2 Kuurinthuus 1
1
Salaam a shukr
1Buulus, gwina gwukejinu gwa Yasuuⓐ al Masiiẖ dhuŋun dhai dhina dhibupo Kalo, a Tiimuuthaawus gwina gwiro mega, gi kaniisa ga Kalo gina gathije Kuurinthuus, liji lai peth lina liŋir didirel lina lathije gi Akhaaya peth. 2Niⓐma dagalo a audhaijiye galo di Kalo gina giro Babo gwega, a Kweleny gwina gwan Yasuuⓐ al Masiiẖ.
3Kalo giŋir, gina giro Babo gwa Kweleny gwega gwina gwan Yasuuⓐ al Masiiẖ, gina giro Babo gwa ina, a Kalo ga gathaje uwa peth; 4gina gathiji gathaje uwa gi dhuŋun dhega peth dhina dhibur, diluthi ŋoma dilgathaje uwa lina luthi dhuŋuna dheda dhina dhibur, gathaje gwai uwa gwina gwathijigwai Kalo gathaje uwa. 5Gwiro ŋinena man ŋwuredeny ŋwa al Masiiẖ oinyadhe dega, a minoŋ gi al Masiiẖ gathaje uwa gwega gwimoinyadhani ko. 6Abi ada anaŋa limabuje dhuŋuna dhina dhibur, a dhuŋun ibidha dhan gathaje uwa gwalo a gilaŋ gwalo, gwina gwathapai ŋiro gi mutha dugore gi dhuŋun dha ŋwuredeny ŋwina ŋwathaŋaŋwai umi ŋiya anaŋa ko; i ada anaŋa limabuje gathajuŋw uwa, a dhuŋun ibidha dhan gathaje uwa gwalo a gilaŋ gwalo. 7A dhunijo gwuri gwan nyaŋa gwimuthinu galo, liŋidhul darnu ŋinena uthanya aicaijiyuŋw gi ŋwuredeny, a minoŋ gi gathaje uwa ko. 8Ŋinena athana bupo danya dhimetha, limega lai, dhuŋuna dhina dhibur dhina dhijo daguri gi Asiiya, ŋinena bujana dhuŋuna dhina dhibur gwuleny dhina dhibuthanu gi ŋoma ŋuri, di anarnu anaŋa ladai. 9Abi anaŋa luthi ẖukm gi lidom luri gwadhai, dathana urudhi gi lidom luri no, abi di Kalo gina gadireye lijo lina laio; 10gina gimiji gilaŋiye gi ai gwina gwinaŋ gwiro minoŋ, a ŋeda gwathi gilaŋiye; gwina gwuthanana dhunijuŋw darnu gwaji gwagilaŋiye manaŋ. 11A nyaŋa ko lathiji gathaje uwa abiŋaije gwai Kaloŋa gwan anaŋa, di shukr gwa liji loinyadho je daguri gi dhedha tur gwina gwimijil dhedha tur gi liji loinyadho.
Uminyi gwina gwuthi Buulus gwina gwijuro gwadhela degen
12Ŋinena are ŋamilai gwuri gwiro shahaada ibigwa gwa dugor duri, darnu anaŋa lo gi iŋir didirel a dhuŋun dhina dhiŋir dha Kalo, gwati gi bebra gwa aŋinu no, abi gi niⓐma gwa Kalo, anaŋa luthi midhuŋw gwuri kidhila, a gwoinyadhanu gwuleny gwan nyaŋa. 13A anaŋa lati lajulijo gi dhuŋun dheda no, abi gi dhuŋun dhina dhanya abiŋaijo i dhanya liŋa; a nyi gwuthi dhunijuŋw darnu dhaji dhanya liŋa peth momaŋ ko, 14gwiro ŋinena mijil liŋa gwitiny, darnu anaŋa liro are ŋamilai gwalo, gwiro ŋinena ranyana ko are ŋamilai gwuri gi lamun la Kweleny gwina gwan Yasuuⓐ.
Gwigeto lamun liter ladhela degen
15A gi uminyi ibigwa nyi gwibupo dinyila dagalo kwerkwereny, danyuthi niⓐma manaŋ; 16a daji madhina dinyela Makiduuniya, a nyaura ko gi Makiduuniya dagalo, a nyaŋa linyigeta gi dhai dinyela Yahuudiiya. 17A ŋinena nyi gwima upeye dhuŋuna ganu dhiny dhina dhuthiny kwerkwereny, nyi gwuthi dhuŋuna dhina dhowraŋ a? I dhuŋun dhina dhathinyi uminyi dapai athinyi apai gi dhuŋun dha aŋinu, dinyuthi ye yeŋw, i oo ooŋw a? 18Abi gwina gwidhunu galo ŋeda gwan Kalo, a minoŋ dhuŋun dhuri dhati dhan ye i oo no. 19Ŋinena Ŋari ŋa Kalo, ŋina ŋan Yasuuⓐ al Masiiẖ, gwina gwabiŋaijajilgwai, nyi a Silwaanus a Tiimuuthaawus, dagalo ganu dhati dhan ye a oo no, abi dugun gwuthi yeŋw. 20Dhuŋun peth dhina dhardhai Kalo dhuthi yeŋw dugun. A minoŋ anaŋa latharnu amiin ŋeda gwai ko, gi majdh gwa Kalo. 21Abi gwina gwiji muthineye galo nyaŋa ŋalai gi al Masiiẖ, a gwimiji buruthe, gwan Kalo; 22gwina gwimiji khathimiye ko, a gwimijidhedha ŋida ŋina ŋiro kwerkwereny ŋa Dhigirim gi dugor ganu dega. 23Abi nyi gwabrico Kaloŋa duŋwuro shaahid gwa dhugor dhiny, darnu nyi gwati gwila Kuurinthuus manaŋ no ŋinena athinyi bupo dajidhedha dhuŋuna dhina dhuthi ŋwuredenya ganu no. 24A gwati gwan darnu anaŋa luthi ŋelenya gi imaan gwalo no, abi anaŋa liro lina lathigathaje iŋiruŋw dugore gwalo uwa, ŋinena muthinanya galo gi imaan.
Currently Selected:
2 Kuurinthuus 1: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
