Kuuluussi 4
4
1Leleny lai, getul dhuŋuna dhina dhidhunu galo gi jine jalo, nyalubiye galo; nyaliŋa darnu nyaŋa ko luthi Kwelenya gi Sama. 2Athanya abiŋaijo Kaloŋa ŋwamun peth, nyanje galo je jai, shukr gwai; 3nyabiŋadhaijo Kaloŋa gwan anaŋa ko, diji Kalo igiyejo gibura galo ga dhuŋun, danabiŋi gi dhuŋun dhina dhigilibicinu dhan al Masiiẖ, gi dhuŋun dha ŋeda nyi gwigukinu ko. 4Dinyabiŋi, gwiro ŋinena gwiŋir dinyinabiŋi. 5Idhidhul bebra gwai gi ŋediŋa lina lathije por, nyabibre lamun lina liŋir. 6Athanya abrico dhuŋuna dhalo dhadhabiŋi ŋwabiŋini ŋwamun peth niⓐma gwai, ŋwugitini momaŋ mudha gwai, danya liŋa akwai gwiŋir danya abiŋaijo lijo peth lina lathajothaije galo.
Salaam gwa Buulus a dhuŋun dhina dhimirudhi
7Tikhiikus gwaji gwajabiŋaijo dhuŋuna peth dhan ŋiro ŋiny, gwina gwiro mega gwina gwuminyinu, ŋwuro gadham gina giŋir a gine gina gathanal je gi Kweleny. 8Gwina gwukejiny dagalo gi dhuŋun ibidha duŋwliŋa dhuŋuna dhina dhijo dagalo ganu, a digathaje dugore dalo uwa; 9ŋediŋa Unisiimus gwai, gwina gwiro mega gwina gwiŋir gwina gwuminyinu gwina gwiro gweta dagalo, ŋediŋa laji lajiliŋidhiye dhuŋuna dhina dhimupini mina.
10Aristarkhus gwisalimiyaje gwina gwigukinana gwai, a Margus, gwina gwiro ŋari ŋa megen gwa Barnaaba gwina gwiro ŋera, (gwina gwimanyan diŋini dhuŋuna dhan ŋeda; ada gwimela dagalo, uminyul;) 11a Yasuuⓐ, gwina gwuthi jiriny jan Yuustus, lina liro la liji lina lurtedhinu; ŋediŋa dogo lathanal apaijiye ŋiro ŋan gidhila ga Kalo, lina limaro gathaje uwa gwiny. 12Abafraas, gwina gwiro gweta dagalo, gwina gwiro gine ga al Masiiẖ, gwisalimeyaje, ŋeda gwathapai ŋiro momaŋ ŋwamun peth ŋan nyaŋa abiŋaije gwai Kaloŋa gwuŋun, danya muthini galo nya meajini gi dhuŋun peth dhina dhibupo Kalo. 13Nyi gwiro shaahid dugun darnu gwuthi uminyuŋw gwoinyadho gwan nyaŋa, a ŋediŋa lina lo Lawudikiiya, a lina lo Hiyaraabuuliis. 14Luuga gwisalimeyaje, gwina gwiro ẖakiim gwina gwuminyinu, a Diimaas. 15Salimeyul limega lina lo gi Lawudikiiya, a Nimfaas, a kaniisa gina go gi dunu gwuŋun. 16A maji ma jawaab ibija abiŋini dagalo ganu, abricul ŋwabiŋini ko gi kaniisa ga liji la Lawudikiiya; a jina jo gi Lawudikiiya nyalabiŋaijo nyaŋa ko. 17A abiŋaijul Arkhibbusuŋw, nyaicinu, Daŋudhi galo daŋapai ŋiro momaŋ ŋina ŋimaŋalapai di Kweleny, a daŋal meaje. 18Salaam dhoi dhai dhiny, nyi gwina gwan Buulus. Aŋidhanul gukinuŋw gwiny. Niⓐma gwaje dagalo. Amiin.
Currently Selected:
Kuuluussi 4: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
