1 Tiimuuthaawus 6
6
Jine
1Abrico jinea peth jina jo gi loka ganu aldhura lelenya legen laudhi dilapai nejuŋw peth, dathil lui jiriny ja Kalo a taⓐliim dhuŋun no. 2A ŋediŋa lina luthi lelenya lina luminyu, athaŋa abrico alirini no, ŋinena ŋediŋa liro ŋimega, albi upijo ŋiro ŋoinyadhanu, ŋinena lina lathaicaijiye gi ŋiro ŋina ŋuthi je ganu, ŋediŋa liŋir a luminyinu. Alimiyilo, ŋalabiŋaijo dhuŋuna ibidha.
Taⓐliim dhina dhiro ŋidhuŋun
3Ada kwiji gweta gwimalimiye taⓐliim dhiter, a mathuŋw uminyu dhuŋuna dhina dhiro titiganu dha Kweleny gwega gwina gwan Yasuuⓐ al Masiiẖ, a taⓐliim dhadhi biriye nono gi dhuŋun dha Kalo no; 4ŋeda gwimaro gwipa gi gwidom gwuŋun, a ŋeda gwati gwiliŋidhi kwoiny gwetipo no, athuŋwbibupe othaijuŋw galo a kadhe gi dhuŋun dhina dhathapai amaraŋw gwa ŋidi ŋa liji liter, a kaijiye gi je, a wurtaje dhuŋuna galo dha kadhe, a afkaar gwina gwike. 5A ŋuduro ŋa liji lina lidigiro ŋadigirenya, a lina lati luthi dhuŋuna dhina dhiro titiganu manaŋ no, athilarnu dhuŋun dha dhuminyu Kaloŋa dhiro teyani galo; ŋabire degen.
Ŋeleny ŋina ŋiro titiganu
6Abi dhuŋun dha dhuminyi Kaloŋa iŋir gwai dugore dhiro dhadhi teyani galo gwina gwinaŋ. 7Gwiro ŋinena alŋa lati lunijo kwoiny gwetipo kidhila ibiga no, alŋa ko lati luthi ŋoma lateye kwoiny gwetipo dugun no. 8Ada alŋa limuthi ŋida ŋa dheny a ciraŋ, abricije alarnu ŋwoinyadho di. 9Abi ŋediŋa lina lathibupe dilro leleny lathide gi idheje a diba, a ŋidi ŋoinyadho ŋina ŋathil dugor amira ŋina ŋati ŋuthi je ganu no a ŋina ŋathumiye lijo ŋiya a ŋina ŋathuleje lijo galo kalo gina gike a ai gwina gwiro gwortal. 10Abi uminyi gwa gwarush gwiro dhuwa dha ŋidi peth ŋina ŋike; ada ŋimal coŋ obadhe galo dilbupe, limadhudhe gi imaan, a limadhuge lidom legen ŋwuredeny ŋwai ŋwoinyadho.
Dhuŋun dhina dhabiŋu Buulus
11Abi ŋa, kwiji gwai gwa Kalo, abiro gi ŋidi ibiŋa; ŋabigwujani dhuŋuna dhina dhiŋir a dhina dhiro dha dhuminyi Kaloŋa, a imaan, a uminyi, a mutha dhugore, a ruini gwitiny. 12Apo ŋoŋora ŋina ŋiŋir ŋa imaan, ŋa mutha midhuŋw gwina gwathije gwortal, gwina gwurniyaŋa ko, ŋa teje galo tejuŋw galo gwina gwiŋir gi je ganu ja shuhuud gwoinyadho. 13Nyi gwaŋadhedha amr gi je ganu ja Kalo, gina gathimidhiye ŋida peth, a gi je ganu ja al Masiiẖ Yasuuⓐ, gwina gwuthi shahaada di Biilaaṯus al Bunṯi teje gwai galo gwina gwiŋir; 14daŋa muthadha amr ibigwa gwa Kalo dathaŋa uthi dhara i lom no, di ma Kweleny gwega gwina gwan Yasuuⓐ al Masiiẖ aŋini, 15gwina gwaji gwa Kalo aŋiye gi ŋwamun ŋwuŋun, gina giro mubaarak, getipo gina guthi ŋelenya, Malik gwa maluuk, a Kweleny gwa leleny; 16gina giro getipo gina guthi midhuŋw gwina gwathije gwortal, gina gathije gi fure gwina gwati gwan kwiji gwetipo ela no; gina gati gaŋudhi kwiji gwetipo no, i gwuthi ŋoma daŋa no, gina guthi neyuŋw a ŋoma ŋina ŋathije gwortal. Amiin.
17Dhedhi lijo amr lina luthi ŋida ŋoinyadho kidhila ibiga athil neyo lidom legen no, i athilgeto dhunijuŋw gwegen gi ŋeleny ŋina ŋati ŋilliŋidhilo no, albigeta dhunijuŋw gwegen di Kalo, gina gathijidhedha ŋida peth diliŋir dugore. 18A dilapai dhuŋuna dhina dhiŋir, a dilro leleny gi ŋiro ŋina ŋiŋir, aluminyi dilguginejo lijo, aluminyi dilgathaje uwa gi ŋiro ŋina ŋibur; 19athil anije dhugul dhegen dhina dhiŋir dhan lidom legen di lamun lina laji lila, dilmutha midhuŋw gwina gwathije gwortal.
20Tiimuuthaawus gwai, dimii dhuŋuna dhina dhimaŋa dhedhini, ŋabidoinya dhuŋuna dhina dhike dhina dhati dhuthi je ganu no, a dhina dhimamliganu di liŋa gwina gwuthi jiriny jan liŋa abi gwati gwiro no. 21Gwina gwimagwai coŋ arnu gwuthilo, abi limadhudhe gi dhuŋun dha imaan. Niⓐma gwaje duguŋa. Amiin.
Currently Selected:
1 Tiimuuthaawus 6: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
