1 Tasaaluuniika 4
4
Dhuŋun dhiŋir dhadhapai
1A gi dhuŋun dhina dhiro gidon peth, limega lai, anaŋa lajothaije galo anabupe dagalo di Kweleny gwina gwan Yasuuⓐ, darnu gwiro ŋinena manyan apai daguri akwai gwiŋir danya elila a nyiŋiriye Kaloŋa dhugore, danya oinyadhe gwoinyadhanu. 2Ŋinena liŋidhanya awaamir gwiro gwirau gwina gwimajidhedha Kweleny gwai gwina gwan Yasuuⓐ. 3Ŋinena ibigwa gwiro dhuŋun dhina dhibupo Kalo, iŋir gwalo gwina gwiŋir didirel, dathanya doinya ŋidhira. 4Di gweta gweta dagalo ganu liŋa akwai gwethadhe aŋina yuŋun jure gwai a neye gwai; 5yati gi ŋidi ŋina ŋathamira ŋina ŋike ŋina ŋathil aŋinu bupe, gwiro ŋinena Liumam lina lati liliŋidhi Kaloŋa no, 6dathi kwiji gweta uminyi idheje dapai ŋida ŋina ŋuthilo megen gi dhuŋun ibidha no; ŋinena Kweleny gwiro gwina gwathakimiye gi ŋidi ibiŋa peth, gwiro ŋinena abiŋaijajina kwereny anateje galo. 7Ŋinena athiji Kalo urniajo ŋirlea no, abi diŋir didirel. 8A minoŋ gwina gwathidoinya, gwati gwathidoinya kwijo no, abi Kalo gina gidhedhije ko Dhigirima dhuŋun dhina Dhiŋir. 9Abi gi dhuŋun dha dhuminyi ŋimega, a nyaŋa lati labupe dajulijo no, ŋinena alimiyanyana di Kalo danya uminyejiye gweta gweta dagalo ganu. 10A titiganu nyaŋa lathapai dhuŋuna ibidha ko gi ŋimega peth lina lo gi Makiduuniya peth, abi anaŋa libupo dagalo, limega lai, danya oinyadhe gwoinyadhanu; 11danyaje momaŋ danya audhaijiye galo, danyapai ŋiro ŋalo, a danyapai ŋiro doi dai dalo, gwiro ŋinena abiŋaijajina; 12danya elila momaŋ gi liji lina lo por, a dathanya amiratho gi ŋidi ŋeda no.
Dhuŋun dhan liji lina laio
13Abi nyi gwati gwuminyu danya dhimetha, limega lai, gi dhuŋun dha ŋediŋa lina lo lidhro, dathanya ki dugore, gwiro ŋinena liter lina lati luthi dhunijuŋw no. 14Ada alŋa limuminyi darnu Yasuuⓐ gwimai a gwimadire manaŋ, a minoŋ ŋediŋa lina lo lidhro gi Yasuuⓐ laji lal Kalo apa ko. 15Anaŋa lajaici minoŋ gi dhuŋun dha Kweleny, darnu alŋa lina lo limidho a lina lidhainu gi ila gwa Kweleny athil gathanu lina lo lidhro gidon no. 16Abi Kweleny gwaji gwula Samawaat gwulo gwai gwina gwipa, a gwulo gwai gwa kweleny gwa malaayka, a ŋiridhe ŋai ŋa Kalo; a lina limai di al Masiiẖ laji ladire kwerkwereny, 17a alŋa lina loma limidho a lina lidhainu alaji lapini peth ŋediŋa lai gi jiburu, dilbudhe Kweleny ŋalai gi karun; a minoŋ athilje Kweleny ŋalai gwortal. 18A minoŋ gathajiyul uwa gweta gweta dagalo ganu dhuŋun dhai ibidha.
Currently Selected:
1 Tasaaluuniika 4: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
