2 Tiimuuthaawus 4
4
1Nyi gwaŋa abiŋaijo momaŋ gi je ganu ja Kalo, a Kweleny gwina gwan Yasuuⓐ al Masiiẖ, gwina gwaji gwakimiye lijo lina limidho a lina laio gi aŋini gwuŋun a gidhila guŋun, 2abiŋaijo lijo dhuŋuna dha Kalo; ŋuminyi dapai ŋiro ŋuŋun gi ŋwamun ŋwina ŋwiŋir, a ŋwina ŋwati ŋwiŋir no; aŋajilo, ŋalŋeŋira, ŋalalimiye mutha gwai dhugore gwortal a taⓐliim dhai. 3Ŋinena adhi ŋwamun aji alila ŋwina ŋwati ŋwaji ŋwal ŋwai muthedha taⓐliim dhina dhiro titiganu no; abi gi dhuŋun dhegen dhina dhike dhina dhathil amira alwurteja muⓐallimiin liduŋw loinyadho degen lina lathalimiye dhuŋuna dhina dhiŋir gi nyuni ganu nyegen, abi dhuŋun dhegen dhati dhiro titiganu no. 4Alurleje nyuni nyegen ter gi dhuŋun dhina dhiro titiganu, alburladha gi dhuŋun dhina dhiro dirini. 5Ŋabi je galo je jai gi dhuŋun peth, ŋa mutha dhugore gi dhuŋun dhina dhibur, apo ŋiro ŋa kwiji gwina gwathabiŋaijo lijo dhuŋuna dha Kalo, medhajo ŋiro ŋuŋa. 6Ŋinena nyi gwo momaŋ diny dhedha aŋina iny aiuŋw, ŋinena ma lamun la ai gwiny je githo. 7Nyi gwimapai ŋoŋora ŋina ŋiŋir, a nyi gwimamedhaje ŋiro ŋina ŋidhedhinyilo Kalo, a nyi gwimamutha imaan. 8A gidon taaj dhiminyi gitinijo galo dha dhuŋun dhina dhiŋir, dhina dhiny Kweleny dhedha gi lamun ibile, gwina gwadhi akimiye dhuŋun dhai dhina dhidhunu galo, a dhati dhan nyi dogo no, ŋwubiro dhan liji peth lina lathuminyi aŋinuŋw gwuŋun ko.
Dhuŋun dhina dhabiŋuŋw dhan liji coŋ a dhuŋun dha salaam
9Jo momaŋ daŋa ila diginy babraŋ. 10Ŋinena Diimaas gwiminyi gathani, gwimuminyi gidhileo ibiga, a gwimela Tasaaluuniika; a Kiriiskiis gwimela Qalaaṯiiya, a Tiiṯus gwimela Dalmaaṯiiya. 11Luuga gwiro gwetipo gwina gwo gwijana gwai. Odhana Margusuŋw, nyagwila ram, ŋinena iŋiriyuŋw diginy gi ŋiro. 12Abi Tikhiikus gwiminyi ukeje gi Afasus. 13Luga lina liminyi gathana gi Taruwaas di Kaarbuus apana maji maŋa ila, a jitham ko, abi gwuleny jurna jina julinu. 14Iskandar gwina gwathapai ŋiro ŋa naẖaas gwiminyi aŋinijo dhuŋuna dhina dhike dhoinyadho; a Kweleny dhedha jiza gwiro ŋinena gwa ŋiro ŋuŋun. 15Ethadhinu galo dugun ko; ŋinena ŋeda gwimadoinya dhuŋuna dhega gwuleny. 16Gi lamun lina liro kwerkwereny gi maẖkama gwiny kwiji gwate gwetipo gwina gwijana gwai no, abi peth liminyi gathani, lati lal Kalo dhedha jiza gi dhuŋun dhegen no. 17Abi Kweleny gwidhunudhana gwai, a nyi biriye nono; diny gwai medhaje dhuŋuna dhina dhathiny abiŋaijo lijo, a Liumam peth laji ladiŋini; a gwiminyi ubire gi linyu la lima. 18A Kweleny gwaji gwinyi ubire gi ŋiro peth ŋina ŋike, a gwiny gilaŋiye gi kidhila guŋun ga Kabo; gwina gwuthi majdh gwina gwiro gwortal a gwortal. Amiin.
19Salimiyo Biriiskaŋaije Akiila gwai a dunu gwa Uniisiifuurus. 20Araastus gwo Kuurinthuus, abi Turuufiimus gwiminyi gathana gi Kiiliitus gwuma. 21Jo momaŋ daŋa ila kwereny nanaŋ ko gati gidhi no. Afbuulus gwisalimiyaŋa, a Buudiis, a Liinus, a Kalaafidiiya, a limega peth. 22Kweleny gwina gwan Yasuuⓐ al Masiiẖ gwalije dhigirim dhai dhuŋa. Niⓐma gwaje dagalo. Amiin.
Currently Selected:
2 Tiimuuthaawus 4: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
