2 Tiimuuthaawus 3
3
Dhuŋun dha dhuŋun dhina dhike dhina dhaji dhila
1Abi liŋidhi dhuŋuna ibidha darnu gi ŋwamun ŋwina ŋwiro gidon ŋwamun ŋwaji ŋwila ŋwina ŋwibur. 2Liji laji luminyuni lidom legen, aluminyi gwarush gwoinyadho, alro lipilipa gi lidom legen, albiŋiye lidom legen, athil lo Kaloŋa, athathil uthejo baboŋaije nana ŋalai legen nyuni no, athathil aico shukran no, athil iŋirii didirel no, 3athiluthi uminyuŋw gwina gwathi liji lina liŋir uthi no, lati lathidhudhanu ganu ŋidi ŋina ŋike ŋina ŋupijilo liji liter no, athilabiŋa lijo liter ŋidhuŋinaŋa nono, athildhedha lidom legen ŋida ŋina ŋathamira aŋina yegen ŋina ŋike ŋoinyadho, a ŋediŋa liro ŋinena owaŋ, athathil uminyu ŋida ŋina ŋiŋir no. 4Athil orlani ganu limegen lai anugejiye, athathil dhunudhi gwitiny gi dhuŋun dhina dhara dhalure dhina dhijo ŋwura ganu ŋwegen no, athiluminyuni dhuŋuna dha ŋadigireny ŋegen, athiluminyuni iŋiruŋw dugore gwa gidhila gi uminyi gwa Kalo; 5aluthi s̱uura gwa dhuŋun dha Kalo, albirini ŋoma ŋuŋun; ŋaburle galo ŋutu ganu degen. 6A coŋ degen liro lina lathuni gi dunu gwa liji micol, alapai laio dhuŋun dhai dhegen dhina dhike lina lati luthi ŋadigirenya ŋoinyadho no, lina lathuminyi ŋida ŋina ŋike ŋitiŋiter ŋoinyadho. 7Lathalimini ŋwamun peth, athilbuthi ŋoma diluminyi liŋaŋw gwa dhuŋun dhina dhiro titiganu gatur no. 8A gwiro ŋinena Yanniis a Yambiriis lina lidoinyajo Muusuŋw a ŋediŋa ko lidoinyo dhuŋuna dhina dhiro titiganu; ŋediŋa liro liji lina luthi ŋadigirenya ŋina ŋidigiro, a gi dhuŋun dhadhi imaan athildoinya. 9Abi ŋediŋa lati luthi ŋoma ladoga gwoinyadhanu no, ŋinena adhi dhuŋun dhegen dhina dhike aŋini momaŋ gi liji peth, gwiro ŋinena man dhuŋun aŋini dha liji lina lidoinyo dhuŋuna dha Muusa ko.
Gwabiŋaijo Tiimuuthaawusuŋw duŋwaŋidhani dhuŋuna dhina dhuthuŋw
10Abi ŋa gwina gwimagwujani taⓐliim dhiny, a dhai dhiny dha midhe, a bupe gwa dhugor dhiny, a imaan gwiny, a mutha dhugore gwiny gwortal, a uminyi gwiny, a mutha dhugore gwiny, 11a irinini gwiny, a dhuŋun dhina dhibur dhina dhibujiny, a ŋidi peth ŋina ŋibujiny gi Anṯaakiiya, a Iguuniiya, a Listra; a irini gwina gwiminy muthedha dhugor dhai dhiny, a gi ŋidi ibiŋe peth Kweleny gwiminyi ubire. 12A peth lina libupo dilmidhe bur nono gi dhuŋun dha Kalo gi Yasuuⓐ al Masiiẖ laji lalirini. 13Abi liji lina like a lina lathukinejo lijo ganu laji ladoga gi dhuŋun dhina dhikanu, alukinejo lijo ganu, alukinejini ganu. 14Ŋabi muthini galo gi dhuŋun dhina dhimaŋa alimini a dhimaŋa uminyi, ŋaliŋa lijo lina lalimiyaŋa. 15Ro dilaŋ raŋa ŋari ŋitiny ŋa gwiliŋidhi jitham jina jiŋir didirel, jina juthi ŋoma jaŋabebriye di gilaŋ gi imaan gwina gwo di al Masiiẖ Yasuuⓐ. 16Jitham peth ja Kalo jidhedhinu ŋoma ŋai ŋa Dhigirim dhina Dhiŋir, a juthi je ganu gi taⓐliim, a dhuŋun dha ŋeŋira, a dekajo lijo, a dilalimiye gi dhuŋun dhina dhiŋir. 17Di kwiji gwa Kalo ro didima, ŋwuthi iŋiruŋw gi ŋiro peth ŋina ŋiŋir.
Currently Selected:
2 Tiimuuthaawus 3: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
