2 Tiimuuthaawus 2
2
1Ŋabi bur nono, ŋari ŋai ŋiny, gi niⓐma gwina gwo di al Masiiẖ Yasuuⓐ. 2A dhuŋun dhina dhimaŋa diŋini diginy shahaada gwai gwa liji loinyadho, ŋadhedha lijo lina liŋir, lina laji luthi ŋoma dalimiye lijo liter ko. 3Athaŋabije dimutha dhugore gi dhuŋun dhina dhibur, gwiro ŋinena ejigur ina iŋir ya Yasuuⓐ al Masiiẖ. 4Kwiji gwate gweda gwina gwathi ro ejigur ŋwubi lagaje ŋiro ganu ŋiro ŋai ŋadhi midhe ibigwa; duŋw iŋiriye kwijo dhugore gwina gwunijo duŋwuro ejigur no. 5A ko ada kwiji gweta gwimabupe dilapai liji lai gwidera gwiro ŋinena digenadhe i dibuble, ada gwimaro nimra gwetipo gi gwider ibigwe, gwati gwuthi ŋoma dapai mukaafa, ada gwati gwimuthejo kwelenya gwa gwider kuni no. 6Kwiji gwina gwathapai ŋiro ŋa dhiruiny aram ŋeda gwaro gweta gwina gwapai ŋida ŋa dhiruiny kwerkwereny.
7Liŋidhi dhuŋuna dhina dhinyi dhare; a Kweleny gwaŋadhedha liŋaŋw gi ŋidi peth. 8Aŋidhanu Yasuuⓐ al Masiiẖuŋw gwina gwimadire dai gwina gwiro lulaŋ la Daawud gi dhuŋun dha Dhuŋun dhiny dhina Dhiŋir; 9gi dhuŋun ibidha a nyi gwathimutha dhugore gi dhuŋun dhina dhibur, nyuminyi ko digukini gwiro ŋinena kwiji gwina gwapo ŋida ŋina ŋike; abi dhuŋun dha Kalo dhati dhagukini gatur no. 10A minoŋ nyi gwamutha dhugore momaŋ gi ŋidi peth nyura lijo galo lina luthinuŋwulo ganu, dilbuje ko gilaŋuŋw gwina gwo di al Masiiẖ Yasuuⓐ majdh gwai gwina gwathije gwortal. 11Dhuŋun dhiro titiganu dhina dharnu, Ada alŋa limai ŋeda ŋalai, alŋa lamidhe ŋeda ŋalai ko. 12Ada alŋa limamutha dugore momaŋ, alŋa labuje ŋelenya ŋeda ŋalai ko; abi ada gwimalirini, a ŋeda gwaji gwijirini ko. 13Ada alŋa lati limuminyi no, abi ŋeda gwathije gwiŋir; gwati gwuthi ŋoma dirini gwidom gwuŋun no.
Dhuŋun dhina dhuthi olaŋw gi dhuŋun dhadhi kadhe
14Aŋidhaniyo lijo dhuŋuna ibidha momaŋ, ŋaldhedha amr gi je ganu ja Kweleny athil kadho gwan dhuŋun ibidha no; dhuŋun ibidha dhati dhuthi je ganu no a dhathikiye lijo dugore lina lathidiŋini. 15Jo momaŋ daŋadhedha Kaloŋa gwidom gwuŋa gwina gwuminyuŋw, ŋaro gweta gwina gwati gwuthi dhara gi ŋiro ŋuŋun no, ŋabaŋiye dhuŋuna dhina dhiro titiganu dhuni gwai galo. 16Ŋabi tu ganu gi dhuŋun dhina dhiro tur a dhina dhiro ŋirle; ŋinena athileladha di bai galo gwoinyadho gi dhuŋun dhina dhati dhiro dha dhuminyi Kaloŋa no. 17A dhuŋun dhegen dhaji dhabai galo gwiro ŋinena gibethe gina gatheny aŋina; a lina limal jibithe eny gi dhuŋun ibidha lan Hiimiinaayus a Fiiliitus; 18lina limadhudhe gi dhuŋun dhina dhiro titiganu, alarnu dire dai gwimaje; a gi dhuŋun ibidhe limurle imaan galo gwa liji coŋ degen. 19Abi dhugul dha Kalo dhina dhibur dhathimuthini galo momaŋ, ŋwuthi khithm ibiga, Kweleny gwiliŋidhi lijo lina liro luŋun; a, Abrico lijo peth lina lidhedhinu jiriny ja al Masiiẖ altu ganu gi ŋidi ŋina ŋike. 20Abi gi dunu gwina gwipa ŋidi ŋate ŋo mine ŋina ŋiro dahab i faḏḏa dogo no, albiro dure a ŋaijo ko; a coŋ degen ŋiro ŋidi ŋina ŋadhi neye, a ŋiter ŋina ŋati ŋadhi neye no. 21A minoŋ ada kwiji gweta gwimuye dhugore dhuŋun gi ŋidi ibiŋa, gwaji gwaro ŋinena kwoŋ gwadhi neyini, gwina gwijuro, gwiŋir dupijo Kwelenya ŋiro, a ŋwujarimani gi ŋiro peth ŋina ŋiŋir. 22Abi gi dhuŋun dhina dhathamira aŋina dhina dhathi jamal apai; ŋababire degen, ŋabi gwuje dhuŋuna dhina dhiŋir, a imaan, a uminyi, a audhaijiye galo ŋediŋa lai lina lathurnie Kwelenya dugor dai dina dijuro. 23Ŋabi tu ganu gi uthe galo gwina gwiro ŋirila a gwina gwati gwaliminu no, ŋaliŋa darnu dhuŋun ibidha dhathapa kaijiyuŋw gi je. 24A gadham ga Kweleny gati giŋir dilkadhe liji lai no; ŋwubuthi ŋimira gi liji peth; ŋwiŋir dalimiye, a ŋwumutha dhugore gi dhuŋun peth dhina dhibur, 25dhugor dhai dhina dhiŋir dhina dhirujinu dhitiny ŋwulalimiye lina lathidoinya dhuŋuna dha Kalo; dil Kalo dhedha urluŋw dugore galo dil liŋa dhuŋuna dhina dhiro titiganu; 26dilila ŋadigireny ŋai ŋegen gi dhuŋun dhina dhiŋir, altu, alabire gi diba gwa Ibliis lina limuthilo Ibliis gwan ŋiro ŋuŋun.
Currently Selected:
2 Tiimuuthaawus 2: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
