1 Tasaaluuniika 2
2
Dhuŋun dhina dhabiŋu Buulus dhan ŋiro ŋuŋun
1Nyaŋa, limega lai, nyaŋa liliŋidhi darnu uni gwuri dagalo ganu gwati gwiro tur no, 2abi dina mana umi ŋiya kwereny, anurini ŋina gwuleny, gwiro ŋinena liŋidhanya darnu gi Fiilibbi anaŋa lire ganu gi Kalo gega dajabiŋaijo Dhuŋuna dhina Dhiŋir dha Kalo mutha gwai dugore gwoinyadho. 3Ŋinena dhuŋun dhuri dhati dhiro dha ukinejo ganu, i dha ŋirle, i ŋwujimi ŋai no, 4abi gwiro ŋinena manabuje dhuŋuna dhina dhiŋir di Kalo, aniŋiradhe dabiŋaijo Dhuŋuna dhina Dhiŋir, a minoŋ anaŋa lathabiŋi; dhati dhiro ŋinena dana iŋiriye lijo dugore no, abi Kalo, gina gathidheje dugore dega. 5I lamun lati lijo lina limanal abiŋi dhuŋuna dha dhiŋiriye lijo dugore no, gwiro ŋinena liŋidhanya, i luga ladhi teyani galo gwuri; Kalo giro shaahid. 6I anaŋa lati libupo orthadhaŋw gi liji, i dagalo, i gi liji liter no, dina uthana ŋoma daŋajo dupini ŋida ŋina ŋinaŋ, liro ŋinena lina lukejinu la al Masiiẖ. 7Abi anaŋa lijo ŋimiri ŋai dagalo ganu, gwiro ŋinena athi nana ethadhe keleŋa guŋun. 8A minoŋ ada anaŋa limaje dajil gathaje uwa uminyi gwai, anaŋa luminyu dajildhedha, gwati gwan Dhuŋun dhina Dhiŋir dha Kalo dogo no, abi dugor duri ko, ŋinena manyaro liji lina luminyinu daguri. 9Limega lai, nyaŋa laŋidhani anaŋa lapo ŋiro ŋina ŋibur, ŋinena dajilabiŋaijo Dhuŋuna dhina Dhiŋir dha Kalo; anaŋa lijo dapai ŋiro ŋuri gigilo a ninaŋin, dathana geta dhuŋuna dhina dhinaŋ dagalo gweta gweta dhan anaŋa no. 10Nyaŋa liro shuhuud, a Kalo ko, akwai anaŋa lijo dagalo ganu lina luminyu iŋir gwai didirel a dhuŋun dhai dhina dhiŋir, athana uthi lom no. 11Gwiro ŋinena liŋidhanya akwai anaŋa loladhaje peth gweta gweta dagalo ganu, gwiro ŋinena babo gi keleŋa guŋun, ŋajil gathaje uwa. 12Anaro shuhuud gi dhuŋun ibidha dagalo ganu, danya elila gi dhuŋun dhina dhaudhi dha Kalo, gina gurniaje kidhila guŋun a majdh gwuŋun.
Dhuŋun dhadhagirini
13Gi dhuŋun ibidha ko anaŋa lathaici Kaloŋa shukran athana dhunudhi lamun letipo no, ŋinena manyapai dhuŋuna dha Kalo dhina dhidiŋinanya daguri, a dhimanya uminyi, dhati dhiro ŋinena dhuŋun dha liji no, abi dhiro titiganu, dhiro dhuŋun dha Kalo dhina dhathapai ŋiro dagalo ganu ko lina luminyu. 14Ŋinena, limega lai, nyaŋa limaro s̱uwar gi kanaayis ga Kalo gina go gi Yahuudiiya gi al Masiiẖ Yasuuⓐ, ŋinena manya umi ŋiya ko gi liji la len lalo ŋwuredeny ŋwai ibiŋwa ŋwetipo, gwiro ŋinena ŋediŋa ko gi Yahuud, 15lina lirinyidhi Kwelenya gwina gwan Yasuuⓐ, a nebiŋa legen, jilirini; a ŋediŋa lati liŋiriyo Kaloŋa dhugore no; alirini lijo peth. 16Athijil ekajo danabiŋaijo Liumam dilgilaŋ, di mal meaje ŋida ŋegen ŋina ŋike gigina, abi kadhugore gwimila degen alaŋ gwina gwiro gwortal.
Buulus gwuthi uminyuŋw gwan liji lina lathabiŋaijo jawaab juŋun
17Abi anaŋa, limega lai, ada anaŋa limupini dagalo ganu kaija gitiny giro ŋinena saaⓐa jeta gi je ganu jalo, abi gwati gi dugor no, anaŋa libupo gwoinyadhanu uminyi gwai gwoinyadho danaŋa je jalo. 18A minoŋ anuminyi danila dagalo, nyi gwina gwan Buulus, lamun leta i ŋwamun ganu ram; abi Sheṯaan gwimiji ekajo. 19Ŋinena aŋ gwiro dhunijo gwuri, i iŋir dugore gwuri, i taaj dha dhare ŋamilai gwuri? Nyaŋa lati liro ko gi je ganu ja Kweleny gwega gwina gwan Yasuuⓐ al Masiiẖ di ila gwuŋun na? 20Ŋinena nyaŋa liro majdh gwuri a iŋir dugore gwuri.
Currently Selected:
1 Tasaaluuniika 2: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
