1 Tasaaluuniika 5
5
Ila gwa Kweleny, a dhuŋun dhina dhiro daruri dana jalo je jai
1Abi gi ŋwamun a ŋwa dhorum i ŋwa kaiyo i ŋwa dhura i ŋwa ŋwuram, limega lai, nyaŋa lati labupe ŋida ŋeda dajulijo no. 2Ŋinena liŋidhanya momaŋ darnu lamun la Kweleny laji lila liro ŋinena gwuram gwina gwathila gile. 3Maji mal arnu, Audhaijiye galo a je galo momaŋ, a minoŋ erna gwila degen babraŋ, gwiro ŋinena ŋwuredeny ŋwina ŋwatheny kwaio gwina gwijo kari gai; a ŋediŋa lati luthi ŋoma labire gi dhuŋun ibidha gatur no. 4Abi nyaŋa, limega lai, nyaŋa lati gi kirim no, di ŋaji lamun ibile madhina galo liro ŋinena gwuram. 5Nyaŋa peth liro keleŋa ga fure, a keleŋa ga aŋina; alŋa lati liro la gile i la girim no. 6A minoŋ athijabrico alŋa ladhire no, gwiro ŋinena liji liter; abi abricije alije galo je jai aluthi ŋadigirenya ŋina ŋiŋir. 7Ŋinena lina lathidhre a gile lathidhre; a lina lathirlele a gile lathirlele. 8Abi alŋa, lina liro la aŋina, alije galo je jai, algena carthuŋw ja imaan a uminyi, a burneta gwina gwiro dhunijo gwa gilaŋ. 9Ŋinena athiji Kalo geto gwan kadhugore no, abi dilapai gilaŋuŋw Kweleny gwai gwega gwina gwan Yasuuⓐ al Masiiẖ, 10gwina gwaio gwan alŋa di, ada alŋa limaje galo je jai i alŋa ladhire, alamidhe peth ŋeda ŋalai. 11A minoŋ gathajiyul uwa gweta gweta dagalo ganu, a acul gweta gweta dagalo alaŋ, gwiro ŋinena athanyanapai ko.
Dhuŋun dhitidhiter dhina dhabiŋu Buulus a dhuŋun dhina dhimirudhi
12A minoŋ anaŋa lajothaije galo, limega lai, danya liŋa lina lathapai ŋiro dagalo ganu lina liro wukala di Kweleny a ŋajil ola; 13danya uthi fikr gwina gwiŋir gwoinyadho gi uminyi gi dhuŋun dha ŋiro ŋegen; nyaje audhaijiye gwai galo gweta gweta dagalo ganu. 14A anaŋa libupo dagalo, limega lai, danya ola lina lati lathelila momaŋ no; gathajul uwa lina liro litilitiny gi dugor ganu degen, a muthiniyul lijo galo lina limulo nono, muthul dugore gi liji peth. 15Daŋadhul galo dathi gweta wura ŋida ŋina ŋike ŋan ŋidi ŋina ŋike no; abi ŋwamun peth gwujul dhuŋuna dhina dhiŋir gweta gweta dagalo ganu, a gi liji peth. 16Iŋiriyul dugore gwortal. 17Athanya abiŋaijo Kaloŋa athanya dhunudhi lamun letipo no. 18Athanya aici Kaloŋa shukran gi ŋidi peth; ŋinena dhuŋun dhiro ibidha dhina dhuminyu Kalo gi al Masiiẖ Yasuuⓐ gwan nyaŋa. 19Athanya rinyi Dhigirima no. 20Athanya arnu dhuŋun dhina dhabiŋu nebiŋa dhiro tur no. 21Idhejul ŋida peth; muthul dhuŋuna momaŋ dhina dhiŋir. 22Doinyul dhuŋuna peth dhina dhuthi s̱uura gwa ŋidi ŋina ŋike. 23A Kalo ga dhaudhaijiye galo gaji juriye momaŋ; a digirim dalo a dugor dalo a aŋinu yalo ithedhini momaŋ, athiluthi lom gi ila gwa Kweleny gwega gwina gwan Yasuuⓐ al Masiiẖ no. 24Ŋeda gwiŋir gwina gwimajurniya, gwina gwaji gwapai dhuŋuna ibidha ko. 25Limega lai, abiŋadhaijul Kaloŋa gwan anaŋa. 26Salimeyul limega peth mira gwai gwina gwiŋir didirel. 27Nyi gwajidhedha amr di Kweleny di jawaab ibija abiŋini gi limega peth lina liŋir didirel. 28Niⓐma gwa Kweleny gwega gwina gwan Yasuuⓐ al Masiiẖ gwaje dagalo. Amiin.
Currently Selected:
1 Tasaaluuniika 5: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
