I Kuurinthuus 16
16
Dhuŋun dhadhi wawurteje gwarush liduŋw gwan liji lina lati luthi ŋida no lina lathije gi Urushaliim
1Ŋinena gi dhuŋun dha wawurteje gwarush liduŋw gwan liji lina liŋir didirel, gwiro ŋinena dhedhinyina kanaayis gi Qalaaṯiiya amr, minoŋ ko apul. 2Gi lamun lina liro kwerkwereny la asbuuⓐ abricul gweta gweta dagalo ganu gwiro ŋinena dhedhinuŋwna ŋwauwa gwarush ter gwina gwuŋwun uthi ŋoma dauwa, dathathi gwarush wurtedhini liduŋw maji minyila. 3A maji minyobana, lina luminyanyalo linyil ukeje jawaabaat jai dilapai ŋida ŋalo ŋina ŋwurtejanyalo liduŋw gi Urushaliim. 4A ada dhuŋun dhimaje dinyela ko, ŋediŋa laji lanalai ela.
Dhuŋun dhina dhabiŋaijo Buulus lijo a dha salaam
5Abi nyi gwaji gwila dagalo maji minyela dhai dhai dha Makiduuniya; ŋinena athiny ela dhai dhai dha Makiduuniya. 6Abi udubidi dinyjalo dagalo ŋwamun coŋ, a nyi gwameaje ŋwamun ŋwa kwo, dinyilgeta gi dhai gi kalo gina ginyin ela. 7Abi nyi gwati gwibupo dajaŋa ŋinena idhiny gi dhai alaŋ no; abi nyi gwara dinjalo dagalo ŋwamun coŋ, ada Kweleny gwimuminyi. 8Abi nyi gwajalo Afasus di Yom al Khamsiin. 9Abi gibur giminy iginijo gina gipa, a nyi gwuthi ŋwamun ŋwaudhi dinyapai ŋiro, a lo loinyadho lina likiana lai.
10Ada Tiimuuthaawus gwimila, abricul duŋwuje dagalo gwati gwuthi ŋidhenyo no; ŋinena athi ŋeda apai ŋiro ŋa Kweleny, gwiro ŋinena athinyilapai ko. 11Minoŋ athathi gweta munadhi ganu no; nyabi geta gi dhai audhaijiye gwai galo duŋwila diginy; gwo gwidhunijana limega lai. 12Abi gi dhuŋun dha Abulluus gwina gwiro mega, gwothaijiny galo gwuleny dilila limega lai dagalo; abi gwati gwibupo dila ŋinena gatur no; abi gwaji gwila maji muŋw uthi lamun lina laudhi. 13Ethadhinul galo, muthinul galo gi imaan, ruiyul loma, biriyul nono. 14Abricul ŋiro peth ŋina ŋathanyal apai alupini uminyi gwai.
15A nyi gwibupo dagalo, limega lai, (nyaŋa liliŋidhi darnu liji la dunu gwa Istifaanuus liro lira la Akhaaya, a limajarima lidom legen dilapai ŋiro ŋa liji lina liŋir didirel.) 16Danya je ko ŋwora ganu ŋwa liji lina liro ŋinena liji ibile, a peth lina lathijigathaje uwa gi ŋiro, a lina lathapai ŋiro gwuleny. 17A nyi gwiŋir dhugore ila gwai gwa Istifaanuus a Furtuunaatuus a Akhaayiikuus; gwiro ŋinena amrathe gwalo gwimal meaje. 18Ŋediŋa limagathaje dhigirima dhiny a dhalo uwa; minoŋ liŋidhul lijo lina liro minoŋ. 19Kanaayis ga Asiiya go gisalimeyaje. Akiila a Biriiskilla lo lisalimeyaje gwuleny gi Kweleny, kaniisa gai gina go gi dunu gwegen. 20Limega peth lo lisalimeyaje. Salimeyul leta leta salaam gwai gwina gwiŋir didirel.
21Salaam dhoi dhai dhiny nyi gwina gwan Buulus. 22Ada gweta gwati gwimuminyi Kwelenya gwina gwan Yasuuⓐ al Masiiẖ no, abricul ŋwuludhini. Kweleny gwo gwidhi. 23Niⓐma gwa Kweleny gwina gwan Yasuuⓐ al Masiiẖ gwaje dagalo 24Uminyi gwiny gwaje dagalo peth gi al Masiiẖ Yasuuⓐ, Amiin.
Currently Selected:
I Kuurinthuus 16: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
