Qalaaṯiiya 5
5
1A minoŋ muthinul galo gi ẖurriiya gwina gwimiji al Masiiẖ dhedha, athanya idetho manaŋ ko gi loka la ŋine no.
Aram ŋediŋa lapai dhuŋuna dheta gi dhuŋun ibidha ram al Masiiẖ i naamuus
2Aŋadhul, nyi gwina gwan Buulus gwajaicinu, Ada nyaŋa limurtedhini, al Masiiẖ gwati gwuthi dhuŋuna dheda dagalo no. 3Abi nyi gwateje galo ko gi liji peth gweta gweta gwina gwuredhinu darnu, ŋeda gwuthi gamja gi naamuus peth. 4Al Masiiẖ gwati gwuthi dhuŋuna dheda dagalo, nyaŋa lina liŋirinu naamuus gwai no; nyaŋa limida gi niⓐma. 5Abi alŋa Dhigirim dhai, alŋa lidhunijo dhunijuŋw gwa dhuŋun dhina dhiŋir imaan gwai. 6Ŋinena gi Yasuuⓐ al Masiiẖ urtedhini gwati gwuthi je ganu gi dhuŋun dheda no, i lina lati lurtedhinu no; abi imaan gwina gwathapai ŋiro uminyi gwai. 7Nyaŋa lidhi momaŋ; ei gwiro gwina gwimajekajo dathanya uthejo dhuŋuna dhina dhiro titiganu nyuni no? 8Urle galo ibigwa gwati gwidhi di ŋeda gwina gwurniaje no. 9Jirui jitiny jathuthedha jila peth. 10Nyi gwuthi uminyuŋw dagalo gi Kweleny, dathanya uthi af kaar gwiter no; abi gwina gwathajikiye dugore gwaji gwapai ẖukm gwuŋun; ei gwiro.
11A nyi, limega lai, ada nyi gwoma gwimathabiŋaijo lijo dhuŋuna dha urtedhini, kworaŋ nyibi bujo irinuŋw manaŋ? A minoŋ kol gadhi dekajo ga lure lina limaliganu gimaro tur. 12A nyi gwuminyu darnu lina lathajikiye dugore lathurte ko.
Aram ẖurriiya gwudhini uminyi gwai
13Ŋinena, limega lai, nyaŋa limurnini gi ẖurriiya; abi athanya apo ẖurriiya duŋwuro lamun lina laudhi ladhapai dhuŋuna dhina dhathi aŋinu bupe dhina dhike no, abi uminyi gwai apaijiyul ŋiro gweta gweta dagalo ganu. 14Ŋinena naamuus peth gwimameajini gi dhuŋun dhetipo dhina dhiro minoŋ; Aram ŋa gwuminyi kwijo gwina gwathanyagwai jaijiye galo gwiro ŋinena uminyaŋana gwidom gwuŋa. 15Ada nyaŋa limathije momaŋ deny gweta gweta dagalo ganu, ethadhinul galo dathanya inyinu gweta gweta dagalo ganu ko no.
Udhini Dhigirim dhai
16A minoŋ nyi gwajaicinu, Idhidhul gi Dhigirim, a nyaŋa lati luthi ŋoma liŋiriye amaraŋw dugore gwa ŋidi ŋina ŋathamira aŋina ŋina ŋike no. 17Ŋinena ŋidi ŋina ŋathamira aŋina ŋina ŋike ŋiro dhuwan dha Dhigirim; a Dhigirim dhiro dhuwan dha ŋidi ŋina ŋathamira aŋina ŋina ŋike; a ibiŋa ram liro dhuwan di gweta a gwiter; a minoŋ nyaŋa lati luthi ŋoma dapai dhuŋuna dhina dhathanyabupe dapai no. 18Abi ada nyaŋa lima udhini Dhigirim dhai, nyaŋa lati gi naamuus ganu no. 19Ŋinena ŋiro ŋa aŋinu ŋaŋinu ŋina ŋiro minoŋ, ŋidhir, a dhuŋun dha dhidhre la lai, a ŋirle, a dhuŋun dhina dhathi aŋinu bupe dhina dhike, 20a dhuŋun dha dhidijo ŋwoboŋ ŋwurko ŋwai, a ŋima, a dhuŋun dha dhirini lijo, a kaijiye gi je, a dhuŋun dhadhi olanalaŋ kwiji gwiter, a dikedugore, a dikaijiye gi je, a dhuŋun dha dhikiye lijo dugore, a dhuŋun dha dhuminyi Kaloŋa dhuŋun dhai dhina dhati dhiro titiganu no. 21A dhuŋun dhadhijidhai ŋidi amira ŋa liji liter, a dhuŋun dhadhi rinyie dhimar, a dhuŋun dha dhirlele, a dhuŋun dha dhapai dhuŋuna buiny, a dhuŋun dhina dhiro minoŋ; gi dhuŋun ibidha nyi gwajabiŋaijo ŋinena, gwiro ŋinena abiŋaijajina kwereny ko, darnu lina lathapai dhuŋuna dhiro minoŋ lati luthi ŋelenya kidhila ga Kalo no. 22Abi fruuta gwa Dhigirim gwiro uminyi, a iŋir dugore, a audhaijiye galo, a mutha dugore gwortal, a ŋimiri, a iŋir, a imaan, 23a ruini litilitiny, a dhuŋun dhadhi mutha dugore gi ŋidi ŋina ŋathil dugor bupe; naamuus gwati gwiro dhuwan dha dhuŋun dhina dhiro minoŋ no. 24Abi lina liro la al Masiiẖ limai gi lure alaŋ lina limaliganu kaŋinu uminyi gwai gwa ŋidi ŋina ŋathil aŋinu bupe. 25Ada alŋa limamidhe gi Dhigirim, abricije alelila ko gi dhuŋun dhina dhuthi Dhigirim. 26Athijabrico alŋa lare ŋamilai ŋina ŋiro tur no, i dikaijiye dugore gweta gweta dega ganu no, i diluthi dhuŋuna dhadhijidhai ŋidi amira ŋa gweta gweta dega ganu no.
Currently Selected:
Qalaaṯiiya 5: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
