2 Kuurinthuus 2
2
Dhuŋun dhadhi dhudhani ganu gi dhuŋun dha kwiji gwina gwimurle dhugore galo dhuŋun gi ŋidi ŋina ŋike
1Abi nyi gwuminyu gi dhuŋun ibidha dathinyi idhi dagalo manaŋ dhugor dhai dhina dhinaŋ no. 2Ada nyi gwimaro ke dugore gwalo, abi ei gwaro gwina gwinyi iŋiriye dhugore, abi ŋeda gwina gwikiiny dhugore. 3A nyi gwulijaje dhuŋuna ibidha di, ada nyi gwimila dathinyi uthi kuŋw dhugore di ŋediŋa lina liŋiradhu dinyi iŋir dhugore degen no; dinyuthi uminyuŋw dagalo ganu peth, darnu iŋir dhugore gwiny gwiro iŋir dugore gwalo peth. 4Nyi gwuthi kuŋw dhugore gwoinyadho a dhugor dhiny dhuthi ŋwuredenya ganu dina ulijaje ŋwal ŋwai ŋwoinyadho; dathanya kii dugore no, abi danyaliŋa uminyuŋw gwina gwijo diginy a gwoinyadhanu gwan nyaŋa.
5Abi ada gweta gwimapa kuŋw dhugore, gwati gwinyikiye dhugore no, abi gwajikiye dugore nyaŋa peth gwitiny; dathanya uthi dhuŋuna dhina dhinaŋ no. 6H̱ukm ibigwa gwina gwimagitini gi liji loinyadho gwibudho gwan kwiji ibigwa; 7di nyaro mamiliye ganu gwiŋiranu danyan dhudhani ganu gwoinyadhanu, a nya gathaje uwa, dathi kadhugore ibigwa dhiŋudhi kwijo ibigwa no. 8Gi dhuŋun ibidha nyi gwothaijaje galo danya aŋajo uminyuŋw. 9Gi dhuŋun ibidha nyi gwulijaje, dinyi liŋa dhuŋuna dhalo dhina dhiŋir darnu nyaŋa luthejo dhuŋuna peth nyuni. 10A gwina gwanyan dhudhani ganu gi ŋidi ŋeda, a gwinyin dhudhani ganu ko; ada gwiminyin dhudhani ganu gi ŋidi ŋeda, dhuŋun ibidha dhan nyaŋa gi je ganu ja al Masiiẖ. 11Dathi Sheṯaan obadho galo dega ganu; ŋinena athana dhimithi ŋwujimiya ŋuŋun no.
Dhuŋun dhina dhibur dhina dhibujo Buulus gi dhuŋun dha dhabiŋaijo lijo Dhuŋuna dhina Dhiŋir a dhinyi
12Abi ŋinena minyela Taruwaas gi dhuŋun dha dhabiŋaijo lijo Dhuŋuna dhina Dhiŋir dha al Masiiẖ, nyi gibur iginijo gi Kweleny, 13athinyi bujo gathuŋw uwa gi dhigirim no ŋinena athinyi bujo Tiiṯusuŋw gwina gwiro maguri no; nyibi gathani lijo, nyela gi Makiduuniya. 14Abi shukr di Kalo, gina gathiji odha gi ŋeleny ŋa dhinyi gwuŋun gi al Masiiẖ ŋwamun peth, a ŋwuŋiye dega ganu uwa ina iŋir ya liŋa gwuŋun gi kalo peth. 15Ŋinena rana uwa ya al Masiiẖ ina yama ina yamanu di Kalo degen lina limagilaŋini, a di ŋediŋa lina lerna. 16Di ŋediŋa anaŋa liro uwa yadhai di ai; a di liter anaŋa liro uwa ya midhe di midhe. Abi ei gwuthi ŋoma dibudhe dhuŋuna ibidha peth? 17Ŋinena athana rui ŋinena liji lina loinyadho lina lathapai dhuŋuna dha Kalo dhuŋun dhai dhina dhiro ŋidhuŋun no; abi anaŋa liro ŋinena liji lina lathapai ŋiro dhuŋun dhai dhina dhiro titiganu gi dhuŋun dhina dhidhi di Kalo, danabiŋi gi je ganu ja Kalo gi al Masiiẖ.
Currently Selected:
2 Kuurinthuus 2: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
