1 Tasaaluuniika 3
3
Ukejini gwa Tiimuuthaawus duŋwliŋa dhuŋuna dha imaan gwegen
1A minoŋ dina athana uthi ŋoma dana mutha dugore manaŋ no, anarnu gwiŋir danaje gi Athiina cucun; 2anabi ukeja Tiimuuthaawusuŋw, gwina gwiro mega gwuri a gadham ga Kalo, a gwina gwathanalai apai ŋiro gi Dhuŋun dhina Dhiŋir dha al Masiiẖ, daji muthineye galo, a daji gathaje uwa gi dhuŋun dha imaan gwalo, 3dathi kwiji gweda ubo galo gi dhuŋun ibidha dhina dhibur no; a nyaŋa laliŋa darnu anaŋa ligitinu gwan dhuŋun ibidha. 4A ko, dina jana dagalo ganu anaŋa labiŋaijaje kwereny darnu anaŋa laji labuje dhuŋuna dhina dhibur; a dhuŋun dhimaje ko a nyaŋa limaliŋa. 5A gi dhuŋun ibidha, dina athiny uthi ŋoma diny mutha dhugore manaŋ no, gwiminy ukeja dinyi liŋa imaan gwalo; nyi gwidhenyo darnu gwina gwathukinejo lijo ganu gwimaji ukinejo ganu, a ŋiro ŋuri ŋina ŋupinu ŋaro tur. 6Abi ŋinena ma Tiimuuthaawus ila daguri, gwina gwijo dagalo, a gwimijabiŋaijo dhuŋuna dhina dhiŋir dhan imaan gwalo a uminyi gwalo, a ŋinena athijil aŋidhani gwiŋir ŋwamun peth, a nyaŋa luminyu gwuleny dijilaŋa, gwiro ŋinena anaŋa ko luminyu dajilaŋa. 7A gi dhuŋun ibidha, limega lai, anaŋa limabuje gathajuŋw uwa gi dhuŋun dhalo dhan dhuŋun peth dhina dhimana buje dhina dhibur a dhina dhiro daruri imaan gwai gwalo. 8Abi ŋinena anaŋa limidho, ada nyaŋa limamuthini galo gi Kweleny. 9Abi anaŋa ladhedha Kaloŋa shukr gwiro dhaŋ manaŋ gwan nyaŋa, gwan iŋir dugore peth gwina gwathanagwai iŋir dugore jiriny jai jalo gi je ganu ja Kalo gega? 10Anaŋa lathothaije Kaloŋa galo gwuleny gigilo a ninaŋin danaŋa je jalo, a dana meaje amirathuŋw gi imaan gwalo. 11A Kalo ŋeda gwina gwiro Babo gwega, a Kweleny gwega gwina gwan Yasuuⓐ al Masiiẖ, gijaŋajo dhai dhuri dhadhela dagalo. 12A Kweleny gwajibiŋiye a gwaji oinyajani gi uminyi gweta gweta dagalo ganu, a gi liji peth, gwiro ŋinena anaŋa ko dagalo. 13Duŋw muthiniye dugore galo dalo, athiluthi lom gi iŋir didirel gi je ganu ja Kalo gina giro Babo gwega no, di ila gwa Kweleny gwega gwina gwan Yasuuⓐ al Masiiẖ liji lai luŋun peth lina liŋir didirel.
Currently Selected:
1 Tasaaluuniika 3: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
