Kuuluussi 3
3
Dhuŋun dhina dhaji dhalapai ada anaŋa limadire al Masiiẖ ŋalai
1Ada nyaŋa limadire al Masiiẖ ŋalai, bupul ŋida ŋina ŋo kabo, kalo gina gan al Masiiẖ jalo gi dhoi dhina dhiro dhiŋir dha Kalo. 2Ireyul je galo gi ŋidi ŋina ŋo kabo, athanyal irijo je galo gi ŋidi ŋina ŋo kwiyaŋ no. 3Ŋinena nyaŋa limai, a midhe gwalo gwimagilibicini al Masiiẖ ŋalai di Kalo. 4Maji ma al Masiiẖ aŋina, gwina gwiro midhe gwega, a nyaŋa ko laji laŋini ŋeda ŋalai gi majdh.
5A minoŋ rinyiul ŋida ŋa aŋinu yalo ŋina ŋo kidhila; ŋidhir, a ŋirle, a duminyi ŋida ŋiter ŋina ŋati ŋiŋir no, a ŋidi ŋina ŋathajamira ŋina ŋiro ŋadhidijo ŋwurko ŋwai. 6Gi dhuŋun dha ŋidi ibiŋa a kadhugore gwa Kalo gwila gi keleŋa gina gati guthejo nyuni no. 7Ŋina ŋimanyan elila ganu nyaŋa ko gi ŋwamun ŋwina ŋwimerna dina janyan danyan midhe ganu. 8Abi ŋinena guthul nyaŋa ko ŋida ibiŋa peth; dikadugore, a dikadugore gwuleny, a ŋijigor, a dilo, a dabiŋi dhuŋuna dhina dhike gi ŋwinyu ŋwalo. 9Athanya abiŋu ŋidhuŋinaŋa gweta gweta dagalo ganu no, ŋinena manya wala kwijo galo gwina gwurun ŋiro ŋai ŋuŋun; 10a nyaŋa limagena kwijo gwina gwiyaŋ, gwina gwigitinu manaŋ gi liŋa, gwiro ŋinena s̱uura gwa ŋeda gwina gwigeto. 11Gitini gwai ibigwa gwina gwiyaŋ Yuunaaniyiin lati laje no i Yahuud, i liji lina lurtedhinu i lina lati lurtedhinu no, i liji la por, i liji lina liro Sikiithi, i lina ligukinu i lina lati ligukinu no, abi al Masiiẖ gwiro ŋidi peth gi liji peth.
12A minoŋ genul, liro ŋinena lina luthinilo Kalo ganu a lina liŋir didirel a luminyinu, dugor dai dina duthi inaŋw a ŋimiri, a ŋadigireny ŋina ŋirujinu ŋitiny, a ruini gwitiny, a mutha dugore gwortal; 13muthejiyul dugore gweta gweta dagalo ganu, danya dhudhani ganu gweta gweta dagalo ganu; ada kwiji gweta gwimuthi dhuŋuna dhadhi kadhe di kwiji gwiter; a gwiro ŋinena majin al Masiiẖ dhudhani ganu gi ŋidi ŋalo ŋina ŋike, a minoŋ nyaŋa ko. 14A gi dhuŋun ibidha peth genul uminyuŋw, gwina gwiro gukini gwina gwathiguke ŋida peth momaŋ. 15Nyabrico audhaijiyuŋw galo gwa Kalo ŋwuro kweleny gi dugor ganu dalo, gwina gwimanyan urnini gi aŋinu yetipo; nyaici shukran. 16Abricul dhuŋuna dha al Masiiẖ ŋwuje dagalo ganu ŋeleny ŋai, a nyaŋa bebra gwai peth nyalimiye gweta gweta dagalo ganu, nyalola mazaamiir gwai a dheliŋa dhai dha Kalo a dheliŋa dhina dhiro dhigirim, nyeliŋa niⓐma gwai gi dugor ganu di Kweleny. 17A ŋidi peth ŋina ŋathanyalapai i ŋiro, apillo peth gi jiriny ja Kweleny gwina gwan Yasuuⓐ, nyaici Kaloŋa shukran gina giro Babo ŋeda gwai.
Midhe gwa liji la dunu gwetipo lina liro Masiiẖiyiin
18La lai, uthejul loma lalo nyuni, gwiro ŋinena dhuŋun dhina dhaudhi di Kweleny. 19Loma lai, uminyul laio lalo, athanya uthi dhuŋuna dhina dhire gi dhuŋun dhegen no. 20Keleŋa gai, uthejul baboŋaije nana ŋalai lalo nyuni gi dhuŋun peth; ŋinena athi dhuŋun ibidha iŋiriye Kwelenya dhugore. 21Baboŋa lai, athanya kijo keleŋa galo dugore no, dathil mulo nono gi dugor ganu degen no. 22Jine jai, uthejul lelenya lalo nyuni gi ŋidi peth gi dhuŋun dha aŋinu; a gwati gi ŋiro ŋina ŋathil je aŋa, ŋiro ŋinena ŋina ŋathiŋiriye lijo dugore no, abi dugor dai dina diŋir athanya dhenya Kwelenya. 23A ŋidi peth ŋina ŋathanyal apai, apillo dugor dai, gwiro ŋinena dhuŋun dhina dhibupo Kweleny, a dhati dhan liji no. 24Nyaliŋa darnu di Kweleny nyaŋa laji lapai mukaafa gwa ŋidi ŋina ŋigitijajilo galo; ŋinena athanya upijo Kwelenya gwina gwan al Masiiẖ ŋiro. 25Abi gwina gwathenya lijo a gwaji gwapai dhuŋuna dhina dhike manaŋ dhan dhuŋun dhina dhike dhina dhathuŋw apai; a gi je ganu ja Kalo kwiji gwate gwina gwiŋiranu gi kwiji gwiter no.
Currently Selected:
Kuuluussi 3: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
