di baraka gwa Ibraahiim ila gi Liumam Yasuuⓐ al Masiiẖ gwai; dilapai dhuŋuna dhina dhabiŋaijijidhai dha Dhigirim imaan gwai.
15Limega lai, nyi gwabiŋu dhuŋun dhai dha kwiji; Gwati gweda gwina gwuthi ŋoma duŋwirniye dhuŋuna ibidha dhina dhidiminu no, dhimulini di; a kwiji gwate gwina gwuthi ŋoma duŋwbadhaije no. 16Abi dhuŋun dhina dhabiŋaijidhai Kalo Ibraahiimuŋw dhimabiŋini gi Ibraahiim a gi lulaŋ luŋun. Gwati gwabiŋu gwiro ŋinena gwabiŋudhi gi ŋwulaŋ ŋwoinyadho no; ŋwubiro ŋinena gwabiŋudhi gi lulaŋ letipo, a gi lulaŋ luŋun, lina lan al Masiiẖ. 17A nyi gwabiŋu dhuŋuna ibidha darnu, Dhuŋun dhina dhidiminu dhuminyinu kwereny di Kalo gina go gi al Masiiẖ; a naamuus gwina gwidhedhinu gidon gi jidhila jina jiro arbaⓐ miiya wa talatiin gwati gwa kwiji ruje tur no, dathuŋw rujo dhuŋuna dhina dhardhai Kalo tur no. 18Ada dhuŋun dhimaje dhadhi madhadhe ŋeleny alaŋ gi naamuus, a dhati dhaje ko gi dhuŋun dhina dhardhai Kalo no; abi dhima Kalo dhedha Ibraahiimuŋw gi dhuŋun dhina dhabiŋaijuŋwdhai.
Kworaŋ jibi Kalo dhedha naamuus?
19A gi dhuŋun ibidha naamuus gwiro dhaŋ? Gwima ginyadhe gi dhuŋun dha dhapai ŋida ŋina ŋike, di maji ma Lulaŋ ila lina limal dhuŋun dhina dhardhai Kalo gitini; a ŋwugitini malaayka lai gi dhoi dha gweta gwina gwo keligeny ganu. 20Abi gwina gwo keligeny ganu gwati gwiro gwa kwiji gwetipo no, abi Kalo giro getipo. 21Abi naamuus gwirinu dhuŋuna dhina dhardhai Kalo a? Oo. Abi ada naamuus gwimadhedhini gwina gwuthi ŋoma gwadhedha midhuŋw, a titiganu dhai ila naamuus gwai. 22Abi kitham gimalaŋthinijo lijo peth lina lo gi ŋidi ganu ŋina ŋike, duŋwuldhedha dhuŋuna dhina dhardhai Kalo gi imaan gwa Yasuuⓐ al Masiiẖ di ŋediŋa lina luminyu. 23Abi kwereny nanaŋ imaan gwati gwidhi no, alŋa litedhinu naamuus gwai, a alŋa lilaŋthinu gi dhuŋun dha imaan gwina gwaji gwaŋini gidon. 24A minoŋ naamuus gwiro gweta gwina gwathiji ethadhe dijapa di al Masiiẖ, dilro liŋir imaan gwai.
Dhuŋun dhina dhuthi imaan
25Abi dina maji ma imaan ila, alŋa lati loma gi ŋoma ŋa gweta gwina gwathiji ethadhe manaŋ no, 26abi nyaŋa peth liro keleŋa ga Kalo imaan gwai gi al Masiiẖ Yasuuⓐ. 27Gwiro ŋinena nyaŋa peth lina limapai maⓐmuudiiya gi al Masiiẖ, nyaŋa limagena al Masiiẖuŋw. 28Gwati gweda gwina gwiro Yahuudi i Yuunaani no, a gwati gweda gwina gwiro gine i gwina gwati gwiro gine no, a gwati gweda gwina gwiro kwoma i gwina gwiro kwa no; abi nyaŋa peth liro letipo gi al Masiiẖ Yasuuⓐ. 29A ada nyaŋa limaro la al Masiiẖ, a minoŋ nyaŋa liro ŋwulaŋ ŋwa Ibraahiim, a nyaŋa luthi ŋelenya gi dhuŋun dhina dhabiŋaijidhai Kalo.
Currently Selected:
Qalaaṯiiya 3: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
